ផ្លូវថ្មី ២ ខ្សែដែលសាងសង់ដោយរដ្ឋបាលរាជធានីភ្នំពេញ តភ្ជាប់ទៅកាន់កីឡដ្ឋានជាតិមរតកតេជោ​ គិតមកដល់ពេលនេះសាងសង់រួចរាល់មួយខ្សែហើយ ខណៈមួយខ្សែទៀតសម្រេចបាន ៨៥% ។ ការសាងសង់ផ្លូវពីរខ្សែនេះ ធ្វើឡើងដើម្បីសម្រួលដល់ការធ្វើចរាចរណ៍ទូទៅផង និងការធ្វើដំណើរក្នុងព្រឹត្ដិការណ៍ កីឡាស៊ីហ្គេម និងអាស៊ានប៉ារ៉ាហ្គេមផងដែរ។

តាមការលើកឡើងពីលោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ កាលពីថ្ងៃទី២៥ ខែមករា ឆ្នាំ២០២៣ បានឲ្យដឹងថា ផ្លូវថ្មីទាំង២ខ្សែនេះ គឺស្ថាបនាស្របតាមទន្លេសាបផ្នែកខាង កើត បែកខ្នែងជា២ផ្នែក ឆ្ពោះឡើងមហាវិថី ឈ្នះ ឈ្នះ ដែលក្នុងនោះរួមមាន៖

• ខ្សែទី១ ផ្លូវស្របមាត់ទន្លេ ចាប់ពីផ្លូវជាតិលេខ៦ ដល់មហាវិថី ឈ្នះ ឈ្នះ មានទទឹងផ្លូវ២០ម៉ែត្រ ប្រវែងជាង៨គីឡូម៉ែត្រ សម្រេចការសាងសង់បាន១០០% ទាំងការងារធ្វើផ្លូវបេតុង ដាក់លូ របាពុះចែកទ្រូងផ្លូវ និងបំពាក់ភ្លើងបំភ្លឺសាធារណៈ។
• ខ្សែទី២ ចាប់ពីផ្លូវ សម្តេច ជា ស៊ីម ជ្រោយចង្វារ ដល់មហាវិថី ឈ្នះ ឈ្នះ មានទទឹងផ្លូវ២០ម៉ែត្រ ប្រវែងជាង៥គីឡូម៉ែត្រ ដោយ សម្រេចការសាងសង់បាន៨៥%ហើយ នៅសល់ការដោះស្រាយផលប៉ះពាល់ជាមួយប្រជាពលរដ្ឋបន្តិច បន្តួច ប៉ុណ្ណោះ។

សូមជម្រាបដែរថា ក្រៅពីការស្ថាបនាផ្លូវទាំងពីរខ្សែខាងលើ ដើម្បីសម្រួលការធ្វើដំណើរឆ្ពោះទៅកីឡដ្ឋានជាតិមរតកតេជោនេះ រដ្ឋបាលរាជធានីភ្នំពេញ ក៏បានធ្វើការចាក់កៅស៊ូឡើងវិញលើផ្លូវជាតិលេខ៦ ដោយមានរៀបចំខឿន ផ្លូវថ្មើរជើង ចិញ្ចើមផ្លូវ ពីរង្វង់មូល ព្រហ្មជ្រោយចង្វារ ដល់ស្ពានទី១២ ព្រំប្រទល់ខេត្តកណ្តាល ដែលមានប្រវែងប្រមាណជា ១៥គីឡូម៉ែត្រ ខណៈបច្ចុប្បន្នសម្រេចបាន ៨០%ហើយ។ ជាមួយគ្នានោះ រដ្ឋបាលរាជធានីភ្នំពេញ ក៏បានធ្វើការកែលម្អ មហាវិថីឈ្នះផងដែរ៕

អត្ថបទ៖ កឹម ប៊ុនធឿន