ទីបំផុតយីហោល្បីចំនួន៣ ដែលមកពីសហរដ្ឋអាមេរិក ក៏ដូចអេស្ប៉ាញនឹងប្រទេសអ៊ីតាលីបានសម្រេចមកចូលរកស៊ីនៅទីផ្សារស្រុកខ្មែរហើយ ដោយប្រេនទី១គឺ Zara ចំណែកប្រេនទី២ វិញគឺ New Balance ហើយប្រេនទី៣ វិញគឺ LIU.JO ដែលយីហោ៣នេះ កំពុងតែមានឈ្មោះល្បីរន្ទឺយ៉ាងខ្លាំងលើពិភពលោក។
ជាក់ស្តែង យីហោលំដាប់ថ្នាក់អន្តរជាតិ Zara របស់ប្រទេសអេស្ប៉ាញ បានសម្រេចមករកស៊ីនៅក្នុងប្រទេសកម្ពុជាជាលើកដំបូងហើយ ដែលយីហោនេះបានបើកដំណើរការដាក់ផលិតផលរបស់ខ្លួនជាផ្លូវការ នៅ ផ្សារទេំនើប ជីប ម៉ុង មេហ្គាម៉ល ២៧១ ជាន់ផ្ទាល់។
ចំពោះវត្តមាន ហាង ZARA ដំបូងគេក្នុងប្រទេសកម្ពុជានេះដែរ គឺមានទំហំសរុបរហូតដល់ទៅ ៣៣០០ ម៉ែត្រការេ ផ្នែកខាងក្នុងរចនាដោយ ស្ថាបត្យកម្ម ZARA (Zara Architectural Studio) ដែលត្រូវបានតុបតែងដេគ័រភាគច្រើនមានពណ៌ស ស្អាត ជាពិសេសស៊ីគ្នានឹងពណ៌ផ្សេងទៀត រួមជាមួយ ភាពទាក់ទាញនៃគ្រឿងសង្ហារិមធ្វើពីឈើ និងផ្ទៃពណ៌ធម្មជាតិ ដែលធ្វើឲ្យមានភាពស្រឡះប្លែកភ្នែក និងមានភាពទាក់ទាញ ធំទូលាយ ងាយស្រួលដល់អតិថិជន។
ជាមួយគ្នានោះដែរ នាពេលថ្មីៗនេះក៏មានប្រេន១ទៀតដែរ ដោយបានសម្រេចមករកស៊ីនៅស្រុកខ្មែរនោះគឺប្រេន New Balance ដែលក្រុមហ៊ុនផលិតស្បែកជើងកីឡា និងសម្លៀកបំពាក់ដ៏ល្បីឈ្មោះមួយរបស់ពិភពលោក ហើយយីហោដ៏ល្បីឈ្មោះមួយនេះដែរ គឺមានមូលដ្ឋាននៅទីក្រុង Boston រដ្ឋ Massachusetts នៅសហរដ្ឋអាមេរិក ដែលត្រូវបានបង្កើតឡើងតាំងពីឆ្នាំ ១៩០៦ មកម្លេះ និងមានអាយុកាលជាង១០០ឆ្នាំមកហើយ។
សម្រាប់ប្រេន New Balance ក៏បានបើកដំណើរការដាក់លក់ផលិតផលរបស់ខ្លួនជាផ្លូវការនៅផ្សារទំនើប ជីប ម៉ុង មេហ្គាម៉ល ២៧១ ជាន់ផ្ទាល់ដី ក្នុងរាជធានីភ្នំពេញ ដូចគ្នា។
ចំណុចពិសេសដែលធ្វើឱ្យយីហោ New Balance នេះកាន់តែមានឈ្មោះល្បីរន្ទឺខ្លាំងរហូតអាចឈរជើងលើទីផ្សារជាង ១០០ឆ្នាំនេះ ដោយសារតែប្រេនមួយនេះមានភាពច្នៃប្រឌិតខ្ពស់ព្រមទាំងទទួលបានទំនុកចិត្តខ្លាំងពីអតិថិជននៅក្នុងពិភពកីឡា ហើយជារៀងរាល់ឆ្នាំគឺតែងតែអភិវឌ្ឍន៍ឥតឈប់ឈរ។
លើសពីនេះទៅទៀត ក៏មានប្រេនល្បី១មកពីប្រទេសអ៊ីតាលីគឺ LIU.JO បានសម្ភោធហាង គ្រឿងបរិក្ខារសង្ហារឹមរបស់ខ្លួនដំបូងគេបង្អស់នៅក្នុងប្រទេសកម្ពុជាដោយមានវត្តមាននៅក្នុងអគារ ធីវ័ន ជាន់ទី៤ ដែលមានទីតាំង #៥៤ ផ្លូវលេខ២១៤ សង្កាត់បឹងរាំង ខណ្ឌដូនពេញ រាជធានីភ្នំពេញ នៃប្រទេសកម្ពុជា។
សូមបញ្ជាក់ថា LIU.JO គឺជាម៉ាកយីហោដែលត្រូវបានគេទទួលស្គាល់ និង ល្បីល្បាញ របស់ប្រទេសអ៊ីតាលី ក្នុងការផ្តល់នូវគ្រឿងបរិក្ខារសង្ហារឹមដែលទំនើបទាន់សម័យជាមួយនឹងរចនាបថដ៏ល្អឥតខ្ចោះសម្រាប់គេហដ្ឋានដ៏កក់ក្តៅរបស់លោកអ្នក។ ម៉ាកយីហោមួយនេះត្រូវបានបង្កើតឡើងតាំងពីឆ្នាំ១៩២៥ ហើយចាប់ផ្តើមមានកេរ្តិ៏ឈ្មោះល្បីល្បាញដោយសារម៉ាកយីហោមួយនេះបានផ្តោតសំខាន់លើគុណភាពនៃការផលិតដោយដៃផ្ទាល់ ជាមួយនឹង ការយកចិត្តទុកដាក់យ៉ាងខ្លាំងបំផុតទៅលើភាពលម្អិតនៃគ្រឿងសង្ហារឹម៕