រាជរដ្ឋាភិបាលតាមរយៈក្រសួងសាធារណការ និងដឹកជញ្ជូន ពេលនេះបាននិងកំពុងសិក្សា ដើម្បីសាងសង់ និងលើកកម្ពស់កម្រិតគុណភាពកំណាត់ផ្លូវជាតិលេខ៧ ចាប់ពីខេត្ដក្រចេះ ទៅដល់ខេត្ដស្ទឹងត្រែង ដែលមានប្រវែងសរុបជិត ១០០ គីឡូម៉ែត្រ។
ជាក់ស្ដែងកាលពីថ្ងៃទី២៨ ខែកុម្ភៈ ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជួបពិភាក្សាការងារ ជាមួយលោក Wu Guoquan ទីប្រឹក្សាសេដ្ឋកិច្ច និងពាណិជ្ជកម្ម នៃស្ថានទូតសាធារណរដ្ឋប្រជាមានិតចិនប្រចាំកម្ពុជា និងក្រុមហ៊ុន China Railway First Survey & Design Institute Group Co.,Ltd លើគម្រោងខាងលើនេះផងដែរ។
ក្នុងឱកាសនោះ ក្រុមហ៊ុនបានធ្វើបទបង្ហាញជូនឯកឧត្តមទេសរដ្ឋមន្ត្រី លើការសិក្សាពីបច្ចុប្បន្នភាពនៃផ្លូវជាតិលេខ៧ និងនីតិវិធីសំខាន់ៗក្នុងស្តារ និងលើកកម្រិតកំណាត់ផ្លូវជាតិមួយខ្សែនេះ ចាប់ពីភូមិរមាត ឃុំអូរគ្រៀង ស្រុកសំបូរ ខេត្តក្រចេះ រហូតដល់ត្រពាំងគ្រៀល ខេត្តស្ទឹងត្រែង (ព្រំប្រទល់កម្ពុជា-ឡាវ) ប្រវែងសរុប ៩៦,៦៣គីឡូម៉ែត្រ។
តាមរយៈការពិនិត្យលើបទបង្ហាញ អង្គប្រជុំក៏បានផ្លាស់ប្តូរមតិ និងលើកជាមតិយោបល់ ឱ្យក្រុមហ៊ុនទទួលបន្ទុកពិនិត្យសិក្សាលើការប្រើប្រាស់បច្ចេកទេសផ្លូវថ្នល់ និងការរៀបចំកំណត់ទទឹងផ្លូវឱ្យបានសមរម្យសម្រាប់ស្ថានភាពភូមិសាស្ត្រផ្លូវជាតិលេខ៧នេះផងដែរ ដើម្បីរៀបចំនីតិវិធីបន្តសម្រាប់ឈានដល់ការអនុវត្តគម្រោងនៅពេលខាងមុខ។ គម្រោងនេះជាគម្រោងស្ថិតក្រោមជំនួយឥតសំណងពីសាធារណរដ្ឋប្រជាមានិតចិន ដែលទទួលបន្ទុកការសិក្សាដោយក្រុមហ៊ុន China Railway First Survey & Design Institute Group Co.,Ltd។
ទាក់ទងការស្ដារ និងលើកកម្ពស់គុណភាពផ្លូវជាតិលេខ៧ នេះ កាលពីពេលថ្មីៗកន្លងទៅនេះរាជរដ្ឋាភិបាលក៏ទើបនឹងបានសម្រេចឲ្យសាងសង់ និងលើកកម្រិតគុណភាពកំណាត់ផ្លូវពីស្គន់ទៅដល់ក្រុងកំពង់ចាមផងដែរ ដែលពង្រីកពី ២ គន្លងទៅ ៤ គន្លង ខណៈការសាងសង់នឹងចាប់ផ្ដើមនៅចុងឆ្នាំនេះ៕
អត្ថបទ៖ កឹម ប៊ុនធឿន
