គិតចាប់ពីថ្ងៃចាប់ផ្ដើមរហូតដល់បច្ចុប្បន្នគម្រោងផ្លូវថ្មី១ខ្សែតភ្ជាប់ឧទ្យានជាតិ ព្រះមុនីវង្សបូកគោ ឆ្ពោះទៅកាន់ផ្លូវជាតិលេខ៤ បញ្ចាប់ការឈូសឆាយ១០០ភាគរយហើយ។ នេះបើយោងតាមការចេញផ្សាយរបស់គេហទំព័រ សុខាអចលនទ្រព្យ កាលពីថ្ងៃទី០១ ខែមេសា ឆ្នាំ២០២៣។
តាមការបញ្ជាក់ពី សុខាអចលនទ្រព្យ បានសរសេរថា "កាលពីព្រឹកថ្ងៃទី១ ខែមេសានេះ អ្នកឧកញ៉ាបណ្ឌិត សុខ គង់ ប្រធានក្រុមហ៊ុន បានអញ្ជើញចុះត្រួតពិនិត្យ ផ្លូវថ្មី១ខ្សែ តភ្ជាប់ឧទ្យានជាតិព្រះមុនីវង្សបូកគោ ឆ្ពោះទៅកាន់ផ្លូវជាតិលេខ៤ មានប្រវែងសរុប៦១គីឡូម៉ែត្រ ដែលនៅពេលនេះបានឈូសឆាយរួចរាល់ជាស្ថាពរ"។
សូមជម្រាបថា គម្រោងស្ថាបនាផ្លូវតភ្ជាប់ឧទ្យានជាតិព្រះមុនីវង្សបូកគោ មកផ្លូវជាតិលេខ៤ ត្រង់ចំណុច PK១៥៨+២០០ នេះ មានប្រវែងសរុប៦១ គីឡូម៉ែត្រ ត្រូវបានរាជរដ្ឋាភិបាល សម្រេចកាលពីដើមឆ្នាំ២០២២ ឱ្យក្រសួងរៀបចំដែនដី នគរូបនីយកម្ម និងសំណង់ សហការជាមួយអ្នកជំនួញជើងចាស់ពីររូបគឺ អ្នកឧកញ៉ាបណ្ឌិត សុខ គង់ និងអ្នកឧកញ៉ាបណ្ឌិត ម៉ុង ឬទ្ធី បើកការឈូសឆាយធ្វើផ្លូវថ្មីនេះឡើង ដើម្បីមានភាពងាយស្រួលសម្រាប់ប្រជាពលរដ្ឋក្នុងការធ្វើដំណើរ ចំណេញពេលវេលា ជួយលើកកម្ពស់សេដ្ឋកិច្ច គាំទ្រដល់ការវិនិយោគ និងទាក់ទាញផ្នែកទេសចរណ៍។
គួរបញ្ជាក់ផងដែរថា ការស្ថាបនាផ្លូវមួយខ្សែតភ្ជាប់ឧទ្យានជាតិព្រះមុនីវង្សបូកគោ ឆ្ពោះទៅកាន់ផ្លូវជាតិលេខ៤ ដែលភាគច្រើនស្ថិតក្នុងភូមិសាស្ត្រខេត្តព្រះសីហនុនេះ គឺមួយផ្នែកធំត្រូវឆ្លងកាត់ចម្ការដូងប្រេងរបស់អ្នកឧកញ៉ា ម៉ុង ឬទ្ធី ខណៈផ្លូវនេះត្រូវបាន អ្នកឧកញ៉ា សុខ គង់ ជាអ្នកទទួលរាប់រងរាល់ការចំណាយស្ថាបនា ហើយអ្នកឧកញ៉ា ម៉ុង ឬទ្ធី អគ្គនាយកក្រុមហ៊ុន ម៉ុងឬទ្ធីគ្រុប ទទួលខុសត្រូវលើការឈូសឆាយដើមដូងប្រេង ដើម្បីបើកផ្លូវ ៕
អត្ថបទដោយ៖ ឌឿក ស្រីនុត
