រាជធានីភ្នំពេញ ថ្ងៃទី៩ ខែធ្នូ ឆ្នាំ២០២៥ — ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍  និងធនាគារ វីង បានចុះអនុស្សរណៈនៃការយោគយល់ ដើម្បីពង្រីកសេវាហិរញ្ញវត្ថុ សំដៅពង្រឹងការគាំទ្រសម្រាប់សហគ្រិនក្នុងស្រុក ធុរកិច្ចបង្កើតថ្មី និងសហគ្រាសធុនមីក្រូ តូច និងមធ្យមនៅទូទាំងប្រទេសម្ពុជា។

ពិធីចុះហត្ថលេខានេះ ប្រព្រឹតិ្តទៅក្រោមអធិបតីភាព ឯកឧត្តមរដ្ឋមន្ត្រី ហែម វណ្ណឌី និងអ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃធនាគារ វីង និងជាអគ្គនាយកប្រតិបត្តិក្រុមហ៊ុន រ៉ូយ៉ាល់ គ្រុប។ កិច្ចសហប្រតិបត្តិការនេះបង្កើតជាក្របខ័ណ្ឌយុទ្ធសាស្រ្តមួយ ដែលរួមបញ្ចូល​ផលប័ត្រកម្ចី ២០០ លានដុល្លារអាមេរិក ដើម្បីជំរុញការអភិវឌ្ឍ លើកកម្ពស់ភាពប្រកួតប្រជែង និងនវានុវត្តន៍របស់ធុរកិច្ចកម្ពុជា។

ក្រោមភាពជាដៃគូនេះ ភាគីទាំងពីរនឹងសហការ ដើម្បីបង្កើនលទ្ធភាពទទួលបានហិរញ្ញប្បទាន ពង្រីកសេវាហិរញ្ញវត្ថុឌីជីថល និងបង្កើតកម្មវិធីបណ្តុះបណ្តាល ក្នុងគោលដៅកែលម្អការរៀបចំអាជីវកម្ម ពង្រឹង​ចំណេះដឹងផ្នែកឌីជីថល និងជំនាញគ្រប់គ្រងហិរញ្ញវត្ថុ។ កិច្ចសហប្រតិបត្តិការនេះក៏មានគោលបំណងគាំទ្រសហគ្រាសដែលមាននវានុវត្តន៍ និងជំរុញវិស័យអាទិភាព ស្របតាមយុទ្ធសាស្ត្រអភិវឌ្ឍន៍ជាតិផងដែរ។

ឯកឧត្តមបណ្ឌិត ញឹម ខេមរា រដ្ឋលេខាធិការប្រចាំការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា៖​ “កិច្ចសហប្រតិបត្តិការនេះមានគោលបំណងពង្រីកសេវាហិរញ្ញវត្ថុ ដើម្បីផ្តល់អត្ថប្រ​យោជន៍ដោយផ្ទាល់ដល់សហគ្រិន និងសហគ្រាសធុនមីក្រូ តូច និងមធ្យម ដែលអាចជួយឱ្យពួកគេរីកចម្រើន បង្កើនផលិតភាព និងវិនិយោគបន្ថែមលើនវានុវត្តន៍។ គោលដៅរបស់យើងគឺគាំទ្រអាជីវកម្មនៅគ្រប់ដំណាក់កាលនៃការអភិវឌ្ឍ និងជំរុញកំណើនសេដ្ឋកិច្ចកម្ពុជាសម្រាប់រយៈពេលវែង។”

ស្ថាប័នទាំងពីរក៏នឹងសហការលើកកម្ពស់ការប្រើប្រាស់សេវាទូទាត់តាមឌីជីថល និងបច្ចេកវិទ្យាហិរញ្ញវត្ថុ ដែលអាចបង្កើនប្រសិទ្ធភាព តម្លាភាព និងការឈានចូលអាជីវកម្មផ្លូវការ សម្រាប់ទាំងសហគ្រាសក្នុងវិស័យឧស្សាហកម្ម និងសហគ្រាសធុនមីក្រូ តូច និងមធ្យម។

លោកបណ្ឌិត Dmytro Kolechko អគ្គនាយកនៃធនាគារ វីង បានលើកឡើងថា៖ “ធនាគារ វីង​ មានមោទនភាព ដែលបានចាប់ដៃគូជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍   ដើម្បីគាំទ្រដល់សហគ្រិន ធុរកិច្ចបង្កើតថ្មី និងសហគ្រាសធុនមីក្រូ តូច និងមធ្យមនៅកម្ពុជា។ តាមរយៈផលប័ត្រឥណទាន ២០០ លានដុល្លារអាមេរិក យើងមានបំណងធ្វើឱ្យការផ្តល់ហិរញ្ញប្បទានកាន់តែងាយស្រួល ជំរុញនវានុវត្តន៍ និងជួយឱ្យអាជីវកម្មក្នុងស្រុករីកចម្រើន ដើម្បីកសាងសេដ្ឋកិច្ចកាន់តែរឹងមាំសម្រាប់កម្ពុជា។”

យោងតាមជំរឿនឆ្នាំ២០២២ របស់វិទ្យាស្ថានជាតិស្ថិតិនៃក្រសួងផែនការ កម្ពុជាមានសហគ្រាស​ធុន​មីក្រូ តូច និងមធ្យមចំនួន ៧៥៣.៦៧០ មូលដ្ឋាន មានកម្លាំងពលកម្មសរុបជិត ៣ លាននាក់ ក្នុងនោះមានស្រ្តី​ ៦០%។  វិស័យនេះរួមចំណែក ៦៣% នៃផលិតផលក្នុងស្រុកសរុប និងនៅតែជាវិស័យស្នូលសម្រាប់មហិច្ឆតារបស់កម្ពុជា ក្នុងការកសាងសេដ្ឋកិច្ចដែលកាន់តែមានពិពិធកម្មខ្ពស់ និងផ្អែកលើនវានុវត្តន៍។

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍  និងធនាគារ វីង នឹងបង្កើតគណៈកម្មាធិការរួមមួយ ដើម្បីរៀបចំ និងអនុវត្តផែនការ និងគំនិតផ្តួចផ្តើមសំខាន់ៗ ក្រោមអនុស្សរណៈនេះ។ សម្រាប់សហគ្រិន ធុរកិច្ចបង្កើតថ្មី និងសហគ្រាសធុនមីក្រូ តូច និងមធ្យម ដែលមានតម្រូវការហិរញ្ញប្បទានដើម្បីពង្រីកកំណើនមុខរបរ និងប្រតិបត្តិការអាជីវកម្ម ពីកម្មវិធីឥណទានចំនួន ២០០ លានដុល្លារអាមេរិកនេះ សូមអញ្ជើញទាក់ទងទៅសាខាធនាគារ វីង ឬផ្នែកសេវាអតិថិជនតាមរយៈទំព័រហ្វ៊េសបុកផ្លូវការ របស់ធនាគារ វីង។