រាជធានីភ្នំពេញ៖ កាលពីថ្ងៃទី១១ ខែកុម្ភៈ ឆ្នាំ២០២៦នេះ ធនាគារ SME និងអគ្គនាយកដ្ឋានទឹកស្អាត នៃក្រសួងឧស្សាហកម្មវិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំពិធីចុះហត្ថលេខាលើអនុស្សរណៈនៃការយោគយល់ ស្តីពី
“កិច្ចសហការជំរុញការទទួលបានហិរញ្ញប្បទាន របស់ប្រតិបត្តិករផ្តល់សេវាផ្គត់ផ្គង់ទឹកស្អាត”។
ពិធីចុះហត្ថលេខាបានប្រព្រឹត្តធ្វើនៅទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយ ឯកឧត្តម តន់ សុខជា អគ្គនាយកនៃអគ្គនាយកដ្ឋានទឹកស្អាត និងលោក ជា សុភ័ក្ត អគ្គនាយកនៃ ធនាគារ SME ក្រោមអធិបតីភាព ឯកឧត្តម អ៊ុំ សុថា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ព្រមទាំងមានការអញ្ជើញចូលរួមពីសំណាក់ថ្នាក់ដឹកនាំពាក់ព័ន្ធនៃស្ថាប័នទាំងពីរ។
អនុស្សរណៈនេះ មានគោលបំណងបង្កើនកិច្ចសហការ ដើម្បីជំរុញ និងពង្រីកលទ្ធភាពទទួលបានហិរញ្ញប្បទានដល់ប្រតិបត្តិករផ្តល់សេវាផ្គត់ផ្គង់ទឹកស្អាតទាំងអស់ក្នុងព្រះរាជាណាចក្រកម្ពុជា។ កិច្ចសហការនេះនឹងក្លាយជាកម្លាំងចលករយ៉ាងសំខាន់ក្នុងការគាំទ្រដល់ការចាប់ផ្តើមអាជីវកម្ម ការពង្រីក កែលម្អ និង/ឬស្តារប្រព័ន្ធផ្គត់ផ្គង់ទឹកស្អាតនិងប្រតិបត្តិការអាជីវកម្ម ដើម្បីចូលរួមអភិវឌ្ឍសេដ្ឋកិច្ច និងសង្គមជាតិ។
អនុស្សរណៈនៃការយោគយល់គ្នានេះ នឹងផ្តោតលើកិច្ចសហការសំខាន់ៗ មានដូចជា៖
· ផ្តល់ការគាំទ្រ និងសេវាកម្មហិរញ្ញវត្ថុ (ឥណទាន) រួមទាំងសិក្សាលទ្ធភាពក្នុងការផ្តល់លក្ខខណ្ឌពិសេស(ដូចជាអត្រាការប្រាក់អនុគ្រោះ ឬការសម្រួលនីតិវិធីឥណទាន) ដោយទទួលយកអាជ្ញាបណ្ណធ្វើអាជីវកម្មផ្គត់ផ្គង់ទឹកស្អាត ជាទ្រព្យធានា។
· ផ្សព្វផ្សាយពង្រឹងការយល់ដឹងពីនីតិវិធីក្នុងការទទួលបានហិរញ្ញប្បទាន និងការទទួលបានភាពពអនុលោមជូនដល់ប្រតិបត្តិករផ្តល់សេវាផ្គត់ផ្គង់ទឹកស្អាត។
· ចូលរួមគាំទ្រលើសកម្មភាពចាំបាច់នានា និងជំរុញលើកកម្ពស់ការអភិវឌ្ឍវិស័យទឹកស្អាត និងហិរញ្ញវត្ថុ សំដៅជំរុញការអភិវឌ្ឍសេដ្ឋកិច្ច និងសង្គម ប្រកបដោយចីរភាព ភាពធន់ និងបរិយាបន្ន។
ចាប់ពីថ្ងៃផ្សាយដំណឹងនេះ សូមប្រតិបត្តិករផ្តល់សេវាផ្គត់ផ្គង់ទឹកស្អាតទទួលបានអជ្ញាប័ណ្ណពី អគ្គនាយកដ្ឋានទឹកស្អាតនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលមានតម្រូវការឥណទាន សូមទំនាក់ទំនងមកកាន់សាខាធនាគារ SME ដែលនៅជិតលោកអ្នកបំផុតដើម្បីប្រឹក្សាយោបល់ពីគម្រោងអាជីវកម្ម ឬ ទំនាក់ទំនងមកកាន់ Hotline 096 811 1118 ឬ ហ្វេសប៊ុកផ្លូវការធនាគារ SME Bank of Cambodia។
