ដើមទុនគឺជាចំណុចសំខាន់បំផុតមួយសម្រាប់អ្នកដែលចង់ចេញរកស៊ីត្រូវគិតឱ្យបានហ្មត់ចត់មុននឹងចាប់ផ្តើមព្រោះបើយើងគ្មានលុយធ្វើទេ អាជីវកម្មរបស់អ្នក មិនអាចលេចចេញជារូបរាងបានទេ ពោលគឺបានត្រឹមតែស្រមៃ។​ តែយ៉ាងណាមិញ បើក្រឡេកមកមើលបុរសរូបនេះវិញចាប់ផ្តើមរកស៊ីតាមក្តីស្រមៃពីដើមទុនតិចតួចខ្លាំងមែនទែន ដោយលោកបានច្នៃម៉ូតូលក់កាហ្វេរហូតអាចទាញចំណូល៩០០$ក្នុងមួយខែ។

ថ្លែងប្រាប់ Bangkok Foodie​ លោក Ratchapruek ជាអ្នកលក់កាហ្វេដឹកម៉ូតូ Coffee Cub បានឱ្យដឹងថា មូលហេតុដែលលោកចាប់ផ្តើមធ្វើអាជីវកម្មនេះឡើងព្រោះ លោកជាមនុស្សម្នាក់ដែលស្រលាញ់ និងចូលចិត្តវិស័យកាហ្វេ ប៉ុន្តែដោយសារតែពំុសូវមានថវិការ លោកមិនអាចបើកហាងបានធំដូចគេនោះទេ ដូច្នេះហើយទើបលោកសម្រេចចិត្តធ្វើពីតូចទៅធំដោយច្នៃម៉ូតូធ្វើហាងកាហ្វេនេះឡើង។ លោកបានបន្ថែមថា ការខ្វះលុយមិនមែនជាឧបសគ្គចម្បងរបស់លោក ហើយក៏មិនអាចបញ្ឈប់ក្តីសុបិនចង់បើកហាងកាហ្វេផ្ទាល់ខ្លួនរបស់លោកបានទេ ដោយទុនដំបូងរបស់លោកគឺចាប់ផ្តើមពីម៉ូតូចាស់នេះឯង រហូតអាចឆ្ពោះទៅរកគោលដៅធំ។

ជាមួយគ្នានេះដែរលោកអាចលក់ដាច់ពីចន្លោះពី៣០កែវឡើងទៅ ដោយក្នុងមួយកែវមានតម្លៃ១ដុល្លារ ពោលគឺលោកអាចរកបានចំណូលជាង៩០០ដុល្លារទៅក្នុងមួយខែ។ តើមូលហេតុអ្វីខ្លះទើបធ្វើឱ្យយីហោរបស់លោកអាចរកចំណូលក្បែរពាន់ដុល្លារបែបនេះ?

១. មានការច្នៃប្រឌិត៖ ដោយសាតែនៅក្នុងប្រទេសថៃ​​​ មានតែលោកដំបូងគេដែលបានធ្វើវា ដូច្នេះហើយលោកបានទាញចំណាប់អារម្មណ៍ច្រើនពីសំណាក់អតិថិជន ដែលជាហេតុធ្វើប្រេនរបស់លោកឆាប់មានអ្នកស្គាល់ច្រើន។

២. តម្លៃ៖ បើនិយាយអំពីតម្លៃវិញ គឺលោកលក់ធូរមែនទែន ហើយរសជាតិក៏មិនចាញ់ហាងប្រេនធំថែមទៀត ដូច្នេះហើយមនុស្សមិនខ្លាចក្នុងការចំណាយលុយទិញឡើយ។ ហើយមូលហេតុដែលលោកអាចលក់ធូរហើយនៅតែចំណេញព្រោះលោក​ មិនត្រូវបានផាត់ថ្លៃជួលហាង​ ទឹកភ្លើង និងបុគ្គលិកដូចហាងធំៗឡើយ ដូច្នេះហើយទោះលក់តម្លៃថោក ក៏នៅតែចំណេញ។

៣. ស្តង់ដា៖ បើទោះបីជាលក់លើម៉ូតូពិតមែន ប៉ុន្តែកាហ្វេរបស់លោក មានដាក់ឈ្មោះត្រឹមត្រូវ មិនចាញ់ការហ្វេប្រេនធំៗឡើយ។

៤. ប្លែក៖ ត្រង់ចំណុចនេះ លោកបានលើកឡើងថា មិត្តស្រីរបស់លោកចូលចិត្តគូររូប ដូច្នេះហើយនាងបានគូររូបតុកាតាខ្យូតៗជាច្រើននៅលើកែវ ដែលធ្វើឱ្យភ្ញៀវចាំអ៊ុតកែវរបស់ពួកគេ ជាមួយនឹងទឹកមុខរំភើបថែមទៀត។ ចំណុចតូចទាំងនេះហើយ ដែលធ្វើឱ្យយីហោរបស់លោកកាន់់តែទាក់ទាញ និងមានប្រជាប្រិយភាពខ្លាំងដល់សព្វថ្ងៃ៕