ធ្លាប់ឆ្ងល់ទេ អ្នកខ្លះប្រាក់ខែ៣០០ដុល្លារ តែអាចចិញ្ចឹមខ្លួនរស់ស្រួល ចួនថ្ងៃខ្លះផ្តាច់ពីមាត់ពីកផ្ញើទៅគ្រួសារនៅឯស្រុកទៀតក៏មាន មិនភ័យរឿងខ្មោចលងចុងខែ រស់ធូរចិត្តមិនតឹងទ្រូង ហើយពេលមកធ្វើការម្តងៗ ទីនុយសមសួន ញញឹមពព្រាយរាយមន្តស្នេហ៍ ហាក់ពុំមានទុក្ខកង្វល់អ្វីឡើយ។ រីឯអ្នកខ្លះរកបាន ៣០០ដុល្លារ/១ខែ ក៏ចាយមិនគ្រប់ ឥឡូវរកបាន ៥០០ដុល្លារ/១ខែក៏ចាយមិនគ្រាន់ ដល់ថ្នាក់ពេលខ្លះឆក់កន្តៀតខ្ចីបុលគេដោះកូយចុងខែទៀតក៏មាន។
តោះ! មកស្គាល់ពីរបៀបគ្រប់គ្រងការចំណាយងាយៗតាមក្បួន ៥០/៣០/២០។ ជាដំបូងត្រូវគិតបែងចែកលុយ១០០% ជាបីចំណែកសិនគឺ ៥០% ៣០% និង២០%នៃចំនួនលុយសរុបរបស់អ្នក។ ឧទាហរណ៍៖ បើអ្នកមានប្រាក់ ៣០០ដុល្លារក្នុងមួយខែ នោះអ្នកត្រូវចែកជាបីចំណែកគឺ ៥០%=១៥០ដុល្លារ, ៣០%=៩០ដុល្លារ និង ២០%=៦០ដុល្លារ។ ៥០%លើតម្រូវការចាំបាច់ ៣០%លើការចំណាយផ្សេងៗ និងទុក ២០%សម្រាប់ការសន្សំ។
- ៣០% ចំណាយមិនចាំបាច់៖ គឺជាអ្វីដែលអ្នកបានចំណាយលើរបស់មិនសំខាន់ខ្លាំងដែលមានន័យថា ទោះអ្នកមិនចំណាយក៏អាចរស់រានបានដែរ។ ការចំណាយមិនចាំបាច់នេះរួមបញ្ចូល៖ ភាពយន្ត, អាហារពេលល្ងាចនៅខាងក្រៅ, កាបូបថ្មី, សំបុត្រទៅព្រឹត្តិការណ៍កីឡា, វិស្សមកាល, ទៅហាងកាហ្វេប្រេនៗ។ល។ អ្វីក៏ដោយនៅក្នុងប្រភេទដែលមិនចាំបាច់ គឺអ្នកអាចជំនួយវាបាន ឧទាហរណ៍៖ បើអ្នកត្រូវការចំណាយដើម្បីចូលក្លឹបហាត់ប្រាណ អ្នកអាចជំនួសមកវិញដោយការហាត់ប្រាណនៅផ្ទះជាដើម។
- ២០% ទុកសន្សំ៖ ជាចុងក្រោយអ្នកគួរបែងចែក ២០%នៃថវិការបស់អ្នកទៅគណនីសន្សំ។ អ្នកគួរតែមានប្រាក់សន្សំបម្រុងទុកយ៉ាងតិចបីខែ ក្នុងករណីហេតុការណ៍ណាមួយកើតឡើងដោយមិនបានដឹងមុន។ ពិតណាស់ ការសន្សំប្រាក់អាចជារឿងដ៏ពិបាកធ្វើមួយ ជាពិសេសនៅពេលដែលត្រូវការចំណាយលើតម្រូវការជាច្រើន។ ជីវិតយើងអាចជួបរឿងភ្ញាក់ផ្អើលច្រើនណាស់ ហើយពេលខ្លះមានរឿងមួយចំនួនកើតឡើងដោយស្មានមិនដល់ដូចជា វិបត្តិកូវីដ១៩នេះជាដើម ឬអាចយកលុយនោះទៅសម្រេចគោលដៅអ្វីមួយដែលអ្នកចង់បាន។ ដូច្នេះការចេះត្រៀមខ្លួនទុកមុន ទើបយើងមិនដាច់បាយចុងខែ។
ក្នុងនោះ អ្នកឧកញ៉ា សុខ គង់ សហគ្រិនចាស់វស្សាមួយរូបដែលចាប់ផ្ដើមចេញរកស៊ីតាំងពីមានលុយនៅក្នុងដៃតែ៥០ដុល្លារ រហូតក្លាយជាមហាសេដ្ឋីប្រចាំស្រុកខ្មែរ និងកាន់កាប់ក្រុមហ៊ុនធំៗ២គឺ ក្រុមហ៊ុនស៊ូគីម៉ិចអ៊ិនវេសមិនគ្រុប និងសុខាគ្រុប រួមទាំងអាជីវកម្មធំៗមួយចំនួនទៀត បានលើកឡើងថា៖ «ប្រាក់ខែ៣០០ដុល្លារ ខ្ញុំឃើញគេចូលហាងប្រេនៗ ផឹកស៊ីស្ទើរាល់ថ្ងៃ។ ខ្ញុំជាអ្នកក្រ ជាអ្នកធ្លាប់មានលុយក្នុងដៃ ជាមនុស្សដៃទូលាយមួយរូប តែចុងក្រោយហោប៉ៅក៏ទូលាយមែន រាក់ៗទៅ គោលដៅកាន់តែឆ្ងាយ។ ទើបពេលខ្ញុំឃើញគេផុសចូលហាងប្រេនៗញឹកញាប់ ខ្ញុំចេះតែលួចញញឹម ហើយគិតថា របស់ខ្លះ មិនឆ្ងាញ់ទេ ក្នុងកាលទេសៈយើងខ្វះខាត នៅធ្វើការឱ្យគេ ចាយសល់ថ្ងៃ មិនទាន់រស់បានប្រសើរជាដើម។ យើងអាចលួចញុំាម្ដងម្កាលបាន តែមិនបាច់ផុសក៏បានដែរ (តែពេលខ្លះផុសទៅ ជារង្វាន់ជីវិត)»។
យ៉ាងណាមិញប្រាក់ខែតិច ឬច្រើន ចំណូលទាប ឬខ្ពស់ គ្រាន់តែជាផ្នែកមួយ ប៉ុន្តែផ្នែកសំខាន់បំផុតមួយទៀតគឺឥរិយាបថក្នុងការចាត់ចែង ទុកដាក់ និងប្រើលុយទាំងនោះ។ ចេះរក រៀនទុក ចេះត្បិតត្បៀត តែមិនរងសម្ពាធ ឆ្លៀតយកលុយទាំងនោះទៅបង្កាត់បង្កើតកូនចៅទៀត ហោប៉ៅមិនជ្រាបជីវភាពនឹងធូរធារ៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
