(ភ្នំពេញ)៖ ក្រុមហ៊ុន LYNK & CO Automotive (Cambodia) បានរៀបចំធ្វើពិធីចុះកិច្ចព្រមព្រៀងជាផ្លូវការមួយនៅថ្ងៃទី ៧ ខែមេសា ឆ្នាំ ២០២៥ ដើម្បីនាំចូលរថយន្តទំនើបម៉ាក LYNK & CO មកកាន់ទីផ្សារកម្ពុជា។ ព្រឹត្តិការណ៍នេះត្រូវបានប្រារព្ធឡើងនៅសណ្ឋាគារ សូហ្វីតែល ភ្នំពេញ ភូគីត្រា។

ពិធីចុះកិច្ចព្រមព្រៀងនេះគឺជាព្រឹត្តិការណ៍ដ៏សំខាន់មួយ ដែលបានធ្វើឡើងក្រោមវត្តមានដ៏ខ្ពង់ខ្ពស់របស់ឯកឧត្តម ពៅ ម៉ាលី រដ្ឋលេខាធិការ ក្រសួងសាធារណៈការ និងដឹកជញ្ជូន ដែលជាតំណាងឱ្យលោក ប៉េង ពោធិ៍នា រដ្ឋមន្ត្រីក្រសួងសាធារណៈការ និងដឹកជញ្ជូន ក៏ដូចជា លោកអ្នកឧកញ៉ា លី ហួរ ប្រធានក្រុមប្រឹក្សាភិបាល នៃក្រុមហ៊ុន លី ហួរ គ្រុប។ ភ្ញៀវកិត្តិយសជាតិ និងអន្តរជាតិជាច្រើននាក់ក៏បានចូលរួមក្នុងកម្មវិធីនេះផងដែរ។

នៅក្នុងឱកាសនោះ អ្នកឧកញ៉ា លី សុភ័ក្ត ប្រធានក្រុមប្រឹក្សាភិបាល LYNK & CO Automotive (Cambodia) បានមានប្រសាសន៍ថា ការមកដល់នៃរថយន្តម៉ាក LYNK & CO នឹងចូលរួមចំណែកយ៉ាងសំខាន់ដល់ចក្ខុវិស័យរបស់រាជរដ្ឋាភិបាលកម្ពុជា ក្នុងការលើកកម្ពស់ការដឹកជញ្ជូនដែលមិនប៉ះពាល់ដល់បរិស្ថាន និងនិរន្តរភាព។

អ្នកឧកញ៉ាបានបន្ថែមទៀតថា «ថ្ងៃនេះគឺជាចំណុចចាប់ផ្តើមដ៏មានសារៈសំខាន់មួយ មិនត្រឹមតែសម្រាប់ក្រុមហ៊ុនរបស់យើងប៉ុណ្ណោះទេ ប៉ុន្តែក៏ជាជំហានឆ្ពោះទៅរកបរិស្ថានស្អាតជាងមុន និងអនាគតដ៏មាននិរន្តរភាពសម្រាប់ប្រទេសកម្ពុជាផងដែរ»។

ឯកឧត្តម ពៅ ម៉ាលី រដ្ឋលេខាធិការ ក្រសួងសាធារណៈការ និងដឹកជញ្ជូន ក៏បានសង្កត់ធ្ងន់ថា ព្រឹត្តិការណ៍នេះបានបង្ហាញយ៉ាងច្បាស់អំពីការប្តេជ្ញាចិត្តរបស់រាជរដ្ឋាភិបាលកម្ពុជា ក្រោមការដឹកនាំដ៏ប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការជំរុញឱ្យវិស័យដឹកជញ្ជូន និងសេដ្ឋកិច្ចជាតិមានការរីកចម្រើន។

មន្ត្រីជាន់ខ្ពស់នៃក្រសួងសាធារណៈការ និងដឹកជញ្ជូនបានបញ្ជាក់បន្ថែមថា ការនាំចូលរថយន្តម៉ាក Lynk & Co មិនត្រឹមតែផ្តល់ភាពងាយស្រួល និងសុវត្ថិភាពដល់ប្រជាពលរដ្ឋប៉ុណ្ណោះទេ ថែមទាំងជួយកាត់បន្ថយផលប៉ះពាល់ដល់បរិស្ថាន តាមរយៈបច្ចេកវិទ្យាទំនើបដែលបញ្ចេញឧស្ម័នតិចតួចផងដែរ។

ស្របពេលជាមួយគ្នានោះ លោក ប្រ៊ូស លី (Mr. Bruce Lee) ប្រធានតំបន់អាស៊ីអាគ្នេយ៍ នៃម៉ាក LYNK & CO បានថ្លែងថា កម្ពុជាត្រូវបានជ្រើសរើសដោយសារសក្តានុពលសេដ្ឋកិច្ចដ៏រឹងមាំ និងប្រជាជនវ័យក្មេងដែលកំពុងតែស្វែងយល់ និងទទួលយកបច្ចេកវិទ្យាថ្មីៗ។ លោកបានបញ្ជាក់ទៀតថា «កម្ពុជាមានកំណើនសេដ្ឋកិច្ចជាង ៦,៨% ជាបន្តបន្ទាប់ក្នុងរយៈពេល ៥ ឆ្នាំកន្លងមកនេះ ហើយប្រជាជន ៦៥% មានអាយុក្រោម ៣០ ឆ្នាំ ដែលជាកម្លាំងចលករដ៏សំខាន់សម្រាប់ពួកយើង»។

រថយន្តម៉ាក LYNK & CO ដែលត្រូវបានបង្ហាញនៅក្នុងព្រឹត្តិការណ៍នេះ រួមមានម៉ូដែល LYNK & CO 06 EM-P ដែលអាចបើកបរបានចម្ងាយរហូតដល់ ១១៥០ គីឡូម៉ែត្រ និងម៉ូដែល LYNK & CO 08 EM-P ដែលអាចបើកបរបានចម្ងាយសរុប ១២០០ គីឡូម៉ែត្រ។ ម៉ូដែលទាំងនេះត្រូវបានរចនាឡើងយ៉ាងពិសេស ដើម្បីបំពេញតាមតម្រូវការរបស់ប្រជាជនកម្ពុជា ដោយផ្តោតសំខាន់លើបច្ចេកវិទ្យាដែលទំនើប និងទាន់សម័យ សុវត្ថិភាពខ្ពស់ និងតម្លៃសមរម្យ។

លើសពីនេះទៅទៀត ក្រុមហ៊ុនបានផ្តល់ជូននូវការធានាដ៏ល្អបំផុតមួយនៅក្នុងឧស្សាហកម្មរថយន្តអគ្គិសនី ដោយរថយន្តគ្រប់ម៉ូដែលទាំងអស់នឹងទទួលបានការធានារយៈពេល ៥ ឆ្នាំ ឬ ១០០,០០០ គីឡូម៉ែត្រ និងការធានាលើសមាសធាតុអគ្គិសនីសំខាន់ៗ រយៈពេល ៨ ឆ្នាំ ឬ ១៥០,០០០ គីឡូម៉ែត្រ ដើម្បីធានាបាននូវទំនុកចិត្តខ្ពស់បំផុតសម្រាប់អតិថិជន។

LYNK & CO Automotive (Cambodia) បានប្តេជ្ញាចិត្តក្នុងការសហការជាមួយដៃគូក្នុងស្រុក ដើម្បីបង្កើតស្ថានីយ៍សាកថ្មឱ្យបានទូទាំងប្រទេស ដែលនឹងជួយលើកកម្ពស់ការប្រើប្រាស់រថយន្តអគ្គិសនី និងបង្កើតឱកាសការងារថ្មីៗ ដូចជាការដំឡើង ថែទាំ និងសេវាកម្មជួសជុលជាដើម។ លើសពីនេះ ទីតាំងតាំងបង្ហាញរថយន្តម៉ាក LYNK & CO ដំបូងគេ នឹងចាប់ផ្តើមដំណើរការនៅរាជធានីភ្នំពេញ នៅក្នុងខែឧសភា ឆ្នាំ ២០២៥ ហើយក្រុមហ៊ុនក៏មានគម្រោងពង្រីកទៅកាន់ខេត្តសៀមរាប និងខេត្តព្រះសីហនុ ក្នុងរយៈពេល ២ ឆ្នាំខាងមុខផងដែរ។

គួរឱ្យដឹងផងដែរថា កម្មវិធីនេះត្រូវបានបញ្ចប់ដោយការចុះហត្ថលេខាជាផ្លូវការលើកិច្ចព្រមព្រៀងរវាង អ្នកឧកញ៉ា លី សុភ័ក្ត ប្រធានក្រុមប្រឹក្សាភិបាល LYNK & CO Automotive Cambodia និង លោក ប្រ៊ូស លី (Mr. Bruce Lee) ប្រធានតំបន់អាស៊ីអាគ្នេយ៍ ម៉ាក LYNK & CO ក្រោមអធិបតីភាព លោក ពៅ ម៉ាលី រដ្ឋលេខាធិការ ក្រសួងសាធារណៈការ និងដឹកជញ្ជូន ដែលជាតំណាងឱ្យលោក ប៉េង ពោធិ៍នា រដ្ឋមន្ត្រីក្រសួងសាធារណៈការ និងដឹកជញ្ជូន និងលោកអ្នកឧកញ៉ា លី ហួរ ប្រធានក្រុមប្រឹក្សាភិបាលនៃក្រុមហ៊ុន លី ហួរ គ្រុប ដែលបានចូលរួមជាសាក្សីកិត្តិយស។

LYNK & CO Automotive (Cambodia) បានសន្យាថានឹងនាំមកនូវបទពិសោធន៍ថ្មីនៃការបើកបរ ដែលមិនត្រឹមតែផ្តល់ភាពងាយស្រួលប៉ុណ្ណោះទេ ថែមទាំងចូលរួមចំណែកដល់ការអភិវឌ្ឍសេដ្ឋកិច្ច និងបរិស្ថានបៃតងនៅក្នុងប្រទេសកម្ពុជាផងដែរ៕