គ្រាន់តែនិយាយពីឈ្មោះលីពូ មិត្តអ្នកអានប្រាកដជានឹកឃើញភ្លាមទៅដល់ខ្សែភាពយន្តបុរាណចិនបែបប្រវត្តិសាស្ត្រ Three Kingdoms ដែលទស្សនិកជនខ្មែរហៅថា សាមកុក (នគរទាំងបី)។ ភាពយន្តភាគនេះត្រូវបានផលិតជាច្រើនលើកច្រើនសាររួចមកហើយ ខណៈតួអង្គក៏មានការផ្លាស់ប្ដូររហូតផងដែរ។ ថ្ងៃនេះយើងនឹងជីកកកាយប្រវត្តិក្រៅឆាក របស់តួអង្គបុរសសំបូរស្នេហ៍លីពូ ថតកាលពីឆ្នាំ២០១០ ដែលដឹកនាំដោយលោក Gao Xixi របស់ស្ថានីយទូរទស្សន៍ចិនដ៏ល្បីគឺ CCTV មិនត្រឹមតែមានរូបសម្បត្តិស្រស់សង្ហាទេ ថែមទាំងជាសេដ្ឋីលាក់មុខទៀតផង។
មេទ័ពស្មោះស្នេហ៍ជិះសេះទន្សាយក្រហមកាន់លំពែងចូលសមរភូមិមិនញញើតសត្រូវតួអង្គលីពូ មានឈ្មោះពិតថា Peter Ho (何润东)កើតនៅថ្ងៃទី១៣ ខែកញ្ញា ឆ្នាំ១៩៧៥ លើទឹកដីរដ្ឋកាលីហ្វ័រញ៉ា សហរដ្ឋអាមេរិក ដែលមានឪពុកម្តាយមកពីហុងកុង។ ក្រោយចាប់កំណើត លោកត្រូវបានផ្លាស់ទីលំនៅរួមទាំងធំធាត់នៅកោះតៃវ៉ាន់ និងប្រទេសកាណាដាវិញ។
លុះចម្រើនវ័យពេញកំលោះយុវជន Peter Ho បានសិក្សានៅមហាវិទ្យាល័យសិល្បៈ និងរចនា Ontario និងបានចាប់ផ្តើមអាជីពជាអ្នកចម្រៀង បន្ទាប់ពីលោកត្រូវបានផ្តល់ជូនកិច្ចព្រមព្រៀងកុងត្រានៅក្នុងបារខារ៉ាអូខេមួយ។ ដំណើរជីវិតលើវិថីសិល្បៈកាន់តែបោះជំហានទៅមុខនៅឆ្នាំ១៩៩៨ លោកបានចេញអាល់ប៊ុមដំបូងឈ្មោះ Miss You Love in Taiwan។
ចាប់តាំងពីការបង្ហាញខ្លួនដំបូងក្នុងឆ្នាំ១៩៩៨ លោក Peter Ho បានចេញអាល់ប៊ុមចំនួន ៧ និងបានសម្តែងក្នុងខ្សែភាពយន្ត និងរឿងភាគទូរទស្សន៍ជាង ២៥រឿង។ ចំពោះខ្សែភាពយន្តដែលធ្វើឲ្យលោកកាន់តែមានគេស្គាល់ច្រើន និងកេរ្តិ៍ឈ្មោះល្បីល្បាញខ្លាំងលើឆាកអន្តរជាតិរួមមានដូចជា Crouching Tiger, Hidden Dragon, Wind and Cloud, One Meter Sunshine, Goddess of Mercy, The Young Wrriors, Three Kingdoms, King’s War, Summer’s Desire និងរឿង Nothing Gold Can Stay ជាដើម។
បច្ចុប្បន្នតួអង្គលីពូ ឆ្នាំ២០១០ ឬលោក Peter Ho គឺជាតារាចម្រៀង តារាសម្តែង និងតារាម៉ូដែលហុងកុង-តៃវ៉ាន់។ លោកត្រូវបានគេប៉ានស្មានថាមានទ្រព្យសម្បត្តិយ៉ាងហោចណាស់ ២៧.៩លានដុល្លារ គិតត្រឹមថ្ងៃទី១០ ខែឧសភា ឆ្នាំ២០២២ ចេញផ្សាយដោយគេហទំព័រ Wallmine.com។ ជីវិតនៅលីវរបស់តារាសម្តែងរូបនេះត្រូវបានបញ្ចប់ក្នុងឆ្នាំ២០១៦ ដោយបានរៀបការជាមួយមិត្តស្រីមិនមែនជាអ្នកសិល្បៈដូចជារូបលោកនោះទេ។
ខាងក្រោមនេះគឺជាទស្សនៈកំពូលទាំង៥ របស់មេទ័ពជើងខ្លាំង លីពូ៖
១/. ទ័ពខ្លាំង មិនសង្កត់ម្ចាស់
២/. កូនប្រុសទ្រូងប្រាំហត្ថ ទីណាក៏អាចនៅបានដែរ
៣/. បើឲ្យរស់នៅធ្វើមនុស្សកំសាក ពិបាកជាងស្លាប់ទៅទៀត
៤/. នៅពេលនរណាម្នាក់កើតមកដោយភាពអស្ចារ្យ នោះគេមិនអាចអត់ធ្មត់នៅពីក្រោមការគៀបសង្កត់ពីអ្នកដទៃបានឡើយ
៥/. ស្រីល្អមានច្រើន តែប្រពន្ធល្អវិញកម្រនឹងរកបានណាស់៕
ទឹកចិត្តស្មោះស្ម័គ្របងប្អូនទាំង៣បេះដូងតែ១ ប្រវត្តិក្រៅឆាកតួអង្គ៣រូបនេះអស្ចារ្យជាងក្នុងកុនទៅទៀត
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ក្រដាស១សន្លឹក»
ទំនាក់ទំនងតាមរយៈ៖ Facebook Page: Kan Dara ឬ Telegram: 0964997366
