មិនថាមនុស្សឆ្លាត ឬល្ងង់ តែការឧស្សាហ៍ដោយមិនដឹងកាលៈទេសៈ ឧស្សាហ៍ធ្វើអ្វីខុសៗ ម្ដងហើយម្ដងទៀត នឹងអាចបង្ករការខាតបង់ជាច្រើនទម្រាំរកផលប្រយោជន៍បាន។ ខាងក្រោមនេះគឺជា ភាពឧស្សាហ៍ខុសក្បួនទាំង៤ ទស្សនវិទូចិន ខុង ជឺ បានពោលផ្តាំកាលពីជាងពីរពាន់ឆ្នាំមុនថា ទោះខំយ៉ាងណាក៏នៅតែក្រលំបាកដែរ៖
១/. ឧស្សាហ៍ធ្វើគ្រប់យ៉ាង តែខ្ជិលគិត
ការខំប្រឹងធ្វើការដោយគិតសំខាន់លើបរិមាណដោយមិនប្រើខួរក្បាល គ្មានផ្លូវអាចឲ្យសម្រេចការងារដែលមានគុណភាពបានទេ។ សាកល្បងផ្លាស់ប្ដូរវិធីធ្វើការជាថ្មី គិតឲ្យបានល្អិតល្អន់មុនចុះដៃធ្វើ និងត្រូវចេះរៀបលំដាប់ការងារណាសំខាន់ៗមុន នោះការងារអ្នកនឹងអាចសម្រេចបានលឿនជាងមុនឆ្ងាយតែម្ដង ថែមទាំងមានគុណភាពផងដែរ មិនមែនចេះតែធ្វើៗទៅ ដោយមិនមានរៀបចំគម្រោងច្បាស់លាស់នោះទេ។
២/. ឧស្សាហ៍នៅដល់យប់ជ្រៅជ្រុល តែមិនធ្វើរឿងមានប្រយោជន៍
ការធ្វើការរំលងអាធ្រាត្រ ចូលគេងយប់ជ្រៅ ហើយប្រញាប់ក្រោក គឺនឹងបំផ្លាញគំនិតច្នៃប្រឌិតថ្មីៗ ព្រោះខួរក្បាលដែលមិនស្រស់ថ្លា នឹងមិនអាចគិតអ្វីចេញនោះទេ។ មិនត្រឹមតែបំផ្លាញខួរក្បាល ប៉ុន្តែការធ្វើការមិនស្គាល់ថ្ងៃមិនស្គាល់យប់នឹងធ្វើឲ្យសុខភាពយើងទ្រុឌទ្រោមដូចគ្នា។
៣/. ឧស្សាហ៍ធ្វើរឿងដដែលៗ តែជីវិតមិនរីកចម្រើន
អ្នកធ្វើការភាគច្រើនឈ្ងោកធ្វើការងារដដែលៗ នៅក្នុងការិយាល័យមួយថ្ងៃៗជិត១០ម៉ោង ដោយមិនធ្លាប់សួរខ្លួនឯងថា អ្វីដែលកំពុងធ្វើរាល់ថ្ងៃនេះ មានប្រយោជន៍ដល់ជីវិតប៉ុណ្ណា ធ្វើឲ្យខ្លួនឯងរីកចម្រើនឬក៏អត់ និងផ្ដល់អ្វីខ្លះដល់សង្គម? ការប្រឹងប្រែងធ្វើការងារដដែលៗ ដែលមិនផ្ដល់ភាពរីកចម្រើនអ្វីសោះដល់ជីវិត ក៏មិនអាចនាំអ្នកទៅរកជោគជ័យបានដែរ។
៤/. ឧស្សាហ៍សព្វគ្រប់កិច្ចការ តែចោលគ្រួសារ
គ្រួសារត្រូវស្ថិតនៅលំដាប់ទីមួយជានិច្ច។ កុំបណ្ដោយឲ្យការងារបំផ្លាញជីវិតអ្នក។ ភាពរីកចម្រើនផ្នែកការងារ អាចសំខាន់សម្រាប់មនុស្សជាច្រើន ប៉ុន្តែបើគិតឲ្យដិតដល់នោះ វាមិនអាចប្រៀបធៀបជាមួយការមានគ្រួសារដែលកក់ក្ដៅ គួរឲ្យស្រឡាញ់ ព្រោះមិនថាពេលសុខ ឬទុក្ខ ពួកគេគឺជាអ្នកដែលអាចនៅក្បែរយើងជានិច្ច។
យ៉ាងណាមិញ ភាពឧស្សាហ៍ព្យាយាមពុំមែនសុទ្ធតែត្រឹមត្រូវទាំងអស់នោះទេ ឧស្សាហ៍ត្រូវកាលៈទេសៈ ត្រូវបែបផែន ទើបមិននាំឲ្យខុសខាតប្រយោជន៍ ហើយជីវិតរីកចម្រើន កើនទ្រព្យ សម្បូរញាតិ រស់នៅសុខក្សេមក្សាន្ត៕
អត្ថបទដោយ៖ កាន់ ដារ៉ា (ស្មេរពនេចរ) សៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម