រមណីយដ្ឋានប្រវត្តិសាស្ត្ររបស់កម្ពុជា ប្រាសាទកោះកេរ ត្រូវបានទស្សនាវដ្តីបរទេស FODOR’s Travel កំណត់ជាតំបន់ទេសចរណ៍មួយក្នុងចំណោមទីតាំងដទៃទៀតនៃបញ្ជីទាំង២៥ ជាកន្លែងដែលអ្នកទេសចរគួរតែមកលេងកម្សាន្ត ក្នុងឆ្នាំ២០២៥។ នេះបើតាមការឱ្យដឹងពីក្រសួងវប្បធម៌និងវិចិត្រសិល្បៈ។
ប្រាសាទកោះកេរ មានផ្ទៃដីទំហំជាង ៨,៧០០ហិកតា ស្ថិតនៅក្នុងភូមិស្រយ៉ង់ខាងជើង ឃុំស្រយ៉ង់ ស្រុកគូលែន ខេត្តព្រះវិហារ តំបន់ប្រាសាទដ៏វិសុទ្ធនេះមានចម្ងាយប្រមាណ ១០០គីឡូម៉ែត្រពីទីរួមខេត្តសៀមរាប និងមានចម្ងាយប្រមាណ ៤៦០គីឡូម៉ែត្រពីរាជធានីភ្នំពេញ។
បច្ចុប្បន្ន ប្រាសាទ កោះកែរ ត្រូវបានចាត់ទុកថា ជាប្រាសាទភ្នំមានកំពស់៣៥ម៉ែត្រ ចែកចេញជា៧ថ្នាក់ដូចមហាចេតីយពីរ៉ាមីត បែរមុខទៅទិសខាងលិចទៅរករាជធានីអង្គរ។
មានជណ្តើរចំនួន៥៥កាំ (សព្វថ្ងៃមិនអាចប្រើបាន) លើកំពូលមានរូបចម្លាក់ទម្រព្រះសេវលិង្គ ហើយចំកណ្តាលមានមាត់អណ្តូងប្រវែង៤ម៉ែត្រ៤ជ្រុងចុះទៅក្រោម តែមិនអាចមើលឃើញដល់បាតព្រោះដុះលុបជិតអស់។
នៅជុំវិញប្រាសាទនេះ ក្រុមស្រាវជ្រាវកំពុងរុករកមានប្រាសាទតូចៗចំនួន៩៦បន្ថែមទៀត នៅដាច់ៗពីគ្នា ដែលមានចម្ងាយពីគ្នាពី១គីឡូម៉ែត្រ ទៅ៣ឬ៤គីឡូម៉ែត្រ ខណៈប្រាសាទខ្លះបានបាក់បែកបាត់រូបរាង និងនៅកប់ក្នុងដីជាច្រើនទៀត។
គួរជម្រាបដែរថាបច្ចុប្បន្នប្រាសាទកោះកេរ បានចុះបញ្ជីជាបេតិកភណ្ឌពិភពលោករបស់អង្គការយូណេស្កូកាលពីថ្ងៃទី១៧ ខែកញ្ញា ឆ្នាំ២០២៣ កន្លងទៅ៕
អត្ថបទដោយ៖ ពីង ជូអេង
