មែនទែនទៅនៅពេលចង់លក់ដីម្ដងៗ គឺត្រូវប្រើពេលវេលាយូរទម្រាំលក់ដាច់ មិនដូចការលក់ទ្រព្យសម្បត្តិផ្សេងៗដូចជា ម៉ូតូ ឡាន មាសប្រាក់ឡើយ ដោយសារដីមិនងាយមានតម្រូវការទៅលើការទិញ ជាពិសេសទាមទារឲ្យអ្នកទិញចំណាយថវិកាច្រើន ហើយត្រូវគិតគូរឱ្យបានល្អិតល្អន់ មុននឹងសម្រេចចិត្តទិញ។ យ៉ាងណាទាក់ទងបញ្ហានេះដែរ អ្នកជំនាញមួយរូប បានបង្ហើបយុទ្ធសាស្រ្ដមួយចំនួនដែលអ្នកលក់ដីបន្ទាន់ៗគួរប្រើ ដើម្បីអាចលក់ឆាប់ដាច់ និងបានផលចំណេញ។
ថ្លែងប្រាប់ Business Cambodia លោកឧកញ៉ាបណ្ឌិត គីម ហ៊ាង ដែលជាអ្នកជំនាញផ្នែកអចលនទ្រព្យនៅកម្ពុជា បានបង្ហើបក្បួនលក់ចំនួន៣ ដែលអាចធ្វើឲ្យលក់ដីដាច់លឿន៖
១. ត្រូវស្គាល់តម្លៃក្នុងទីផ្សារ
ត្រូវរៀនមើលហ៊ាងឆេងទីផ្សារគេ លក់ប៉ុនណាងាកមកយើងលក់ថ្លៃជាងគេខ្លាំងអត់។ ការរកបានដីមានតម្លៃទាបជាងទីផ្សារ គឺទទួលបានជោគជ័យមួយជំហានរួចហើយ ប៉ុន្តែការរកដីបែបនេះបានគឺត្រូវព្យាយាម និងអត់ធ្មត់ ហើយអ្នកទិញត្រូវធ្វើការជាមួយភ្នាក់ងារអចលនទ្រព្យច្រើន ជាមួយអាជ្ញាធរមូលដ្ឋានជាដើម។ ការរកបានដីបែបនេះ ជួលកាលត្រូវចំណាយពេល១ខែយូរ ឬឆាប់ជាងនេះអាស្រ័យលើការព្យាយាមរបស់យើង។
២. ត្រូវដឹងថាយើងលក់ឱ្យអ្នកណា
ត្រង់ចំណុចនេះលោកអ្នកត្រូវដឹងថាយើងលក់ឱ្យអ្នកណាហើយអ្នកណាដែលនឹងមកទិញដីរបស់យើង។ តើគាត់អ្នកលក់នឹង ដឹងទេ ថានរណាគេអាចនឹងមានលុយ ២លានដុល្លារ មកទិញដីយើង។ មនុស្សដែលយកលុយទៅទិញដី ២លានដុល្លារ ត្រូវដឹងថាទាល់តែគ្រួសារនឹងមានលុយ ៤ទៅ៥ លានដុល្លារ បានគេហ៊ានទិញដីយើង។ ជាក់ស្ដែងដូចជាគម្រោងបុរី របស់លោកដូចគ្នា ដោយលោកបានសង្កត់ធ្ងន់ថា ចំពោះអ្នកដែលមកទិញគម្រោងបុរី របស់លោកទាល់តែអ្នកហ្នឹងមានលុយទើបអាចទិញបាន ដែលនេះគេហៅថាអតិថិជនគោលដៅ។
៣. ជួលភ្នាក់ងារលក់
ប្រសិនបើលោកអ្នកពិបាករកអតិថិជន គឺអាចជួលភ្នាក់ងារលក់បាន ព្រោះថាភ្នាក់ងារមានភ្ញៀវក្នុងដៃស្រាប់ ហើយពួកគាត់ដឹងថា ភ្ញៀវបែបណាត្រូវការអចលនទ្រព្យប្រភេទណា ។ វាមិនមែនជារឿងលំបាកខ្លាំងនោះទេក្នុងការលក់ដីរបស់អ្នកឱ្យបានឆាប់រហ័ស ។ ភ្នាក់ងារមានបណ្តាញក្រុមហ៊ុមការងារ ដែលពួកគេទាំងអស់បានធ្វើការជាមួយគ្នាដើម្បីជំរុញការលក់ដី របស់អ្នកឱ្យបានលឿងបំផុត ៕
អត្ថបទដោយ៖ ឌឿក ស្រីនុត
