កាលពីថ្ងៃទី៨ ខែមិថុនា ឆ្នាំ២០២៤ រថភ្លើង៤គ្រឿងប្រភេទ Kiha-183 ក្នុងចំណោម ១១ គ្រឿង ដែលក្រុមហ៊ុនរ៉ូយ៉ាល់ រេលវេ (Royal Railway) បញ្ជាទិញពីជប៉ុន បានដាក់បើកបរធ្វើតេស្តសាកល្បង មុននឹងដាក់ឱ្យដំណើរការជាផ្លូវការ។ ខណៈរថភ្លើងទាំងនោះត្រូវបានក្រុមការងារបច្ចេកទេសនាយកដ្ឋានផ្លូវដែក នៃក្រសួងសាធារណការ និងដឹកជញ្ជូន ចុះពិនិត្យ តាមដានការធ្វើតេស្តសាកល្បង និងត្រូវបានកែសម្រួលប្រព័ន្ធហ្វ្រាំង និងទទឹងកង់ពី ១០៦៧ មិល្លីម៉ែត្រ មក១០០០ មិល្លីម៉ែត្រ រួចរាល់ នៅខេត្តព្រះសីហនុ។
បើតាមការដកស្រង់ពីក្រុមហ៊ុន Royal Railway រថភ្លើងថ្មីនេះនឹងដាក់ឲ្យដំណើរការទាំងផ្លូវរថភ្លើងខាងជើង (ភ្នំពេញ-ប៉ោយប៉ែត) និងខាងត្បូង (ភ្នំពេញ-ព្រះសីហនុ) ។ ក្នុងនោះសម្រាប់ខ្សែរថភ្លើងខាងជើងទីតាំងដឹកជញ្ជូនរួមមាន៖ ភ្នំពេញ » កំពង់ឆ្នាំង, ភ្នំពេញ » ពោធ៍សាត់, ភ្នំពេញ » មោង, ភ្នំពេញ » បាត់ដំបង, ភ្នំពេញ » ថ្មគោល, ភ្នំពេញ » បន្ទាយមានជ័យ, ភ្នំពេញ » ប៉ោយប៉ែត ខណៈការធ្វើដំណើរចេញពីភ្នំពេញគឺនៅម៉ោង៦៖៤០ព្រឹកជារៀងរាល់ថ្ងៃ។ ដោយឡែកធ្វើដំណើរចេញពីប៉ោយប៉ែតមកវិញគឺនៅវេលាម៉ោង៧៖០០ព្រឹក ជារៀងរាល់ថ្ងៃ។
ចំពោះផ្លូវរថភ្លើងភាគខាងត្បូងទីតាំងដឹកជញ្ជូនមាន៖ ភ្នំពេញ » តាកែវ, ភ្នំពេញ » កំពង់ត្រាច, ភ្នំពេញ » កែប, ភ្នំពេញ » កំពត, ភ្នំពេញ » វាលរេញ និងភ្នំពេញ » កំពង់សោម។ ដោយក្នុងនោះការដឹកជញ្ជូនគឺមាន ២ ជើងក្នុង ១ ថ្ងៃ ដោយម៉ោងចេញដំណើរមានម៉ោង ៧៖០០ ព្រឹក និងម៉ោង ៤៖០០ ល្ងាច។ ដោយឡែកការចេញដំណើរពីក្រុងព្រះសីហនុ មកភ្នំពេញវិញគឺមាន ២ ជើងក្នុង ១ ថ្ងៃដូចគ្នាដែលរួមមាន៖ ម៉ោង ៨៖០០ ព្រឹក និងម៉ោង ២៖០០ រសៀល។
បើយោងតាមការបញ្ជាក់ពីក្រសួងសាធារណការ និងដឹកជញ្ជូន នៅពេលដាក់ឱ្យដំណើរការជាផ្លូវការ សម្រាប់ផ្លូវរថភ្លើងភាគខាងត្បូង ភ្នំពេញ-ព្រះសីហនុ តម្រូវឱ្យរត់ ៨០km/h និងសម្រាប់ផ្លូវរថភ្លើងភាគខាងជើង ភ្នំពេញ-ប៉ោយប៉ែត តម្រូវឱ្យរត់ចន្លោះពី ៣០-៥០ km/h៕
