ថ្មីៗនេះនៅលើគេហទំព័រផ្លូវការរបស់ម្ចាស់មេដាយមាសស៊ីហ្គេមកម្ពុជា កីឡាការិនីកូនកាត់ខ្មែរ-អាមេរិក កញ្ញា ខាន់ ចេសា បានបង្ហាញរូបភាពរៀបការជាមួយ ជាកីឡាករដ៏ស្រស់សង្ហា មានសមត្ថភាពខ្លាំង លើកីឡាជីជឺតស៊ូដូចគ្នា ព្រមទាំងជាម្ចាស់មេដាយថ្នាក់ពិភពលោកប្រចាំសហរដ្ឋអាមេរិកទៀតផង។

កូនកម្លោះរបស់កញ្ញាគឺលោក Zach Kaina ដែលលោកគឺជាគ្រូបង្វឹកកីឡា ជាអត្តពលិកអាជីពជីជឺតស៊ូនិងជាម្ចាស់ខ្សែក្រវ៉ាត់ខ្មៅ ធ្លាប់ប្រកួតឈ្នះមេដាយលំដាប់ថ្នាក់ពិភពលោក 3rd Place IBJJF Pan Championship (2022) តំណាងឱ្យក្រុម Art Of Jiu-Jitsu (AOJ) នៅក្នុងការប្រកួតកីឡាអន្តរជាតិរបស់សហរដ្ឋអាមេរិក។

លោកគឺជាអត្តពលិកអាមេរិកដំបូងគេដែលឈ្នះជើងឯក IBJJF World ក្នុងផ្នែកខ្សែក្រវ៉ាត់ខ្មៅកម្រិតមនុស្សពេញវ័យនិងបានមេដាយជាច្រើននៅក្នុងជីជឺតស៊ូលំដាប់ពិភពលោករួមមានដូចជា ៖ 1st Place IBJJF World Championship NOGI (2022)  1st Place IBJJF World Championship (2018)​ 3rd Place IBJJF World Championship (2022), 2nd Place IBJJF World Championship (2019) និងមេដាយជាច្រើនទៀត។

មានវ័យ២២ឆ្នាំ កម្លោះសង្ហាសញ្ជាតិអាមេរិករូបនេះ កើតនៅថ្ងៃទី ២៣ ខែឧសភា ឆ្នាំ ២០០២ នៅទីក្រុងOahu រដ្ឋ Hawaii សហរដ្ឋអាមេរិកនិងបានធំដឹងក្តីឡើងនៅរដ្ឋ California ដែលលោកបានផ្លាស់មករស់នៅពេលមានអាយុ១០ឆ្នាំ។

ហាត់កីឡាចាប់តាំងពីអាយុ៦ឆ្នាំ និងជាសិស្សឆ្នើមម្នាក់នៅក្នុងការលេងកីឡាជីជឺតស៊ូនេះធ្វើឱ្យលោកអាចទទួលបានខ្សែក្រវ៉ាត់ជីជឺតស៊ូពណ៌ទឹកក្រូចត្រឹមអាយុ១០ឆ្នាំ។ នេះបើយោងតាមការចុះផ្សាយរបស់ Bijheroes។

ក្នុងនោះបើតាមបណ្តេញសង្គមផ្ទាល់ខ្លួនរបស់លោក បានឱ្យដឹងថារូបលោកនិងកីឡាការិនីកូនកាត់កម្ពុជា ខាន់ ចេសា គឺជាគូស្នេហ៍កីឡាជីជឺតស៊ូនិងជាមិត្តសម្លាញ់នឹងគ្នាតាំងពីកុមារភាព និងជាគូស្នេហ៍ដែលស្នេហាវិស័យកីឡាដូចគ្នាតាំងពីនៅជាកុមារមកម្ល៉េះ៕