មានសាខានៅ៨០ប្រទេស និងបុគ្គលិកប្រមាណជាង៤០ម៉ឺននាក់នៅទូទាំងពិភពលោក យីហោកាហ្វេលំដាប់កំពូល Starbucks ត្រូវបានជាប់ចំណាត់ជាក្រុមហ៊ុនមួយដែលមានការដឹកនាំបុគ្គលិកល្អបំផុតពីវិទ្យាស្ថាន Top Employer របស់សហភាពអឺរ៉ុបកាលពីឆ្នាំ២០១៨។
យ៉ាងណាមិញនេះជាគន្លឹះសំខាន់ៗចំនួន៥ របស់ប្រព័ន្ធដឹកនាំ Starbucks នៅសហរដ្ឋអាមេរិក ដើម្បីបណ្តុះបុគ្គលិកខ្លាំងពូកែ រក្សាបុគ្គលិកបានយូរមិនចង់ចាកចេញទៅធ្វើការកន្លែងផ្សេង។
គន្លឹះទី១. ផ្តល់អត្ថប្រយោជន៍ល្អបំផុត៖ បុគ្គលិកនៅ Starbucks នឹងទទួលបានកញ្ចប់ផ្តល់អត្ថប្រយោជន៍ពីលើប្រាក់ខែរបស់ពួកគេដូចជាកញ្ចប់សម្រាប់ធានារ៉ាប់រងសុខភាព និងការឈប់សម្រាកដោយមានប្រាក់ខែសម្រាប់ការឈប់ទៅមើលថែទាំគ្រួសារឬការបង្កើតកូន។ ក្នុងនោះ Starbucks ក៏ផ្តល់ជម្រើសគម្រោងសន្សំនិងវិនិយោគប្រាក់សម្រាប់ចូលនិវត្តន៍ឱ្យបុគ្គលិក ដែលមានកញ្ចប់ឈ្មោះថា 401K ដោយក្រុមហ៊ុននឹងដកចេញ៥% នៃប្រាក់ខែរបស់បុគ្គលិកទុកជាប្រាក់ចូលនិវត្តន៍ឱ្យពួកគេ។
គន្លឹះទី២. បង្កើតវប្បធម៌គុណតម្លៃ៖ Starbucks តែងឱ្យតម្លៃលើវប្បធម៌ក្រុមហ៊ុនដើម្បីឈរជើងបានរឹងមាំ ក្រុមហ៊ុនតែងចាត់ទុកបុគ្គលិកជាដៃគូសហការមិនមែនជាបុគ្គលិកឆុងកាហ្វេនោះទេ។ អគ្គនាយករបស់ Starbucks លោក Howard Schultz បានឱ្យដឹងថាការចាត់ទុកភាពសំខាន់និងផ្តល់ឱ្យបុគ្គលិកនូវអត្ថប្រយោជន៍ល្អៗគឺដើម្បីឱ្យបុគ្គលិកតបស្នងនិងផ្តល់សេវាកម្មឱ្យអតិថិជនល្អបំផុតវិញដែរ។
គន្លឺះទី៣. ម៉ោងមានភាពបត់បែន៖ បុគ្គលិកនៅហាងកាហ្វេលំដាប់មួយនេះភាគច្រើនជាយុវជនដែលកំពុងសិក្សានៅថ្នាក់មហាវិទ្យាល័យ ដូច្នេះហើយ Starbucks ក៏បានគិតគូរដល់ចំណុចសំខាន់នេះដែរ ដោយក្រុមហ៊ុនបានបង្កើតកាលវិភាគបត់បែនឱ្យទៅបុគ្គលិក ពួកគេអាចជ្រើសរើសម៉ោងធ្វើការនិងម៉ោងទៅរៀនបានដោយខ្លួនឯង ឬសម្រាប់អ្នកដែលមានគ្រួសារអាចបត់បែនពេលវេលាមើលថែកូនៗនិងឱពុកម្តាយបាន។
គន្លឹះទី៤. បណ្តុះអ្នកដឹកនាំ៖ មិនត្រឹមតែបង្វឹកនិងបណ្តុះបណ្តាលជំនាញគ្រាប់កាហ្វេ ឆុងកាហ្វេ សិល្បៈកាហ្វេនិងសេវាកម្មអតិថិជនដល់បុគ្គលិកជាប្រចាំប៉ុណ្ណោះទេ Starbucks ក៏មានការសហការជាមួយសកលវិទ្យាល័យដ៏ល្បីនៅអាមេរិក Arizona State ដើម្បីឱ្យបុគ្គលិកបានសិក្សាតាមអនឡាញ ដោយបុគ្គលិកអាចជ្រើសរើសមុខវិជ្ជាសញ្ញាបត្របរិញ្ញាបត្រចម្រុះជាង១៤០ លើអាហារូបករណ័១០០%ផងដែរ។
នេះគឺបេសកម្មមួយរបស់យីហោកាហ្វេមួយនេះ ក្នុងការបណ្តុះអ្នកដឹកនាំជំនាន់ក្រោយ និងបណ្តុះមនុស្សខ្លាំងដើម្បីធ្វើផលិតគុណភាពផលិតផលការងារឱ្យបានល្អបំផុត ដល់ក្រុមហ៊ុនឬសង្គមវិញ។
គន្លឹះទី៥. កាដូពិសេស៖ Starbucks នឹងអនុញ្ញាតឱ្យបុគ្គលិកយកកាហ្វេឬតែមួយគីឡូក្នុងមួយសប្តាហ៍ដោយឥតគិតថ្លៃទៅផ្ទះបាន ក្នុងនោះបុគ្គលិកអាចទទួលទានអាហារ១ពេល ភេសជ្ជៈ១កែវ ជារៀងរាល់ថ្ងៃនៅហាង ហើយបើបុគ្គលិកទិញផលិតផលនៅហាងៗនឹងមានការបញ្ចុះតម្លៃឱ្យ៣០%។ បន្ថែមពីនោះក្រុមហ៊ុនក៏បានឱ្យប្រាក់ថ្លៃធ្វើដំណើរទៅកន្លែងធ្វើការ និងទទួលបានគណនី Premium ស្តាប់តន្រ្តីឥតគិតថ្លៃលើកម្មវិធី Spotify ថែមទៀត។
គួររំលឹកផងដែរថាយីហោយក្សលំដាប់ពិភពលោក Starbucks ត្រូវបានបង្កើតសារឡើងវិញនិងដឹកនាំឡើងដោយលោក Howard D. Schultz ដែលផ្តើមចេញពីបុគ្គលិកផ្នែកលក់ជាន់ខ្ពស់ម្នាក់ ដែលបានធ្វើការនៅ Starbucks ដែលពេលនោះជាហាងលក់តែគ្រាប់កាហ្វេប៉ុណ្ណោះក្នុងឆ្នាំ១៩៨២ រហូតដល់លោកសម្លឹងឃើញអនាគតកើតគំនិតទិញយកក្រុមហ៊ុននេះមកអភិវឌ្ឍន៍ ពីស្ថាបនិកចំនួន៣រូបក្នុងតម្លៃ៣.៨លានដុល្លារ៕
អត្ថបទដោយ៖ ពីង ជូអេង
