រដ្ឋាភិបាលជប៉ុន នឹងផ្តល់ជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ ថវិកាសរុបចំនួន ១៨៦,៨៥៦ ដុល្លារអាមេរិក សម្រាប់ការសាងសង់ស្ពាននៅក្នុងឃុំអមលាំង ស្រុកថ្ពង ខេត្តកំពង់ស្ពឺ និងការស្តារប្រព័ន្ធធារាសាស្ត្រទួលអណ្តែតនៅក្នុងខេត្តកំពង់ចាម។

យោងតាមការចេញផ្សាយរបស់ស្ថានទូតជប៉ុនប្រចាំកម្ពុជា បានឱ្យដឹងថាការផ្ដល់ជំនួយឥតសំណងនេះធ្វើឡើងនៅក្នុងពិធីចុះហត្ថលេខាលើកិច្ចសន្យាកាលពីថ្ងៃទី០៤ ខែធ្នូ ឆ្នាំ២០២២ រវាងលោក តានិណៃ អ៊ីឈិតុម៉ុ (TANINAI Ichito​m​o) ឧបទូតនៃស្ថានទូតជប៉ុនប្រចាំកម្ពុជា ជាមួយប្រធានមន្ទីរសាធារណការ និងដឹកជញ្ជូនខេត្តកំពង់ស្ពឺ និងប្រធានមន្ទីរធនធានទឹក និងឧតុនិយមខេត្តកំពង់ចាម។

គួរបញ្ជាក់ផងដែរកន្លងមកជប៉ុនបានផ្ដល់ជំនួយមកកម្ពុជាជាយ៉ាងច្រើន ដោយចាប់តាំងពីឆ្នាំ១៩៩១ រដ្ឋាភិបាលជប៉ុនបានផ្ដល់ថវិកាជាង ៦៥លានដុល្លារ អាមេរិកដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីអនុវត្តគម្រោងនេះចំនួន ៦៦៧ នៅទូទាំងប្រទេសកម្ពុជា៕

អត្ថបទដោយ៖ ឌឿក ស្រី នុត