តាមការស្ទង់មតិរបស់ McKinsey ឆ្នាំ២០២២ បានរកឃើញថា មូលហេតុទូទៅបំផុតដែលបុគ្គលិក ចាកចេញពីការងារ គឺដោយសារខឹងអ្នកដឹកនាំដែលមិនយកចិត្តទុកដាក់នឹងពួកគេ។ ដូច្នេះការបែងចែកបុគ្គលិកសំណព្វចិត្តនិងបុគ្គលិកធម្មតាទុកក្រៅកែវភ្នែកនោះ នឹងធ្វើឱ្យបញ្ហាសុមាលភាពផ្លូវចិត្ត នៅកន្លែងធ្វើការកើតមានឡើង។
យ៉ាងណាមិញបើតាមលោក Brian Chesky ជានាយកប្រតិបត្តិនៃ ក្រុមហ៊ុនក្នុងវិស័យទេសចរណ៍តម្លៃ៨៥ពាន់លានដុល្លារ Airbnb បានថ្លែងនៅក្នុងបទសម្ភាសន៍មួយរបស់ Fortune ថា “ជាការពិត ការបែងចែកបុគ្គលិកសំណព្វចិត្តនិងបុគ្គលិកធម្មតា គឺជាក្បួនដឹកនាំដ៏មានប្រសិទ្ធិភាពមួយរបស់អ្នកដឹកនាំ ប៉ុន្តែការបែងចែកនេះគឺត្រូវជ្រើសរើសមនុស្សឱ្យបានត្រឹមត្រូវនិងវិនិច្ឆ័យឱ្យបានច្បាស់លាស់” ។
លោកក៏បានបញ្ជាក់ថាការធ្វើបែបនេះមិនមែនជារឿងអយុត្តិធម៌ ឬដោយសារមិនមានប្រព័ន្ធការងារច្បាស់លាស់នោះទេ ប៉ុន្តែនេះជារបៀបដែលមេដឹកនាំកំណត់អត្តសញ្ញាណមនុស្សដែលមានសក្តានុពលខ្ពស់ ផ្តោតលើភាពខ្លាំងរបស់គេ និងអាចប្រើគេជាប្រយោជន៍បាន។
ដូច្នេះនៅពេលដែល បុគ្គលិកជួបមេដែលបែងចែក បុគ្គលិកសំណព្វនិងបុគ្គលិកធម្មតា CEO រូបនេះណែនាំថា កុំឱ្យបុគ្គលិកអនុវត្តលើរឿង២យ៉ាងនេះ ហើយអនុវត្តលើរឿង២យ៉ាងនេះជំនួសវិញ ខណៈការសិក្សាអំពីអាប្បកិរិយាបុគ្គលិករបស់ Harvard Business Review ក៏លើកឡើងស្រដៀងគ្នានេះដែរ។
រឿងមិនគួរធ្វើ៖
១. កុំចូលខ្លួនទៅស្តាប់ការរិះគន់ អវិជ្ជមានលើមេរបស់អ្នក ជាមួយមិត្តរួមការងារដទៃព្រោះវានឹងធ្វើឱ្យ អ្នកកាន់តែមានអារម្មណ៍មិនល្អជាមួយមេ ហើយកាន់តែស្អប់ការងារ។
២. នៅត្រាំត្រែងធ្វើការកន្លែងដែលមើលមិនឃើញអំពីតម្លៃអ្នកយូរខ្លាំងពេក ហើយគ្មានឱកាសរីកចម្រើនជាកម្រិតក្នុងអាជីពនោះ។
រឿងគួរធ្វើ៖
១. បណ្តុះសំឡេងវិជ្ជមាន រក្សាភាពវិជ្ជមាននៅក្នុងខ្លួនអ្នក ផ្តោតលើលទ្ធផលដែលអ្នកសម្រេចបានក្នុងការងារ។
២. សង្កេតអំពីរបៀបដែលមេរបស់អ្នកប្រាស្រ័យទាក់ទងក្នុងការងារ របៀបធ្វើការរបស់បុគ្គលិកសំណព្វ និងស្វែងយល់ពីគោលបំណង ព្រមទាំងលទ្ធផលដែលគាត់ចង់បាន។
ទន្ទឹមនឹងវិធីសាស្រ្តធ្វើការឱ្យមានប្រសិទ្ធិភាព ជាមួយមេដែលបែងចែកបុគ្គលិកសំណព្វនិងបុគ្គលិកមិនសំណព្វនេះដែរ CEO Airbnb ក៏បានលើកឡើងបន្ថែមថា៖ “ខ្ញុំក៏មិនដឹងដែរថារាល់ថ្ងៃ ខ្ញុំមានបុគ្គលិកសំណព្វចិត្តតែមួយឬអត់ ព្រោះ មនុស្សដែលខ្ញុំចូលចិត្តជាងគេគឺជាមនុស្សណាដែលខ្ញុំចូលចិត្តផ្ញើសារទៅច្រើន ហើយជាទូទៅខ្ញុំតែងផ្ញើសារទៅបុគ្គលិកច្រើនរូប ឬពេលខ្លះហៅពួកគេមកនិយាយគ្នា ប៉ុន្តែទាស់ត្រង់ថាតើពួកគេចូលចិត្តមកជួបខ្ញុំឬតបសារខ្ញុំឬអត់”៕
អត្ថបទដោយ៖ ពីង ជូអេង
