វិនិយោគគិនជប៉ុន សហការជាមួយវិនិយោគគិនក្នុងស្រុក បានបោះទុនវិនិយោគទឹកប្រាក់ប្រមាណជាង ១០០លានដុល្លារអាមេរិក ដើម្បីសាងសង់ខុនដូរស្នាក់នៅ និងសណ្ឋាគារលំដាប់ផ្កាយ ដោយមានកម្ពស់ ៦៥ ជាន់ “G.A.T.O TOWER” ដែលមានទីតាំងស្ថិតក្នុងសង្កាត់បឹងកេងកងទី១។

ជាក់ស្តែង នៅក្នុងកម្មវិធីពិធីសន្និសីទសារព័ត៌មានស្តីពីគម្រោងអភិវឌ្ឍន៍អគារស្នាក់នៅកម្ពស់ ៦៥ជាន់ G.A.T.O TOWER លោក Nagato Daiko ដែលជាវិនិយោគិនជប៉ុន និងជាប្រធានក្រុមប្រឹក្សានៃក្រុមហ៊ុនអភិវឌ្ឍន៍ MIRAKU CAPITAL & DEVELOPMENT CO., LTD មានប្រសាសន៍ថា ដោយមើលឃើញអំពីសក្តានុពលរបស់ប្រទេសកម្ពុជា ទើបក្រុមហ៊ុន MIRAKU បានសម្រេចអភិវឌ្ឍន៍គម្រោង “G.A.T.O TOWER” ដែលមានកម្ពស់រហូតដល់ទៅ ៦៥ ជាន់សម្រាប់ជាអគារខុនដូរស្នាក់នៅដោយរួមបញ្ចូលទាំងសណ្ឋាគារលំដាប់ផ្កាយផងដែរ។

លោក ញឹម រាសី​ និងលោកស្រី នៅ​ សុគន្ឋារី ជាដៃគូរវិនិយោគគិនក្នុងស្រុក និងជាក្រុមប្រឹក្សាភិបាលនៃក្រុមហ៊ុនអភិវឌ្ឍន៍​​ MIRAKU បានថ្លែងរួមគ្នាផងដែរថា គម្រោង “G.A.T.O TOWER” នឹងសាងសង់នៅលើផ្លូវ ៣៣៤ កៀកនឹងមហាវិថីព្រះនរោត្តម ក្នុងសង្កាត់បឹងកេងកងទី១​ ដោយមានផែនការចាប់ផ្តើមសាងសង់​នៅចុងត្រីមាសទី១ នៃឆ្នាំ២០២៦។ ខណៈពេលនេះ ក្រុមហ៊ុនស្ថាបត្យករជប៉ុនដែលល្បីឈ្មោះជាងគេនៅប្រទេសជប៉ុន គឺក្រុមហ៊ុន SHIN TAKAMATSU ARCHITECT & ASSOCIATE កំពុងធ្វើការសិក្សាលំអិត ដើម្បីនាំយកមកនូវការរចនាដែលល្អបំផុតសំរបទៅតាម​របថរស់នៅ​ថ្មីក្នុងប្រទេសកម្ពុជា។ ហើយ G.A.T.O TOWER គ្រោងនឹងបញ្ចប់ការសាងសង់ក្នុងឆ្នាំ ២០៣០​ ខាងមុខនេះ។

គម្រោង G.A.T.O TOWER នឹងក្លាយជាគំរោងមួយដែលប្រកបទៅដោយស្តង់ដារអន្តរជាតិ ដោយមានការចូលរួមពីស្ថាបត្យករជនជាតិជប៉ុន សហការជាមួយស្ថាបត្យករជនជាតិខ្មែរ និងក្រុមហ៊ុនប្រឹក្សាយោបល់ផ្នែកសំណង់អន្តរជាតិផងដែរដើម្បីធានាបាននូវគុណភាពសំណង់ដែរស្របតាមស្តង់ដាអន្តរជាតិ និងបញ្ចប់ការសាងសង់ទៅតាមកាលកំណត់។

លោក ញឹម រាសី ជាអគ្គនាយកនៃក្រុមហ៊ុន MIRAKU មានប្រសាសន៍ថា G.A.T.O TOWER ត្រូវបានរចនាឡើងដោយរួមបញ្ចូលបរិក្ខារពិសេសៗដូចជា កន្លែងទទួលភ្ញៀវដ៏ស្អាតប្រណិតរួមដោយធម្មជាតិ  សួនលើអាកាស កន្លែងក្មេងលេង កន្លែងហាត់ប្រាណ ស្ទីម និងសូណា​ Private Lounge ហាងកាហ្វេ និងកន្លែងអង្គុយធ្វើការ។  ក្រៅពីសណ្ឋាគារលំដាប់ផ្តាយ នៅផ្នែកជាន់ខាងលើនៃអគារក៏មានខុនដូរសំរាប់ស្នាក់នៅ ហើយសំរាប់ជាន់ទី៦០ដល់​៦៤ គឺត្រូវបានរចនាសំរាប់ជា Penthouse ដែលមានលក្ខណៈឯកជន និងប្រណិតភាពបំផុត។​ ជាពិសេស G.A.TO TOWER នឹងមានស្កាយបារ៍​ និងអាងហែលទឹកដែលស្ថិតនៅលើជាន់ខ្ពស់បំផុតផងដែរ ដែលអាចមើលឃើញទេសភាពយ៉ាងស្អាតនៃទីក្រុងភ្នំពេញ។

ក្រៅពីបរិក្ខារល្អឥតខ្ចោះទាំងអស់នេះ G.A.T.O TOWER នឹងត្រូវបានគ្រប់គ្រងដោយក្រុមហ៊ុនគ្រប់គ្រងអចលនទ្រព្យកម្ពុជាឈានមុខគេ WH LIVING & PROPERTIES CO., LTD ដែលជាក្រុមហ៊ុនធ្លាប់ទទួលបានពានរង្វាន់ផ្នែកគ្រប់គ្រង និងជាមួយកិច្ចសហការបន្ថែមរបស់អ្នកជំនាញជប៉ុន ដើម្បីធានាបាននូវស្តង់ដារគ្រប់គ្រងលំដាប់ថ្នាក់អន្តរជាតិ ហើយជាពិសេសផ្តល់នូវអត្រាផលចំណេញខ្ពស់ពីការជួលមកវិញសម្រាប់អ្នកវិនិយោគិនពេលគម្រោងបានបញ្ចប់។

លោកស្រី KAWASAKI MASAKO នាយកផ្នែកទីផ្សារនៃគម្រោង G.A.T.O TOWER ក៏បានមានប្រសាសន៍បញ្ជាក់ដែរថា កិច្ចសហប្រតិបត្តិការនេះ មិនត្រឹមតែជាកិច្ចចងក្រងអាជីវកម្មដ៏រឹងមាំប៉ុណ្ណោះទេប៉ុន្តែថែមទាំងជានិមិត្តរូបនៃមិត្តភាពរវាង​កម្ពុជា​និងជប៉ុនផងដែរ។ ហើយលោកស្រីក៏បានជឿយ៉ាងមុតមាំថា G.A.T.O TOWER នឹងមិនមែនត្រឹមតែផ្តល់​ជាកន្លែងរស់​នៅប៉ុណ្ណោះទេ ប៉ុន្តែវានឹងបង្កើតជារបៀបរស់នៅថ្មីមួយដែលទំនើប មានចីរភាព និងផ្តោតទៅលើសហគមន៍។ គម្រោងនេះនឹងរួមចំណែកបង្កើតការងារធ្វើឱ្យទេសភាពទីក្រុងកាន់តែប្រសើរនិងក្លាយជាសញ្ញាសម្ពាល់ថ្មីមួយទៀតរបស់ទីក្រុងភ្នំពេញ៕