ផ្តើមចេញពីមនុស្សម្នាក់ ដែលមានដុង្គស្រលាញ់ខាងឡានតាំងពីកុមារមក ធ្វើឱ្យកូនខ្មែរ១រូប គឺលោក សេង ប៊ុនស្រ៊ុន ចាប់របរកែច្នៃកូនឡាងតូចដែលអាចលេងបានទាំងមនុស្សចាស់ និងកូនក្មេង មិនតែប៉ុណ្ណោះធ្វើឱ្យលោកអាចលក់ឡាន១គ្រឿងបានតម្លៃពី ៥០០ដុល្លារ ដល់ទៅ១ពាន់ដុល្លារឯណោះ។
លោក សេង ប៊ុនស្រ៊ុន ដែលជាស្ថាបនិក RC Truck Cambodia បាននិយាយថា សម្រាប់កូនឡានដែលលោកបានច្នៃ និងផ្គុំឡើងមក គឺមានសភាពដូចរបស់ពិតអ៊ីចឹង ជាក់ស្តែងដូចជាក្បាលឡានកុងតាន័រវាដូចនឹងរបស់ពិតៗ ក្រៅពីនេះទៀតលោកអាចផលិតបាននូវរបស់លេងជាច្រើនទៀតដូចជា ប្រភេទឡានដឹក (៥ ទៅ ៦តោន) , ឡានកុងតាន័រកង់១០ អេស្កាវ៉ាទ័រ ត្រាក់ទ័រឈូសដី ឡានបែន រួមទាំងរថក្រោះផងដែរ។
លោកក៏បានបន្តនិយាយទៀតថា ក្នុងឡាន១ គ្រឿងលោកអាចធ្វើរួចរាល់ ត្រឹមពេលតែ ១សប្ភាហ៍តែប៉ុណ្ណោះ ដែលអាស្រ័យលើគ្រឿងបង្គុំដែលមានស្រាប់ក្នុងស្តុក។ ម្យ៉ាងវិញទៀត សម្រាប់កម្រៃដែលគាត់រកបានក្នុង១ គ្រឿង អាចលក់ចន្លោះពី ៥០០ដុល្លារទៅ ១០០០ដុល្លារ ឯណោះ អាស្រ័យលើការកម្មង់របស់អតិថិជន និងទំហំរបស់ឡាននីមួយៗ។
លើសពីនេះទៅទៀត ចំពោះ សមាជិករបស់ RC Truck Cambodia គឺជាអ្នកនិយម និងចូលចិត្ត ឲ្យតម្លៃលើការកែច្នៃកូនឡានខ្លាំងមែនទែន ហើយពួកគេគឺគាំទ្រនូវស្នាដៃកូនខ្មែរ លើកស្ទួយសិល្ប:នៃការកែច្នៃ។
ស្ថាបនិក RC Truck Cambodia បានលើកទៀតថា សម្រាប់អតិថិជនគោលដៅដែលបានជាវកូនឡានកែច្នៃពីគាត់ទៅ ភាគច្រើនជាក្រុមមនុស្សដែលប្រកបមុខរបររកលុយតាមយូធូប ដែលពួកគេចូលចិត្តទិញសម្រាប់ទុកថតជាវីដេអូ ដើម្បីរកលុយតាមបណ្តាញសង្គម ដូចជា តិកតុក យូធូប និងហ្វេសប៊ុក ជាដើម។
គូសបញ្ជាក់ថា សម្រាប់បងប្អូនដែលមានចំណាប់អារម្មណ៍ចង់ជាវកូនឡានពីខាងគាត់ អាចរកបានតាមរយ: ក្នុង Facebook RC Truck Cambodia បានយ៉ាងងាយ ឬអាចទាក់ទងតាមលេខទូរស័ព្ទផ្ទាល់ខ្លួនរបស់លោក សេង ប៊ុនស្រ៊ុន : 078 454 243 ៕
អត្ថបទ៖ ធី ស្រីល័ក្ខ
