ជនបរទេសសរុបចំនួន ៦០២,៥៧០នាក់ មកពីប្រទេស និងតំបន់ចំនួន១៩៣ ជុំវិញពិភពលោក បានមកទស្សនារមីណយដ្ឋានអង្គរដ៏ល្បីល្បាញរបស់កម្ពុជា ក្នុងរយៈពេល ១០ខែនៃឆ្នាំ២០២៣ ពោលគឺកើនឡើង ២៥៦% បើធៀបនឹងកំណត់ត្រាកាលពីឆ្នាំមុនក្នុងរយៈពេលដូចគ្នាដែលមានចំនួន ១៦៩,២៥៧ នាក់។
យោងតាមរបាយការណ៍ចុងក្រោយរបស់គ្រឹះស្ថានអង្គរ បានឲ្យដឹងថា ចាប់ពីខែមករា ដល់ខែតុលា ឆ្នាំ២០២៣ មានប្រភពភ្ញៀវអន្តរជាតិធំៗចំនួនបួន ដែលមកទស្សនាឧទ្យានអង្គរច្រើនជាងគេគឺ សហរដ្ឋអាមេរិក អង់គ្លេស បារាំង និងចិន។ ការមកដល់របស់ភ្ញៀវទេសចរណ៍ទាំងអស់ បាននាំមកនូវប្រាក់ចំណូលពីការលក់បណ្ណចូលទស្សនាអង្គរសរុប ២៧ ៨៨២ ៤៣៥ ដុល្លារ កើនឡើង ៣១២,៣៥% បើធៀបនឹងរយៈពេលដូចគ្នាកាលពីឆ្នាំមុន។
គួរជម្រាបផងដែរថា រមីណយដ្ឋានបុរាណអង្គរ ស្ថិតនៅភាគពាយព្យនៃប្រទេសកម្ពុជា មានទំហំ ៤០១ គីឡូម៉ែត្រការ៉េ បានចុះក្នុងបញ្ជីបេតិកភណ្ឌពិភពលោករបស់អង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (UNESCO) ក្នុងឆ្នាំ១៩៩២ គឺជាគោលដៅទេសចរណ៍ដ៏ពេញនិយមមួយបំផុតនៅក្នុងតំបន់អាស៊ីអាគ្នេយ៍៕
អត្ថបទដោយ៖ កាន់ ដារ៉ា (ស្មេរពនេចរ)
