បន្ទាប់​ពីចប់​មហាព្រឹត្តិការណ៍ស៊ីហ្គេមថ្មីៗនេះ កម្ពុជា​បានចារ​ប្រវត្តិសាស្រ្ត​ថ្មីមួយទៀត​ ​ដែលបានដាក់បញ្ចូល​វិញ្ញាសា Esportsចូលទៅក្នុង​ការ​ប្រកួត អាស៊ានប៉ារ៉ាហ្គេម លើកទី12 ដោយមាន​ការ​ចូល​រួម​គាំទ្រ​ពី​បណ្ដាដៃគូសហការនិង​ក្រុមហ៊ុនធំៗ
Sopheak Pich MAY 25 2023 106 views

ភ្នំពេញ៖ ព្រឹត្តិការណ៍កីឡាអាស៊ីអាគ្នេយ៍លើកទី៣២ ដែលកម្ពុជាធ្វើជាម្ចាស់ផ្ទះទើបតែ​កន្លងផុត​ទៅ​ថ្មីៗ បន្សល់នៅ​មោទនភាព​ដល់​បងប្អូន​ជនរួមជាតិ​ខ្មែរ​គ្រប់​រូប​មិនទាន់​ផុត​ស្រួលបួលផង ព្រឹត្តិការណ៍​កីឡា​អាស៊ាន​ប៉ារ៉ាហ្គេម​លើក​ទី​12 ក៏ជិត​ឈានចូល​មក​ដល់ ដែលនេះជា​ការ​​ប្រកួតកីឡា ជនពិការធំជាងគេក្នុងបណ្ដាប្រទេសក្នុងតំបន់ អាស៊ីអាគ្នេយ៍​។​​

(កីឡាករ Para Esports តំណាង​ឱ្យប្រទេសកម្ពុជា​ ថត​ក្នុង​កម្មវិធី ជួបជុំ​អត្តពលិក​កីឡា​អាស៊ានប៉ារ៉ាហ្គេម​ តំណាង​ប្រទេស​កម្ពុជា​ទាំង​អស់)កីឡាអេឡិចត្រូនិក(Esports) ត្រូវ​បាន​ដាក់​បញ្ចូល​ក្នុង​ការ​ប្រកួត​ អាស៊ានប៉ារ៉ាហ្គេម លើកទី12 ជាលើកដំបូងក្នុង​ប្រវត្តិសាស្រ្ត ដែលក្នុងនោះកម្ពុជា​គឺជា​ម្ចាស់ផ្ទះ​។ កម្មវិធីប្រកួតកីឡាអាស៊ានប៉ារ៉ាហ្គេម នេះត្រូវបានប្រារព្ធធ្វើឡើងជារៀងរាល់ពីរឆ្នាំម្តង ដើម្បីលើកកម្ពស់មិត្តភាព និងសាមគ្គីភាពរវាងជនពិការក្នុងតំបន់ និងដើម្បីផ្តល់វេទិកាសម្រាប់អត្តពលិកពិការក្នុងការប្រកួតអន្តរជាតិ។