នៅលែងស្ងៀមហើយសម្រាប់ប្រិយមិត្តដែលតែងតែស្រលាញ់និងចូលចិត្តវិស័យចម្រៀងរ៉េប ជាពិសេសបងប្អូនដែលកំពុងគាំទ្រ ក៏ដូចជាកំពុងតែតាមដានកម្មវិធី The Rapper Cambodia ខណៈពេលនេះ ប្រិយមិត្តអាចចូលរួមមើលការប្រឡងក្នុងវគ្គផ្តាច់ព្រ័ត្រដោយសេរី ដោយពុំគិតថ្លៃសំបុត្រចូលរួមនោះទេ។ ក្នុងកម្មវិធីដ៏ហោឡារឹកនេះដែរ ក៏មានវត្ដមានកំពូលតារារ៉េបស្រីមកពីប្រទេសវៀតណាម និងប្រទេសជប៉ុនផងដែរ។
យោងតាមផេកផ្លូវការ Baramey Production កាលពីពេលថ្មីៗនេះបានឱ្យដឹងថា ជួបជាមួយកំពូលតារាចម្រៀងរ៉េប Awich មកពីប្រទេសជប៉ុន និង Suboi មកពីប្រទេសវៀតណាមនៅកម្មវិធីវគ្គផ្តាច់ព្រ័ត្រ និងការប្រគំតន្រី្ត The Rapper Cambodia! ត្រៀមខ្លួនទស្សនាការសម្តែងដ៏កក្រើករបស់ តារាកិត្តិយស ទាំង ២ដួង នៅលើឆាកតន្ត្រី The Rapper Cambodia នៅថ្ងៃទី២៤ ខែ ធ្នូ ឆ្នាំ ២០២៣ នេះដែលមានទីតាំងស្ថិតនៅកោះនរា។
គួរជម្រាបផងដែរថា The Rapper Cambodia Season 1 ត្រូវបានផលិតដោយផលិតកម្មបារមីរួមសហការជាមួយភ្លើងគប់។ កម្មវិធីប្រឡងចម្រៀងរ៉េបនេះបានធ្វើការចាក់ផ្សាយវគ្គដំបូងលើកញ្ចក់ទូរទស្សន៍បាយ័ន៕
