សព្វថ្ងៃនេះ យើងសង្កេតឃើញថាមាន Youtuber និង Content Creator ជាច្រើនកំពុងស្វិតស្វាញក្នុងការផលិតវីដេអូដើម្បីបង្ហោះលើប្រព័ន្ឋអ៊ីនធើណែតយ៉ាងព្រោងព្រាត។ ទាក់ទងជាមួយនឹងការផុសវីដេអូនេះដែរ បងប្អូនមានដឹងទេ 1K VIEWS កម្មវិធី Youtube និង Facebook  ឱ្យលុយប៉ុន្មានដល់អ្នកកាន់ផេក?

យោងតាមការចុះផ្សាយសារព័ត៌មាន Business​ Insider កាលពីពេលកន្លងទៅនេះបានឱ្យដឹងថា YouTube creator ទាំងអស់អាចរកប្រាក់ពីការផុសវីដេអូរបស់ខ្លួនចាប់ពី ១.៦ដុល្លារ រហូតដល់ ២៩.៣០ដុល្លារក្នុង1K VIEWS ដោយលុយទទួលបានច្រើនឬតិច អាស្រ័យទៅលើវីដេអូដែល YouTube creator ផលិតនោះជាទម្រង់ខ្លី ឬទម្រង់វែង បើខ្លីបានលុយតិចទៅតាមនោះដែរ។

ចំពោះការផុសវីដេអូ Facebook វិញ​បើតាម GAMESPEC ដែលដកស្រង់ពីរបាយការណ៍អ្នកត្រួតពិនិត្យប្រព័ន្ធផ្សព្វផ្សាយសង្គម បានឱ្យដឹងថា ប្រាក់ចំណូលដែលអ្នកផលិតមាតិកាទាំងអស់អាចរកបានពី Facebook តិចឬច្រើនគឺអាស្រ័យទៅលើអ្នកទស្សនានៅក្នុងប្រទេសនីមួយៗ។ បើអ្នកប្រើប្រាស់មកពីប្រទេសអាស៊ី ​អ្នកផលិតវីដេអូអាចរកចំណូលបានជាមធ្យម ៥ ដុល្លារ ខណៈនៅអឺរ៉ុប អ្នកបង្កើតមាតិកាអាចរកបានចន្លោះពី ៣ ទៅ ៩ ដុល្លារក្នុង 1K VIEWS។​

គួរជម្រាបផងដែរ ដើម្បីអាចយកលុយពីកម្មវិធីទាំងពីរនេះបាន លុះត្រាតែ Content Creator ទាំងអស់គោរពតាមគោលការណ៍របស់ Platform ដែលគ្របដណ្តប់លើប្រធានបទដូចជា ការរក្សាសិទ្ធិ ពាណិជ្ជសញ្ញា និងសិទ្ធិកម្មសិទ្ធិបញ្ញា។ លើស​ពី​នេះ សម្រាប់​អ្នក​ណា​ដែល​ផ្សព្វផ្សាយ​ផលិតផល ឬ​សេវាកម្ម​ខុស​ច្បាប់ កម្មវិធីទាំងពីរមិន​អនុញ្ញាត​ជាដាច់ខាត៕​