ថ្មីៗនេះ មន្រ្តីនៅទីក្រុងញ៉ូវយ៉កបានធ្វើការរឹបអូសដ៏ធំបំផុតមិនធ្លាប់មានពីមុនដោយចាប់បានកន្លែងលក់ទំនិញខោអាវ ស្បែកជើង កាបូប ក្លែងក្លាយតម្លៃជាង១ពាន់លានដុល្លារអាមេរិកពីទីតាំងមួយនៅសង្កាត Manhattan ក្នុងទីក្រុង New York និងចាប់ឃាត់ខ្លួនមនុស្ស២នាក់នេះដែរ។ នេះបើតាមការចុះផ្សាយដោយសារព័ត៌មាន CNN។
ប្រភពដដែលបានបន្តឱ្យដឹងទៀតថា នៅក្នុងការរឹបអូសទំនិញក្លែងក្លាយនេះដែរ មន្រ្តីនៅទីក្រុងញ៉ូវយ៉កក៏បានធ្វើការឃាត់ខ្លួនមនុស្ស២នាក់ដូចគ្នាដោយមនុស្សទី១មួយមានឈ្មោះថា Adama Sow អាយុ៣៨ ឆ្នាំនិង Abdulai Jelloh អាយុ៤៨ ឆ្នាំ ពីបទជួញដូរទំនិញក្លែងក្លាយ។
ព្រះរាជអាជ្ញាបាននិយាយថា ទំនិញក្លែងក្លាយប្រហែល ២១៩,០០០ ដែលមានតម្លៃសរុបប្រមាណជាង ១ពាន់លានដុល្លារ ត្រូវបានរកឃើញមានដូចជាកាបូប សម្លៀកបំពាក់ ស្បែកជើង និងផលិតផលផ្សេងៗទៀតជាច្រើន។
លោក Damian Williams ដែលជាមេធាវីនៅអាមេរិកក៏បាននិយាយបញ្ជាក់ថា "នេះគឺជាសក្ខីភាពមួយចំពោះការប្តេជ្ញាចិត្ត និងដៃគូអនុវត្តច្បាប់របស់ខ្លួនក្នុងការប្រយុទ្ធប្រឆាំងនឹងការជួញដូរក្លែងក្លាយនៅក្នុងទីក្រុងញូវយ៉កហើយចំពោះអ្នកលក់របស់ក្លែងក្លាយនេះក៏ទទួលត្រូវបានផ្តន្ទាទោសដាក់ពន្ធនាគារអតិបរមា១០ឆ្នាំ៕
អត្ថបទ៖ ធី ស្រីល័ក្ខ
