នេះជារឿងដ៏គួរឱ្យសោកស្តាយខ្លាំងមែនទែន ក្រោយឈរជើងរកស៊ីនៅថៃជាង១០ឆ្នាំ នាពេលនេះក្រុមហ៊ុនមួយរបស់ជប៉ុនគឺ Suzuki បានប្រកាសថាខ្លួននឹងបិទរោងចក្រចោលនៅថៃត្រឹមឆ្នាំ ២០២៥ នេះហើយក្រោយជួបបញ្ហាការលក់ធ្លាក់ចុះខុសពីការរំពឹងទុក។

យោងតាមការចុះផ្សាយដោយសារព័ត៌មាន Nikkei Asia បានឱ្យដឹងថា ក្រុមហ៊ុន Suzuki Motor Thailand (SMT) ត្រូវបានបង្កើតឡើងក្នុងឆ្នាំ២០១១នៅថៃ។ ហើយនៅឆ្នាំ២០១២ ក្រុមហ៊ុនក៏បានផលិតរថយន្តបានរហូតដល់ទៅ ៦ម៉ឺនគ្រឿងក្នុងមួយឆ្នាំមានទាំងរថយន្តសម្រាប់នាំចេញផងដែរ។

ប៉ុន្តែការរកស៊ីមិនមែនចេះតែឡើងរហូតឡើយ ដោយនៅក្នុងឆ្នាំ២០២៤ ក្រុមហ៊ុន Suzuki បែរជាប្រកាសពីការលក់ធ្លាក់ចុះទៅវិញ ដោយសារតែពេលនេះនៅក្នុងទីផ្សារប្រទសថៃកំពុងតែមានការប្រកួតប្រជែងទីផ្សាររថយន្តជាខ្លាំង ខណៈនាពេលនេះទីផ្សាររថយន្តអគ្គិសនីរបស់ចិនគឺកំពុងតែវាយលុកក្នុងទីផ្សារជាខ្លាំងផងដែរ រហូតធ្វើឱ្យក្រុមហ៊ុន Suzuki ទប់លែងជាប់បានប្រកាសពីការបិទរោងចក្រឈប់ផលិតនៅប្រទេសថៃត្រឹមឆ្នាំ២០២៥ ខាងមុខនេះហើយ។

គួរបញ្ជាក់ថា ទោះបីជាបិទរោងចក្រនៅប្រទេសថៃក៏ដោយ តែ CBUs នៅប្រទេសថៃក៏នៅតែនាំចូលរថយន្តពីក្រុមហ៊ុន Suzuki CBUs ពីរោងចក្រក្នុងតំបន់អាស៊ាន ក៏ដូចជាប្រទេសជប៉ុន និងឥណ្ឌា ដើម្បីបំពេញតម្រូវការអតិថិជនក្នុងប្រទេសថៃផងដែរ៕