នាពេលថ្មីៗកន្លងទៅនេះ រាជរដ្ឋាភិបាលបានលើកឡើងពីគម្រោងសាងសង់ផ្លូវល្បឿនលឿនទី៣ ដែលតភ្ជាប់ពីភ្នំពេញទៅក្រុងសៀមរាប។ ហើយបច្ចុប្បន្នគម្រោងនេះបានកំពុងធ្វើការ និងត្រៀមដើម្បីចុះហត្ថលេខាលើកិច្ចព្រមព្រៀងក្របខណ្ឌការងារ (Framework Agreement) នៅខែកញ្ញា ឆ្នាំ២០២៣ ខាងមុខនេះផងដែរ។
បើតាមការបញ្ជាក់ពីក្រសួងសាធារណការ និងដឹកជញ្ជូន បានឲ្យដឹងថាគម្រោងផ្លូវល្បឿនលឿនទី៣ នេះនឹងត្រូវសាងសង់ពីភ្នំពេញឆ្លងកាត់ខេត្ដកំពង់ធំឆ្ពោះទៅក្រុងសៀមរាបតែម្ដង។ ហើយការសាងសង់ផ្លូវនេះក៏នឹងផ្ដល់នូវអត្ថប្រយោជន៍ និងប្រសិទ្ធភាពសេដ្ឋកិច្ច-សង្គមយ៉ាងច្រើនផងដែរ។
សូមជម្រាបផងដែរថា គិតមកដល់ពេលនេះកម្ពុជាបានសាងសង់ផ្លូវល្បឿនលឿននេះរួចរាល់មួយខ្សែហើយ ដែលតភ្ជាប់ពីភ្នំពេញទៅក្រុងព្រះសីនុ ខណៈទើបដាក់ឲ្យដំណើរការផ្លូវការកាលពីចុងឆ្នាំ២០២២កន្លងទៅ។ ហើយបច្ចុប្បន្ននេះ រាជរដ្ឋាបាលបាននឹងកំពុងសិក្សាសាងសង់ផ្លូវល្បឿនលឿននេះ ២ ខ្សែទៀតផងដែរ ដែលក្នុងនោះមានពីភ្នំពេញទៅក្រុងបាវិត ដែលគ្រោងនឹងបើកការដ្ឋាននៅពាក់កណ្ដាលឆ្នាំនេះ និងមួយខ្សែទៀតគឺតភ្ជាប់ពីភ្នំពេញទៅក្រុងសៀមរាបនេះតែម្ដង៕
អត្ថបទ៖ កឹម ប៊ុនធឿន
