ទីបំផុតគំរូប្លង់នៃការសិក្សាគម្រោងសាងសង់ផ្លូវល្បឿនលឿនភ្នំពេញ-សៀបរាម ត្រូវបានបង្ហាញហើយនៅក្នុងកិច្ចប្រជុំរវាងក្រុមហ៊ុនស្ពាន និងថ្នល់ចិន (CRBC) និងរដ្ឋបាលខេត្ដកំពង់ចាមស្ដីពីការផ្ដល់ព័ត៌មានបច្ចេកទេសគម្រោងផ្លូវមួយនេះ។ កិច្ចប្រជុំនេះមានការអញ្ជើញចូលរួមពីឯកឧត្តម ហេង វណ្ណនី អភិបាលរងខេត្ត តំណាងឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នាយករដ្ឋបាលសាលាខេត្ត មន្ទីរ-អង្គភាពជំនាញ មន្ត្រីពាក់ព័ន្ធ និងតំណាងក្រុមហ៊ុនសាងសង់ផងដែរ។

យោងតាមគំរូប្លង់ដែលដាក់បង្ហាញនៅក្នុងកិច្ចប្រជុំខាងលើកាលពីថ្ងៃទី២៥ ខែមេសា ឆ្នាំ២០២៣ គម្រោងផ្លូវល្បឿនលឿនថ្មីនេះនឹងឆ្លងកាត់រាជធានីភ្នំពេញ ខេត្ដកណ្ដាល ខេត្ដកំពង់ចាម ខេត្ដកំពង់ធំ និងខេត្ដសៀមរាប។ ជាក់ស្ដែងកាលពីពេលថ្មីៗនេះ ក្រសួងសាធារណការ និងការដឹកជញ្ជូន បានចេញលិខិតជម្រាបជូនដើម្បីស្នើសុំឲ្យអភិបាលនៃគណៈភិបាលរាជធានី-ខេត្ដទាំង ៥ ជួយគាំទ្រដល់ដំណើរការសិក្សារបស់ក្រុមហ៊ុន CRBC លើគម្រោងសិក្សាផ្លូវល្បឿនលឿនភ្នំពេញ-សៀមរាបនេះផងដែរ។

សូមជម្រាបថា គម្រោងផ្លូវល្បឿនលឿនភ្នំពេញ-ខេត្ដសៀមរាបនេះ គឺជាគម្រោងផ្លូវល្បឿនលឿនទី៣ ហើយនៅក្នុងប្រទេសកម្ពុជា បន្ទាប់ពីគម្រោងផ្លូវល្បឿនលឿនទី១ ភ្នំពេញ-ក្រុងព្រះសីហនុ បានបើកដំណើរការកាលពីចុងឆ្នាំ២០២២ កន្លងទៅ និងគម្រោងផ្លូវល្បឿនលឿនទី២ ភ្នំពេញ-ក្រុងបាវិត ក៏ត្រៀមបើកការដ្ឋានសាងសង់នៅថ្ងៃទី៧ ខែមិថុនា ខាងមុខនេះ៕

អត្ថបទ៖ កឹម ប៊ុនធឿន