ទុរេន គឺជាផ្លែឈើមួយប្រភេទដែលពេញនិយមបំផុតក្នុងចំណោមប្រជាជនខ្មែរ និងទូទាំងអាស៊ីអាគ្នេយ៍។ យ៉ាងណាមិញសេ្តចផ្លែឈើដែលមានក្លិនឈ្ងុយដិតនេះ និងមានតម្លៃថ្លៃធ្វើឲ្យគេរិះរកមធ្យោបាយផ្សេងៗដើម្បីកែច្នៃទុរេនឲ្យអស់លទ្ធភាព។ ខាងក្រោមនេះ គឺជាវិធីប្លែកៗក្នុងការកែច្នៃក្តិប និងសំបកទុរេន៖
១. ផលិតផលថែរក្សាសម្រស់៖ តាមរយៈការសិក្សាថ្មីៗនេះរបស់ Chulalongkorn University ប្រទេសថៃបានឲ្យដឹងថា ក្តិបទុរេនមានផ្ទុកសារធាតុសកម្មមួយចំនួនដូចជា ប៉ិចទីន ប្រូសេអានីឌីន ដែលជួយផ្តល់សំណើម និងប្រឆាំងអុកស៊ីតកម្ម។ ហេតុដូចនេះហើយ ទើបគេអាចយកក្តិបទុរេនទៅផលិតជាក្រែមផ្តល់សំណើម និងសេរ៉ូមសម្រាប់ដោះស្រាយបញ្ហាស្បែកមុខស្ងួត និងជួយឲ្យស្បែកតឹងណែនជាដើម។
ក្រឡេកទៅមើលកសិករដាំដុះទុរេនគេតែងបេះក្តិបទុរេនមួយចំនួនចោលដោយទុកតែក្តិបណាដែលមានសុខភាពល្អតែប៉ុណ្ណោះ។តាមរយៈការស្រាវជ្រាវនេះដែរនឹងជួយកាត់បន្ថយការខ្ជះខ្ជាយបង្កើនចំណូលដល់កសិករក៏ដូចជាបំផុសគំនិតច្នៃប្រឌិតនៅក្នុងឧស្សាហកម្មគ្រឿងសម្អាងជាដើម។ នេះបើតាមការលើកឡើងរបស់លោកសាស្ត្រាចារ្យ Supaart Sirikantaramas អ្នកជំនាញផ្នែកជីវៈគីមី មកពីសាកលវិទ្យាល័យជូឡាឡុងកនប្រទេសថៃ។
២. ផលិតជី៖ សំបកទុរេនដែលសល់បន្ទាប់ពីការយកសាច់បរិភោគ ពិតជាអត្ថប្រយោជន៍ដែលនឹកស្មានមិនដល់។ បើយោងតាមសារព័ត៌មាន KHANH HOA NEWS របស់ប្រទេសវៀតណាមបានឲ្យដឹងថា សំបកទុរេនអាចផលិតចេញជាជីប្រភេទ Biochar និង Wood vinegar ដែលជាប្រេងមានសមត្ថភាពអាច ជួយឲ្យរុក្ខជាតិលូតលាស់បានល្អ រឹងមាំ ធន់នឹងជំងឺ និងការពារសត្វល្អិតជាដើម។
បើតាមលោក Nguyen Van Xuan នាយកក្រុមហ៊ុន Resa Energy Joint Stock Company បានរៀបរាប់ឲ្យដឹងពីដំណើរការនៃការផលិតនេះថាដំបូងលោកធ្វើកាបូននីយកម្មសំបកទុរេននៅក្នុងឡដែលមានកម្តៅក្តៅខ្លាំងដើម្បីទទួលបានផលិតផលសម្រេច។ លោកបន្តថាប្រេង Wood vinegar អាចលក់ចេញបានក្នុងតម្លៃពី១០ទៅ១៥ម៉ឺនដុងក្នុង១លីត្រឯណោះ ហើយគេពេញនិយមប្រើវាសម្រាប់ការបំប៉នរុក្ខជាតិជាច្រើនប្រភេទ។
ក្នុងនោះក្រៅពីវិធីខាងលើនេះ ក៏នៅមានវីធីផ្សេងៗទៀតក្នុងការកែច្នៃសាច់ សំបក និងគ្រាប់ទុរេនផងដែរ។ លើសពីនេះ ទុរេនក៏មានប្រយោជន៍ជាច្រើននៅក្នុងវិស័យ កសិកម្ម សុខាភិបាល និងទេសចរណ៍ជាដើម៕
អត្ថបទដោយ៖ ដារ៉ូ
