ជាការពិតណាស់ មានបងប្អូនមួយចំនួនតែងតែរអ៊ូរទាំថា ប្រាក់ខែដែលបានមកចាយមិនដែលគ្រាន់សោះ ចាយពេលណាក៏សល់ថ្ងៃ ហើយក៏មានអ្នកខ្លះទៀតរអ៊ូថាខំធ្វើការដល់១ខែទម្រាំបានលុយ តែពេលបើកលុយមកចាយតែ១អាទិត្យអស់បាត់ ខណៈដែលខ្លួនអាយុកាន់តែច្រើនមិន ទាន់សល់អ្វីនៅក្នុងខ្លួនទាល់តែសោះ។ ខាងក្រោមនេះជារឿងធំៗ៤ ដែលបងប្អូន ត្រូវតែចៀសឱ្យបានបើមិនចង់វេទនាដល់ឆ្នាំក្រោយទេ៖

១.កុំបង់រំលស់៖ នរណាក៏ចង់បានរបស់ដែលខ្លួនស្រលាញ់ដែរ នរណាក៏ចង់ប្រើរបស់ល្អ ដែរ ក៏ប៉ុន្តែបើចំណូលនៅតិចនៅចាយលុយសល់ថ្ងៃទេកុំលោតហក់ទៅទិញរបស់ ដែលហួសសមត្ថភាពរបស់ខ្លួនអី។ ដូច្នេះបើមិនចង់ឱ្យឆ្នាំថ្មីវេទនាទេ បងប្អូនត្រូវប្តូរទម្លាប់ នេះចេញឱ្យលឿនសូមបងប្អូនកុំគិតថា ទៅបង់រំលោះរបស់ខ្លួនស្រលាញ់ចេះតែបង់ៗទៅ ភ្លេចៗខ្លួនដាច់ហើយ។ បងប្អូនត្រូវចាំថា បើនៅតែគិតបែបនេះទាំងចំណូលខ្លួនមិននឹងធឹង ប្រាកដណាស់អ្នកកំពុងតែធ្វើបាបខ្លួនឲ្យស៊ីអត់ស៊ីឃ្លានជាមិនខានឡើយ។

២.ឱ្យគេខ្ចី៖ ជាការពិត ពេលដែលមានគេខ្ចីលុយ អ្នកប្រហែលជាយល់ដល់ទំនាក់ទំនង រាប់អាន ទើបមិនហ៊ានបដិសេធអ្នកដែលមកខ្ចីលុយ ប៉ុន្តែអ្នកត្រូវដឹងថា កុំយល់រហូតដល់ ថ្នាក់ឱ្យគេខ្ចីតាំងខ្លួនឯងកំពុងខ្វះខាត។ ធ្វើបែបនេះមិនមែនរក្សាមិត្តភាពទេ ប៉ុន្តែវាស្មើនឹងបំផ្លាញទំនាក់ទំនងរវាងគ្នាទៅវិញ។ បើ អ្នកមិនសូវមានលុយហើយឱ្យគេខ្ចីប្រើ ដល់ពេលអ្នកមានបញ្ហាត្រូវការលុយភ្លាមៗ ហើយ គេក៏គ្មានលទ្ធភាពសង អ្នកច្បាស់ជាអន់ចិត្ត។

៣. ចេញរកស៊ីតាមគេ៖ ការសម្រេចចិត្តចេញរកស៊ីតាមក្តីស្រមៃគឺជារឿងល្អ ប៉ុន្តែបើអ្នកចាប់ផ្តើមធំពេក វាអាចនាំឱ្យអ្នកមានបញ្ហាឬម្យ៉ាងទៀតអ្នកចេះតែយកលុយទៅរកតាមគេ ទាំងដែលខ្លួនមិនមានជំនាញអ្វីមួយច្បាស់លាស់វាប្រាកដជាបង្កឱ្យមានបញ្ហាប្រឈមនឹង រឹតតែធ្ងន់បើអ្នកគ្មានចំណូលសម្រាប់ទប់ទល់គ្រប់គ្រាន់។ ដើម្បីការពារខ្លួន អ្នកគួរតែកុំទាន់ ធ្វើអីមួយតាមគេ អ្វីដែលគួរធ្វើគឺត្រូវរកលុយឱ្យសល់សិនកុំមានលុយតែតិចតួចទៅរកស៊ី តាមគេទាំងខ្លួនមិនយល់ពីការរកស៊ីបងប្អូនត្រូវចាំថាសន្សឹមៗសិន ទៅមុខម្តងបន្តិចៗ ទើប អាចលូតលាស់រឹងមាំល្អមិនប្រហោងក្នុង។

៤.ចងការប្រាក់៖ កុំទម្លាប់ចងការលុយគេយកមកចាយ ព្រោះថាកម្ចីប្រភេទនេះ មានការ ប្រាក់ខ្ពស់ណាស់។ អ្នកអាចនឹងគិតថាលុយប្រភេទនេះ ខ្ចីឆាប់បាន ខ្ចីទាន់ចិត្ត ប៉ុន្តែត្រូវ ដឹងផងទៅថា លក្ខខណ្ឌសងរបស់វាមិនមែនធូរៗស្រួលៗដូចពេលខ្ចីនោះទេចងការ គេយកលុយមកចាយធូរៗដល់ពេលសងគេយូរៗការស្មើដើមបំណុលវ័ណ្ឌកមិនខានឡើយ។

ដូច្នេះហើយ សម្រាប់បងប្អូនដែលចង់សល់លុយនិងមិនចង់វេទនាដល់ឆ្នាំក្រោយទៀតនោះ បងប្អូនត្រូវចៀសកំហុសទាំង៤ខាងលើនេះឱ្យបាន បងប្អូនត្រូវដឹងថាលុយពិបាករកណាស់ ទម្រាំតែបានលុយគឺហត់នឿយណាស់ ដូច្នេះមុនចាយត្រូវគិតកុំចេះតែចាយតាមចង់៕