យោងតាមសេចក្តីណែនាំរបស់ក្រសួងរ៉ែនិងថាមពលបានឱ្យថា ក្រសួងនឹងធ្វើការអនុគ្រោះពិសេសចំពោះអ្នកប្រើប្រាស់ភ្លើង នៅពេលយប់ ចាប់ពីម៉ោង ៩:០០យប់ ដល់ម៉ោង ៧:០០ព្រឹក ដោយឱ្យបង់ថ្លៃអគ្គិសនីត្រឹមតែ ៤៨០រៀលក្នុង១គីឡូវ៉ាត់ម៉ោងប៉ុណ្ណោះ។

ក្នុងនោះប្រភេទអាជីវកម្មដែលត្រូវបានក្រសួងរ៉ែនិងថាមពលនឹងធ្វើការអនុគ្រោះថ្លៃភ្លើងរួមមាន ៖

១.ការដាំដុះ ចិញ្ចឹមសត្វ

២.ធ្វើសកម្មភាពបម្រើឱ្យសកម្មភាព ដូចជា ៖ ការបូមទឹក ការសម្ងួត ការបង្កក ការផលិតជីកសិកម្ម។ល។

៣.ធ្វើសកម្មភាពកែច្នៃផលិតផលចេញពីសកម្មភាពក្នុងចំណុច១ មានដូចជា ៖ ម៉ាស៊ីនកិនស្រូវ រោងចក្រកែច្នៃជាគ្រឿងកំប៉ុង រោងចក្រច្នៃម្ហូបអាហារ/ភេសជ្ជៈ រោងចក្រផលិតចំណីសត្វ។ល។

ក្នុងសេចក្តីជូនដំណឹងដដែលបានបន្តថា សម្រាប់អាជីវកម្មឬអ្នកប្រើប្រាស់ដែលអាចទទួលបានការអនុគ្រោះពិសេស ៤៨០រៀលក្នុងមួយគីឡូវ៉ាត់ម៉ោង ចាប់ពីម៉ោង ៩:០០យប់ ដល់ម៉ោង ៧:០០ ព្រឹក មានលក្ខខណ្ឌប្រើប្រាស់ដូចខាងក្រោម៖

១.ប្រើជាសហគមន៍

• សហគមន៍ត្រូវចាត់បុគ្គល១រូប តំណាងសហគមន៍ ហើយបុគ្គលនោះត្រូវដាក់ពាក្យស្នើសុំប្រើប្រាស់អគ្គិសនី/ស្នើសុំប្តូរប្រភេទអ្នកប្រើប្រាស់ ទៅអ្នកផ្គត់ផ្គង់អគ្គិសនីតំបន់នោះ(អគ្គិសនីកម្ពុជា ឬអ្នកផ្គត់ផ្គង់ឯកជន) តាមរយៈអាជ្ញាធរឃុំ/សង្កាត់។
• ក្នុងករណីទីតាំងស្នើសុំនោះឋិតក្នុងតំបន់របស់អ្នកផ្គត់ផ្គង់ឯកជនត្រូវស្នើសុំបន្តទៅមូលនិធិអគ្គិសនីភាវូបនីយកម្មជនបទ (ម.អ.ជ) របស់អគ្គិសនីកម្ពុជាដើម្បីសុំការឯកភាព។

២.ការប្រើប្រាស់ជារូបវន្តបុគ្គល ឬនីតិបុគ្គល

• អ្នកស្នើសុំត្រូវដាក់ពាក្យស្នើសុំប្រើប្រាស់អគ្គិសនី/ស្នើសុំប្តូរប្រភេទអ្នកប្រើប្រាស់ ទៅអ្នកផ្គត់ផ្គង់អគ្គសនីនៅតំបន់នោះ (អគ្គិសនីកម្ពុជា ឬអ្នកផ្គត់ផ្គង់ឯកជន)
• ក្នុងករណីទីតាំងស្នើសុំនោះឋិតក្នុងតំបន់របស់អ្នកផ្គត់ផ្គង់ឯកជន អ្នកផ្គត់ផ្គង់ឯកជនត្រូវស្នើសុំបន្តទៅមូលនិធិអគ្គិសនីភាវូបនីយកម្មជនបទ (ម.អ.ជ) របស់អគ្គិសនីកម្ពុជាដើម្បីសុំការឯកភាព។

សម្រាប់ព័ត៌មានបន្ថែមសម្រាប់ជួយពន្យល់ និងបំភ្លឺបន្ថែមអំពីគោលការណ៍និងនីតិវិធីនៃការអនុវត្តអត្រាថ្លៃអនុគ្រោះពិសេស ៤៨០រៀល ក្នុងមួយគីឡូវ៉ាត់ម៉ោងនេះ បងប្អូនអាចធ្វើការទំនាក់ទំនងតាមរយៈលេខទូរស័ព្ទ 077 222 012 / 090 903 311 ៕

អត្ថបទដោយ៖សម្បត្តិ សុខឡាង