តួអង្គពូកែវោហារ មានប្រាជ្ញាចាក់ទឹកមិនលិច ស៊ិន វ៉ាន់សាន ក្នុងរឿង The Magic bowl បានអង្រួនបេះដូងអ្នកស្នេហាខ្សែភាពយន្តបុរាណចិនតាមដានទស្សនាជក់ចិត្ត សិក្សាពីគំនិតធ្វើជំនួញសម្បូរបែប។ តោះ! ថ្ងៃនេះយើងនឹងមករូតវាំងននមើលប្រវត្តិក្រៅឆាក របស់តួអង្គ សិន វ៉ាន់សាន មិនត្រឹមតែមានរូបសម្បត្តិស្រស់សង្ហា មានសមត្ថភាព ថែមទាំងជាសេដ្ឋីលាក់មុខទៀត។
បុរសសម្បូរស្នេហ៍ពូកែក្លែមសម្តីវៃខាងឆ្កឹះប្រាក់តួអង្គ ស៊ិន វ៉ានសាន មានឈ្មោះពិតថា Dicky Cheung (张卫健) កើតនៅថ្ងៃទី០៨ ខែកុម្ភះ ឆ្នាំ១៩៦៥ នាប្រទេសចិន។ ក្នុងនាមជាក្មេងកំព្រាឪពុកម្តាយលែងលះគ្នាពេលឈានចូលដល់វ័យ១៤ឆ្នាំ Cheung ត្រូវរស់នៅជាមួយភាពឯកា ក្តីភ័យខ្លាច និងតែងត្រូវឪពុកបង្កើតប្រើអំពើហិង្សាលើរាងកាយស្ទើររាល់ថ្ងៃ។ ប៉ុន្តែជាភ័ព្វសំណាង ក្មេងជំទង់រូបនេះអាចទទួលបានការសិក្សាអប់រំចប់ចុងចប់ដើមនៅទីក្រុងហុងកុង និងបានរកឃើញទេពកោសល្យរបស់ខ្លួនជាតារាសម្តែងនៅពេលដែលលោកចូលចិត្តសង្កេតអាកប្បកិរិយារបស់មនុស្សនិងការច្រៀងចម្រៀង។
ដំណើរជីវិតក្រឡិចក្រឡុកដូចជិះលើផ្លូវរលាក់ ជំហានដំបូងក្នុងវិថីសិល្បៈ កំលោះ Cheung បានតស៊ូក្រាញ់ននៀលអស់ជាច្រើនឆ្នាំដោយគ្មាននរណាទទួលស្គាល់ ឬមើលឃើញពីសមត្ថភាពរបស់រូបលោកឡើយ។ នៅឆ្នាំ១៩៨៤ លោកបានចូលប្រឡងចម្រៀងក្នុងកម្មវិធីទូរទស្សន៍ចិនមួយ ប៉ុន្តែវាមិនមែនជាការចាប់ផ្តើមដ៏ល្អនោះទេ ក៏ធ្វើឱ្យលោកផ្លាស់អាជីពមកចូលសម្តែងវិញម្តង។ ក្រោយសម្តែងជាតួរាយរងរយៈពេល៨ឆ្នាំ រហូតដល់ឆ្នាំ១៩៩១ លោកទទួលបានឱកាសគ្រងតំណែងជាតួអង្គសំខាន់លើកដំបូងក្នុងវ័យ២៦ឆ្នាំ។
តែទោះជាយ៉ាងណា ខ្សែភាពយន្ដដំបូងនេះហាក់ពុំសូវមានការគាំទ្រឡើយ លុះលោកបានសម្តែងជាតួអង្គឯកស្តេចស្វាក្នុងរឿង Journey to the West ទើបផ្ទុះការគាំទ្រខ្លាំងទាំងនៅហុងកុង និងសាយភាយជុំវិញតំបន់អាស៊ី។ លើសពីនេះរឿង The Magic bowl ដែលខ្មែរយើងហៅថា កំពូលអ្នកជំនួញ ស៊ិន វ៉ាន់សាន ឆ្លុះបញ្ចាំពីតថភាពជីវិតនៃការតស៊ូរបស់យុវជនក្រីក្រ ធ្វើបដិវត្តន៍ខ្លួនពីកូនកសិករក្រតជំនាន់មកជាអ្នកជំនួញក្នុងរជ្ជកាលរាជវង្សមីង ដែលផលិតក្នុងឆ្នាំ២០០៣ ធ្វើឱ្យលោកកាន់តែមានភាពល្បីល្បាញថែមមួយកម្រិតទៀត និងបានចូលរួមសម្តែងក្នុងខ្សែភាពយន្តខ្នាតធំចំនួន ៤៨រឿង គិតតាំងពីថ្ងៃចាប់ផ្តើមរហូតដល់បច្ចុប្បន្ន។
នៅចុងឆ្នាំ១៩៩៧ Cheung បានជួបអ្នកនាង Jess Zhang ដែលជាតារាសម្តែងដូចគ្នាកំឡុងពេលពួកគេត្រូវថតនៅទីតាំងតែមួយ។ ស្នេហាផ្លេកបន្ទោរ ឃើញភ្លាមចាប់ចិត្តភ្លែត Cheung តែងតែទិញទឹកសុទ្ធសម្រាប់ Zhang ជារឿយដើម្បីតាមចែចង់នាង រហូតធ្វើឲ្យនាក់ទំនងនាក់អ្នកទាំងពីរកាន់តែរីកចម្រើន និងបានសម្រេចចិត្តកាន់ដៃគ្នាចូលរោងការកសាងគ្រួសារមួយពេញច្បាប់នៅទីក្រុងប៉េកាំងក្នុងឆ្នាំ២០០៧។
ជាចុងក្រោយតារាសម្តែងវ័យ៥៨ឆ្នាំ ខាងលើធ្លាប់បានលើកឡើងអំពីបំណងរបស់ខ្លួនថា នៅពេលណាដែលលោកលាឈប់ពីអាជីពជាអ្នកសម្តែង លោកនឹងបន្តអន្ថន័យជីវិតតាមរយៈ ការស័្មគ្រចិត្តលះបង់ដើម្បីសង្គម និងធ្វើកិច្ចការមនុស្សធម៌ជាដើម។ បច្ចុប្បន្នលោកត្រូវបានគេប៉ាន់ស្មានថា មានទ្រព្យសម្បត្តិប្រមាណ ៥លានដុល្លារ គិតត្រឹមចុងឆ្នាំ២០២២ ចេញផ្សាយដោយគេហទំព័រ allfamousbirthday។
ខាងក្រោមនេះគឺជាទស្សនៈកំពូលទាំង៥ របស់បុរសជើងខ្លាំងប្រឡុកពិភពជំនួញ សិន វ៉ាន់សាន៖
១/. អ្នករកស៊ីពីទិសខាងកើតលក់ទៅទិសខាងលិច ឆ្លងកាត់ជិតឆ្ងាយ បែងចែកថោកថ្លៃ បែងចែកច្រើនតិច លើលោកនេះ មិនអាចអត់មានអ្នករកស៊ីទេ។
២/. ចង់ឲ្យជំងឺក្រជាដាច់ត្រូវពឹងទៅលើខ្លួនឯង ត្រូវចេះធ្វើឲ្យប្រាក់តូចក្លាយជាប្រាក់ធំ ធ្វើឲ្យប្រាក់ធំកើតជាប្រាក់តូចៗ។
៣/. បញ្ហាគេ គឺជាមុខរបរយើង។
៤/. កំសាក មិនមែនជាសុភាពបុរសទេ។
៥/. ដួលហើយ ត្រូវប្រឹងងើបដោយខ្លួនឯង៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
