ក្រុមហ៊ុន  Denso ដែលជាក្រុមហ៊ុនផលិតគ្រឿងបន្លាស់រថយន្ដក៏ធំ១របស់ប្រទេសជប៉ុន ដែលកំពុងដំណើរការអាជីវកម្មរបស់ខ្លួននៅក្នុងប្រទេសកម្ពុជាបានលើកឡើងថាខ្លួនគ្រោងនឹងពង្រីករោងចក្របន្ថែម និងត្រូវការកម្លាំងពលកម្មចំនួន ៧០០ នាក់។ ការបញ្ជាក់នេះត្រូវបានធ្វើឡើងនៅក្នុងជំនួបរវាងឯកឧត្ដម ជា វុទ្ធី អគ្គលេខាធិការគណៈកម្មការវិនិយោគកម្ពុជា និងលោក អ៊ីនីហ្សីកា ណាអូតូ នាយកប្រតិបត្ដិរបស់ក្រុមហ៊ុនប្រចាំតំបន់អាស៊ី កាលពីថ្ងៃទី១៣ ខែវិច្ឆិកា ឆ្នាំ២០២៣។

លោក អ៊ីនីហ្សីកា ណាអូតូ បានឲ្យដឹងថា បច្ចុប្បន្នមានកម្មករប្រមាណជាង ៥០០ នាក់ បាននិងកំពុងបម្រើការងារនៅក្នុងរោងចក្រ Denso ហើយនៅឆ្នាំក្រោយនេះ ក្រុមហ៊ុននឹងមានគម្រោងផ្ដល់ឱកាសការងារបន្ថែមទៀតប្រមាណ ៧០០ កន្លែង។ 

លើពីនេះទៀតលោកក៏បានជម្រាបជូនផងដែរពីកិច្ចសហប្រតិបត្ដិការរវាងក្រុមហ៊ុន Denso និងវិទ្យាស្ថានបច្ចេកវិទ្យាកម្ពុជា (សាលាតិចណូ) រហូតឈានដល់ការចុះអនុស្សារណៈយោគយល់គ្នា ស្ដីពីការអភិវឌ្ឍមូលធនមនុស្សហើយក្នុងនោះ បុគ្គលិកដែលជាវិស្វករចំនួន ១០០ នាក់ដែលបាននិងកំពុងបម្រើការងារនៅក្នុងរោងចក្រ Denso បច្ចុប្បន្នមាន ៥០ នាក់គឺជាសិស្សដែលបានបញ្ចប់ការសិក្សាមកពីសាលាតិចណូ។

ជាមួយគ្នានេះ ឯកឧត្ដម ជា វុទ្ធី ក៏បានសម្ដែងនូវការអបអរសាទរចំពោះការរីកម្រើនរបស់ក្រុមហ៊ុនដែលឈានទៅដល់គម្រោងពង្រីករោងចក្រ ជាពិសេសការបណ្ដុះបណ្ដាលមូលធនមនុស្សកម្ពុជាដើម្បីបង្កើនផលិតភាពរបស់ក្រុមហ៊ុន។

សូមជម្រាបថា ក្រុមហ៊ុន Denso បានធ្វើការបោះទុនវិយោគបង្កើតរោងចក្រផលិតគ្រឿងបន្លាស់រថយន្ដនៅក្នុងប្រទេសកម្ពុជាតាំងពីឆ្នាំ២០១៣ មកម៉្លេះ ពោលគិតមកដល់បច្ចុប្បន្ននេះគឺមានរយៈពេល ១០ ឆ្នាំហើយ។ ហើយរោងរោងចក្រនេះគឺមានទីតាំងស្ថិតនៅតំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ៕