អាចនិយាយបានថា សម្រាប់ប្ដីប្រពន្ធដែលចង់ឆាប់ធូរធារ និងមានស្ថិរភាពហិរញ្ញវត្ថុ រឿងសំខាន់បំផុតគឺ ភាពជាដៃគូ និងការសហការគ្នាក្នុងគ្រួសារ។ ប្រសិនបើម្នាក់ប្រឹងរក តែម្នាក់ទៀតប្រឹងចាយ ឬមិនមានគោលដៅរួមគ្នាទេ នោះពិបាកនឹងធូរធារណាស់។ ដូច្នេះ ខាងក្រោមនេះ ជាវិធានការ និងទម្លាប់សំខាន់ៗដែលប្ដីប្រពន្ធគួរបង្កើត និងអនុវត្តរួមគ្នា៖

១. បង្កើតគោលដៅហិរញ្ញវត្ថុរួមគ្នា
-ពិភាក្សាដោយចំហ៖ និយាយគ្នារឿងចំណូល ចំណាយ និងបំណុល ដោយស្មោះត្រង់ មិនលាក់បាំង។
-កំណត់គោលដៅច្បាស់លាស់៖ ព្រមព្រៀងគ្នាថាចង់បានអ្វី (ឧទាហរណ៍ថា ចង់ទិញផ្ទះ បើកអាជីវកម្ម ឬសន្សំប្រាក់) ក្នុងរយៈពេល ១ឆ្នាំ ៣ឆ្នាំ ឬ ៥ឆ្នាំខាងមុខ។

 ២. ចាត់ចែងថវិការួម និងគ្រប់គ្រងការចំណាយ

ត្រូវបែងចែកចំណូល តាមច្បាប់ ៥០ ៣០ ២០៖
 -៥០% សម្រាប់តម្រូវការចាំបាច់ (ម្ហូបអាហារ បន្ទប់ជួល ឬបង់ផ្ទះ ទឹកភ្លើង)
 -៣០% សម្រាប់បំណងប្រាថ្នា (ការកម្សាន្ត ដើរលេង របស់ប្រើប្រាស់)
​ -២០% សម្រាប់ ការសន្សំ និងវិនិយោគ (ដាច់ខាតត្រូវដកសន្សំមុនចាយ)

កាត់បន្ថយការចំណាយមិនចាំបាច់៖ កាត់បន្ថយការទិញរបស់តាមអារម្មណ៍ ឬការសម្ភារនិយមជ្រុល។

៣. បង្កើតប្រភពចំណូលច្រើនផ្លូវ
-កុំពឹងលើចំណូលតែមួយ៖ ប្រសិនបើធ្វើការប្រាក់ខែទាំងពីរនាក់ គួរស្វែងរកវិធីបង្កើនចំណូលបន្ថែមដូចជា ការធ្វើអាជីវកម្មបន្ថែមតាមអនឡាញ ការទទួលកាងារហ្វ្រីឡេន (Freelance) ឬការវិនិយោគផ្សេងៗ។
-បង្កើនជំនាញបន្ថែម៖ រៀនសូត្របន្ថែមដើម្បីទទួលបានការដំឡើងតំណែង ឬឱកាសការងារដែលផ្តល់ប្រាក់ខែខ្ពស់ជាងមុន។

៤. ចេះយកលុយទៅវិនិយោគឲ្យកើតជាកូនចៅលុយ
-កុំទុកលុយឲ្យនៅស្ងៀម៖ លុយសន្សំពេលមានគ្រប់គ្រាន់ហើយ ត្រូវយកទៅវិនិយោគលើអចលនទ្រព្យ ភាគហ៊ុន អាជីវកម្ម ឬទិញមាស ដើម្បីការពារលុយពីអតិផរណា និងបង្កើតផលចំណេញ។
-បង្កើតមូលនិធិបន្ទាន់៖ មានលុយសន្សំសម្រាប់អាសន្ន (យ៉ាងហោចណាស់ ៣ ទៅ ៦ ខែនៃចំណាយ) មុននឹងយកលុយទៅវិនិយោគ ដើម្បីកុំឲ្យប៉ះពាល់ដល់ការរស់នៅពេលមានហេតុការណ៍ចៃដន្យ។

៥. គ្រប់គ្រង និងចៀសវាងបំណុលអាក្រក់
បំណុលល្អ vs បំណុលអាក្រក់៖
 -បំណុលល្អ៖ កម្ចីយកទៅធ្វើអាជីវកម្ម ឬទិញទ្រព្យសកម្មដែលបង្កើតចំណូល។
 -បំណុលអាក្រក់៖ កម្ចីទិញរបស់ប្រើប្រាស់ ឬសម្ភារនិយមដែលបញ្ចុះតម្លៃ (ដូចជា ទូរស័ព្ទស៊េរីទំនើប ឡានជិះកម្សាន្ត)។
ប្រសិនបើមានបំណុលស្រាប់ ត្រូវប្រឹងប្រែងបង់ផ្តាច់បំណុលដែលមានការប្រាក់ខ្ពស់ជាងគេមុនគេ។

៦. រក្សាភាពចុះសម្រុង ភក្ដីភាព និងការផ្តល់កម្លាំងចិត្ត
-ផ្ដល់កម្លាំងចិត្តគ្នា៖ រាល់ពេលចួបការលំបាកផ្នែកហិរញ្ញវត្ថុ កុំបន្ទោសគ្នា តែត្រូវជួយគ្នារកដំណោះស្រាយ។
-អបអរសាទរជោគជ័យតូចៗ៖ ពេលសម្រេចបានគោលដៅសន្សំ ឬវិនិយោគណាមួយ ត្រូវរីករាយ និងលើកទឹកចិត្តគ្នាទៅវិញទៅមក។

-កុំលួចលាក់ផិតក្បត់គ្នា៖ ទោះបីកាលៈទេសៈ មានលុយតិច ឬច្រើនក្ដី ត្រូវស្មោះត្រង់ជាមួយគ្នា មិនមានអ្នកទីបីមកជ្រៀតជ្រែក។

យ៉ាងណាក៏ដោយ គ្រួសារមួយធូរធារ មិនមែនមកពីការរកលុយបានច្រើនតែមួយមុខនោះទេ គឺបានមកពី ការរួមបេះដូងគ្នា ខិតខំដូចគ្នា រួមគំនិតគ្នារៀបចំ និងរួមដៃគ្នាប្រកបដោយវិន័យ និងភាពស្មោះត្រង់ និងទុកចិត្តគ្នាទៅវិញទៅមក។ កាលណាមានទំនុកលើគ្នាហើយ គ្រួសារនឹងទទួលបានភាពសុខសាន្ត រកស៊ីចេះតែកាក់កប ហើយកាន់តែមានសុខភមង្គលផងដែរ។