គិតចាប់ពីថ្ងៃចាប់ផ្ដើមរហូតដល់បច្ចុប្បន្នគម្រោងផ្លូវថ្មី១ខ្សែតភ្ជាប់ឧទ្យានជាតិ ព្រះមុនីវង្សបូកគោ ឆ្ពោះទៅកាន់ផ្លូវជាតិលេខ៤ ដែលមានប្រវែងសរុប៦១គីឡូម៉ែត្រ សម្រេចការឈូសឆាយបានប្រមាណជា៥២គីឡូម៉ែត្រហើយ ខណៈសល់ត្រឹម៩គីឡូម៉េត្រទៀតប៉ុណ្ណោះនឹងបញ្ចប់ការឈូសឆាយតែម្ដង។ នេះបើយោងតាមការចេញផ្សាយរបស់គេហទំព័រ សុខាអចលនទ្រព្យ កាលពីថ្ងៃ១៩ ខែមីនា ឆ្នាំ២០២៣។
តាមការបញ្ជាក់ពីសុខា អចលនទ្រព្យ បានបញ្ជាក់ថា កាលពីថ្ងៃទី១៨ ខែមីនា កន្លងទៅ អ្នកឧកញ៉ាបណ្ឌិត សុខ គង់ បានអញ្ជើញចុះត្រួតពិនិត្យផ្លូវនេះផងដែរ។ តាមការពិនិត្យរហូតមកដល់ពេលនេះ ការឈូសឆាយគឺសម្រេចបាន៥២គីឡូម៉ែត្រហើយ នៅសល់ត្រឹមតែ៩គីឡូម៉ែត្រទៀតប៉ុណ្ណោះ នឹងបញ្ចប់ការឈូសឆាយក្នុងពេលឆាប់ៗខាងមុខនេះ។
គួររំលឹកដែរថា អំឡុងខែតុលា ឆ្នាំ២០២២ កន្លងទៅឯកឧត្តមបណ្ឌិត ម៉ុង ឫទ្ធី បានចុះកិច្ចព្រមព្រៀងជាមួយលោកឧកញ៉ា សុខ គង់ ដើម្បីរៀបចំចាប់ផ្តើមបើកការដ្ឋានឈូសឆាយសម្អាតបាតផ្លូវ ខណៈផ្លូវថ្មីមួយខ្សែនេះ តភ្ជាប់ពីផ្លូវជាតិលេខ៤ ត្រង់គីឡូម៉ែត្រលេខ១៥៨+២០០ ឆ្ពោះទៅភ្នំបូកគោ ឆ្លងកាត់តាមដីសម្បទានសេដ្ឋកិច្ចចំការដូងប្រេងរបស់ឧកញ៉ា ម៉ុង ឬទ្ធី។
សូមជម្រាបផងដែរថា គម្រោងស្ថាបនាផ្លូវនេះ ទទួលរ៉ាប់រងការចំណាយទាំងស្រុងដោយអ្នកឧកញ៉ា សុខ គង់ ហើយឯកឧត្ដមបណ្ឌិត ម៉ុង ឬទ្ធី ជួយឈូសឆាយដើមដូងប្រេង ដើម្បីបើកផ្លូវ៕
អត្ថបទដោយ៖ ឌឿក ស្រីនុត