សព្វថ្ងៃនៅស្ថាប័ន ភាគច្រើនគឺមានបញ្ហាមនុស្ស ដែលជាឧបសគ្គរំាងស្ទះដំណើរការអាជីវកម្មនិងសកម្មភាពការងារ ទន្ទឹមនឹងនេះបញ្ហាបុគ្គលិកឈ្លោះគ្នាក៏បញ្ហាមួយក្នុងចំណោមនោះផងដែរ។

យ៉ាងណាមិញខាងក្រោមនេះជាការសិក្សាពីសាកលវិទ្យាល័យ Harvard អំពីបុគ្គលិក៣ប្រភេទ បើដាក់ក្បែរគ្នា ឱ្យធ្វើការងារជាមួយគ្នា មិនខុសពីដាក់ទឹកចូលប្រេងនោះទេ ពោលគឺមិនសូវចុះសម្រុងគ្នា និងឧស្សាហ៍កើតជម្លោះផ្ទៃក្នុង។

១. ជំនាញដូចគ្នា ប្រកួតប្រជែងផលប្រយោជន៍៖ នៅក្នុងក្រុមហ៊ុនមួយមាន បុគ្គលិកច្រើននាក់នៅក្នុងជំនាញតែមួយ នឹងធ្វើឱ្យពួកគេឆាប់ឈ្លោះគ្នាលើទំនាស់ផលប្រយោជន៍​ និងការប្រកួតប្រជែងប៉ែងជើង យកលាភសក្ការៈ។

ក្នុងនោះមូលហេតុនៃទំនាស់ភាគច្រើនកើតឡើងជារឿយៗ ដូចជាការធ្វើការងារដូចគ្នា ចំណេះជំនាញដូចគ្នា ទំហំការងារប៉ុនគ្នាឬប្រហាក់ប្រហែលគ្នា ប៉ុន្តែមានម្នាក់បានឡើងតំណែង ម្នាក់ទៀតមិនបានឡើងតំណែង​ ដែលខុសពីការរំពឹងទុករបស់បុគ្គលិកនៅកន្លែងធ្វើការ។  

២. អត្តសញ្ញាណក្នុងទំនាក់ទំនង៖ បុគ្គលិកដែលឧស្សាហ៍ឈ្លោះគ្នា ពេលខ្លះអាចមិនមែនជាបញ្ហាផលប្រយោជន៍នោះទេ ប៉ុន្តែវាអាចបណ្តាលមកពី អត្តសញ្ញាណក្នុងទំនាក់ទំនង ពោលគឺគំនិតនិងការអនុវត្តលើការងារបានដើរប្រញ្ចោសគ្នា ដោយម្នាក់គិតថាធ្វើបែបនេះល្អ ម្នាក់ថាធ្វើបែបនោះល្អជាង ទាំងម្នាក់ទៀតចង់បានបែបអញ្ចុះគ្រាន់បើជាងជាដើម។

ដោយក្នុងនោះបញ្ហាជាក់ស្តែងមួយចំនួនដែលអាចកើតឡើងដោយសារ មូលហេតុនៃអត្តសញ្ញាណ ទំនាក់ទំនងនេះមានដូចជា របៀបធ្វើការមានលក្ខណៈខុសគ្នាខ្លាំង វិន័យការងារមិនស៊ីមេទ្រីគ្នា ការនិយាយស្តីមិនយល់គ្នា ឬទំនាក់ទំនងរវាងបុគ្គលទ្វេភាគី មានភាពល្អក់កករនឹងគ្នាពីដើមទីស្រាប់។

៣. អត្តចរិតនិស្ស័យកំណើត៖ អ្នកខ្លះប្រើចរិតនៅផ្ទះនៅកន្លែងធ្វើការ អ្នកខ្លះមិនសម្របខ្លួនតាមការតម្រូវការការងារ ហើយប្រកាន់ទម្លាប់រស់តាមនិស្ស័យកំណើតរបស់ខ្លួន មិនថាអត្តចរិតនោះប៉ះពាល់ឬមិនប៉ះពាល់អ្នកដទៃជុំវិញខ្លួននោះទេ​ ដោយហេតុផលនេះក៏ជាមូលហេតុដែលធ្វើឱ្យបុគ្គលិកធ្វើការជាមួយគ្នា ឧស្សាហ៍ឈ្លោះគ្នានិងខ្វែងគំនិតគ្នាដែរ។

ជួនកាលបញ្ហាអត្តចរិតរបស់បុគ្គលម្នាក់ៗនៅកន្លែងធ្វើការ ដែលមានដូចជាការនិយាយដើមគ្នា ពន្លើសឬបង្កាច់បង្ខូចគ្នានេះក៏បានជះឥទ្ធិពល ដល់សុមាលភាពនៅកន្លែងធ្វើការងារ ដូចជាបង្កឱ្យថ្នាក់លើឈឺក្បាល បុគ្គលិកដទៃកើតជំងឺថប់បារម្ភ និងបរិយាកាសពុលផងដែរ។

ជាការពិតណាស់គ្មានស្ថាប័នណាដែលថាគ្មានបញ្ហាបុគ្គលិកឈ្លោះគ្នានោះទេ ប៉ុន្តែដើម្បីអាចកាត់បន្ថយបញ្ហានេះឱ្យនៅទាបបំផុត ថា្នក់ដឹកនាំគឹមានតួនាទីចម្រាញ់មនុស្ស ដាក់ពួកគេធ្វើការឱ្យត្រូវកន្លែង សង្កេតមើលនិងបង្កើតក្រុមការងារដែលមានអត្តចរិត ផ្នត់គំនិតស្រដៀងគ្នា​ ហើយបញ្ចូលយុទ្ធសាស្រ្តចិត្តវិទ្យាផ្សេងៗ ដើម្បីឱ្យមនុស្សរួមគ្នាធ្វើការងារជាធ្លុងមួយបាន៕

អត្ថបទដោយ៖ ពីង ជូអេង