នៅចុងបញ្ចប់នៃជីវិតរបស់លោក Steve Wozniak សហស្ថាបនិកក្រុមហ៊ុន Apple ចង់ចងចាំពេលវេលាតែមួយប៉ុណ្ណោះគឺ ការនិយាយរឿងកំប្លែង ប្រាប់ទៅកាន់ក្រុមគ្រួសារ និងមិត្តភក្តិ ប្រកបដោយភាពរីករាយបំផុត ខណៈវាមិនមែនជាទ្រព្យសម្បត្តិដ៏មហាសាល ឬកេរិ៍្តឈ្មោះអ្វីឡើយ។

ថ្លែងក្នុងសុន្ទរកថា កម្មវិធីបញ្ចប់ការសិក្សារបស់និស្សិតនៅសាកលវិទ្យាល័យ Colorado Boulder កាលពីសប្តាហ៍មុន លោក Steve Wozniak បានលើកឡើងយ៉ាងដូច្នេះថា៖ «អតីតនាយកប្រតិបត្តិ Viacom Sumner Redstone កំពុងហោះហើរជុំវិញទីក្រុងមួយ ដើម្បីលក់ក្រុមហ៊ុនមួយក្នុងតម្លៃ ១ពាន់លានដុល្លារនៅថ្ងៃនេះ ហើយបន្ទាប់មកហោះហើរទៅកាន់ទីក្រុងមួយទៀត… ខ្ញុំគិតថា “WOW”។ ការមានទ្រព្យសម្បត្តិ និងអំណាចបែបនោះ តើអ្នកចង់បានវាពេលអ្នកស្លាប់ដែរឬទេ?»។

លោកបានបន្តទៀតថា៖ «ទេ! សម្រាប់ខ្ញុំ ខ្ញុំចង់ស្លាប់ដោយនឹកឃើញការលេងសើច និងភាពសប្បាយរីករាយដែលខ្ញុំមាន និងរឿងកំប្លែងដ៏គួរឲ្យអស់សំណើច។ សម្រាប់ខ្ញុំ ជីវិតមិនមែនជាការសម្រេចបានទេ តែវាគឺជាសុភមង្គលពិតប្រាកដ»។

គួរជម្រាប់ផងដែរថា នៅ​ឆ្នាំ១៩៧៦​​ លោក Steve Wozniak បាន​បង្កើត​ក្រុមហ៊ុន​​កុំព្យូទ័រ Apple រួមជាមួយ​នឹង​ដៃគូ​អាជីវកម្ម​ដ៏​ល្បីឈ្មោះ​របស់គាត់​គឺ​លោក Steve Jobs ដែលជា​អ្នកវិនិយោគ​ដ៏​ល្បី និង​ជា CEO ដ៏​យូរ​របស់​ក្រុមហ៊ុន Apple ដែល​បាន​ស្លាប់​ក្នុង​ឆ្នាំ២០១១។ អាជីវកម្ម​របស់​ពួកគេ​បាន​ត្រួសត្រាយ​ផ្លូវ​សម្រាប់ការ​បង្កើត​​​កុំព្យូទ័រ​ផ្ទាល់ខ្លួន ហើយ​បាន​បន្ត​ក្លាយជា​ក្រុមហ៊ុន​ដ៏​មានតម្លៃ​បំផុត​របស់​ពិភពលោក ដែល​ត្រូវបាន​គេ​ស្គាល់​សម្រាប់​ការ​រចនា និង​មុខងារ​នៃ​គ្រឿង​អេឡិចត្រូនិក​ជាច្រើន រួមទាំង​កុំព្យូទ័រ​យួរដៃ និង​កុំព្យូទ័រ​លើ​តុ រួមទាំងទូរស័ព្ទ​ដៃ​ម៉ាកល្បី​ iPhone៕​