គេថាអ្នកនឹងក្លាយជាមនុស្សទី៦ក្នុងចំណោមប្រភេទមនុស្ស ៥នាក់ ដែលអ្នកសេពគប់ជិតស្និតបំផុត ដែលមានន័យថា ប្រសិនបើអ្នកសេពគប់ជិតស្និតជាមួយអ្នករកស៊ី៥នាក់ មិនយូរទេអ្នកនឹងក្លាយជាអ្នករកស៊ីទី៦ជាមិនខាន។
ស្រដៀងគ្នានេះដែរ សម្រាប់បទពិសោធន៍ជីវិតរបស់អ្នកជំនួញស្រីស្អាត ឆ្លាត ពូកែចំនួន២រូប ដែលជាមិត្តសម្លាញ់នឹងគ្នាគឺ Christine Chang និង Sarah Lee បានចាប់ផ្ដើមអាជីវកម្ម គ្រឿងថែរក្សាសម្រស់ផ្ដោតទៅលើស្បែក ឈ្មោះថា Glow Recipe ជាមួយទុនដំបូង ៥ម៉ឺនដុល្លារ នៅក្នុងឆ្នាំ២០១៤ ហើយបានកសាងអាជីវកម្មមួយនេះឱ្យចែកចាយដល់ទឹកដីអាមេរិក និងធ្វើឱ្យអាជីវកម្មនេះ រីកចម្រើនប្រែក្លាយជាជំនួញ ទទួលបានចំណូលពីការលក់ចំនួន ១០០លានដុល្លារ កាលពីឆ្នាំ២០២១ នេះតាមការបញ្ជាក់ពី CNBC Make It។
ចំពោះដើមចម នៃការនឹកឃើញបង្កើតនូវជំនួញថែរក្សាសម្រស់ ដោយផ្ដោតសំខាន់លើការថែរក្សាស្បែកឬ skincare នេះ គឺ ព្រោះតែពេលក្មេងៗពួកគេតែងតែចងចាំនូវអនុស្សាវរីយ៍ ពេលដែលមកពីសាលាវិញ ម៉ាក់តែងតែប្រាប់ឱ្យពួកគេទៅលាងសម្អាតមុខ ដើម្បីការងារស្បែកមុខពីធូលីជាដើម។
មួយវិញទៀត ការចងចាំពីកុមារភាពដ៏សំខាន់មួយគឺ Chang និង Lee បានចំណាយពេលរដូវក្តៅនៅប្រទេសកូរ៉េខាងត្បូងលេងនៅខាងក្រៅ ហើយជីដូនរបស់ពួកគេកំពុងត្រដុសផ្លែឪឡឹកស្រស់ៗលើស្បែកដែលរលាកដោយពន្លឺព្រះអាទិត្យ។ ផ្លែឪឡឹកគឺជាផ្លែឈើដ៏ពេញនិយមបំផុតមួយរបស់ប្រទេសកូរ៉េ ហើយជាឱសថបុរាណសម្រាប់ព្យាបាលស្បែកស្ងួត រមាស់។
វាក៏ជាធាតុផ្សំសំខាន់នៅក្នុងផលិតផលដំបូងរបស់ Glow Recipe គឺ Watermelon Glow Sleeping Mask ដែលយោងទៅតាមស្ថាបនិកបានបង្ហើបថា បានសាកល្បងរូបមន្តជាងមួយពាន់ដង ដើម្បីល្អឥតខ្ចោះសម្រាប់ផលិតផលដំបូងផ្សំឡើងពីឪឡឹកនេះ។ មកទល់នឹងពេលនេះ ពួកគេបានបង្កើតនូវផលិតផលដែលផ្សំពីវត្ថុធាតុដើម ចេញពីផ្លែ ម្ចាស់ និង ផ្លែប័រផងដែរ។ អាជីវកម្មរបស់ពួកគេទទួលបានការគាំទ្រខ្លាំង ព្រោះពួកគេបានផ្ដោតលើការប្រើប្រាស់បណ្ដាញសង្គមធំៗ ដើម្បីធ្វើទីផ្សារដូចជា Tik Tok និង អ៊ីនស្តាក្រាមជាដើម។
មេរៀនដែលយើងអាចរៀនបានពីបទពិសោធន៍ជំនួញ សហគ្រិនស្ត្រីវ័យក្មេងទាំង២រូបនេះគឺ “គួរសេពគប់មនុស្សឱ្យត្រូវ មនុស្សដែលជួយជំរុញអ្នកឱ្យសម្រេចក្ដីស្រមៃ និងភាពរីកចម្រើនទៅមុខ។ មួយវិញទៀត បទពិសោធន៍ជីវិតកាលពីអតីតកាល ក៏អាចជាធាតុផ្សំដ៏សំខាន់មួយ ក្នុងការរៀបចំកសាងជីវិតរបស់អ្នកនាពេលបច្ចុប្បន្ន និងអនាគតផងដែរ”៕
