នៅពីថ្ងៃទី២៣ ខែឧសភា ឆ្នាំ២០២៣ កន្លងទៅនេះ សម្តេចកិត្តិសង្គហបណ្ឌិត ម៉ែន សំអន បានអនុញ្ញាតិឲ្យ ប្រធានក្រុមប្រឹក្សាភិបាលសមាគមកម្ពុជា ចិន ឱ្យចូលជួបសម្តែងការគួរសម ខណៈការជួបនេះដែរ ប្រធានប្រឹក្សាសមាគមចិនក៏បានបង្ហើបពីគោលបំណងក្នុងការបង្កើតសាកលវិទ្យាល័យបច្ចេកទេសនៅកម្ពុជាផងដែរ។

នៅក្នុងជំនួបខាងលើ លោក កាវ ជាន (Mr. Gao Jian) ប្រធានក្រុមប្រឹក្សាភិបាល សមាគមកម្ពុជា ចិន បានបង្ហាញអំពីបំណងរបស់លោកក្នុងការបង្កើតសាកលវិទ្យាល័យបច្ចេកទេសមួយ ផ្នែកវិទ្យាសាស្ត្រ នៅព្រះរាជាណាចក្រកម្ពុជា ដែលមានការទទួលស្គាល់ពីរដ្ឋាភិបាលកម្ពុជា-ចិន ។ សាកលវិទ្យាល័យនេះនឹងផ្តល់ឱកាសប្រទេសទាំងពីរបានស្វែងយល់កាន់តែច្បាស់លើវិស័យសិក្សាធិការ និងវិស័យវិទ្យាសាស្ត្រ និងបានបង្កើននូវបច្ចេកទេសក្នុងការសិក្សាស្រាវជ្រាវបានថែមមួយកម្រិតទៀត ។

ជាការឆ្លើយតប សម្តេចកិត្តិសង្គហបណ្ឌិត បានមានប្រសាសន៍ថា ចំណងមិត្តភាព កម្ពុជា-ចិន គឺជាមិត្តដែកថែប ប្រទេសទាំងពីរបានចូលរួមចំណែកយ៉ាងសំខាន់ក្នុងការពង្រឹង និងជម្រុញកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរ កម្ពុជា-ចិន។

សម្តេចកិត្តិសង្គហបណ្ឌិត ក៏បានសម្តែងនូវការស្វាគមន៍ ចំពោះគម្រោងបង្កើតសាកលវិទ្យាល័យបច្ចេកទេសនេះ គឺសម្តេចមានការគាំទ្រយ៉ាងពេញទំហឹង ចំពោះគំនិតផ្តួចផ្តើមនេះ ។ សម្តេចកិត្តិសង្គហបណ្ឌិត ក៏បានជម្រាបជូន លោក កាវ ជាន ត្រូវធ្វើសំណើរទៅកាន់ ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ និងយុវជននិងកីឡា ដើម្បីពិភាក្សាលើគម្រោងនេះឲ្យបានស៊ីជម្រៅបន្ថែមទៀត ៕

អត្ថបទ៖ ធី ស្រីល័ក្ខ