លោក ឆាយ សឿន បច្ចុប្បន្នគឺជាប្រធានក្រុមប្រឹក្សាភិបាលនៃធនាគារ អេស៊ីលីដា ដែលជាធនាគារពាណិជ្ជដ៏ធំមួយនៅក្នុងប្រទេសកម្ពុជា និងជាធនាគារខ្មែរដំបូងគេដែលបើកប្រតិបត្ដិការនៅក្រៅប្រទេសរួមមាន៖ ប្រទេសឡាវ និងប្រទេសមីយ៉ាន់ម៉ា។ លោកបានប្រសូត្រនៅក្នុងខែមេសា ឆ្នាំ១៩៥៤ ដែលគិតមកដល់ពេលបច្ចុប្បន្នគឺមានអាយុ ៧០ ឆ្នាំហើយ។
ក្រឡេកទៅមើលប្រវត្ដិវិញ មុននឹងក្លាយជាប្រធានក្រុមប្រឹក្សាភិបាលនៃធនាគារអេស៊ីលីដា លោក ឆាយ សឿន ធ្លាប់បានឆ្លងកាត់នូវបទពិសោធន៍ការងារ និងការសិក្សាជាច្រើន។ ដោយក្នុងនោះលោកបានឆាប់ផ្ដើមការងារជា គណនេយ្យករ និងជាអនុប្រធានគណនេយ្យករនៃមន្ទីរពាណិជ្ជកម្មខេត្ដកំពត ចន្លោះឆ្នាំ ១៩៨០ ដល់ឆ្នាំ ១៩៩២។ បន្ទាប់មកនៅក្នុងខែមករា ឆ្នាំ១៩៩៣ លោកក៏បានចូលបម្រើការងារជាមួយធនាគារអេស៊ីលីដារហូតដល់ចូលនិវត្ដន៍នៅក្នុងឆ្នាំ២០១៤។
តួនាទីចុងក្រោយមុនការចូលនិវត្ដន៍របស់លោកនៅក្នុងធនាគារអេស៊ីលីដា គឺជាអនុប្រធាននាយកប្រតិបត្ដិ និងជាគណៈប្រធាននាយកប្រតិបត្ដិហិរញ្ញវត្ថុ បន្ទាប់មកទើបត្រូវបានតែងតាំងជាប្រធានក្រុមប្រឹក្សាភិបាលធនាគាររហូតមកដល់បច្ចុប្បន្ន។ ក្រៅពីតួនាទីជាប្រធានក្រុមប្រឹក្សាភិបាលអេស៊ីលីដានៅកម្ពុជា លោក ឆាយ សឿន ក៏ជាសមាជិកក្រុមប្រឹក្សាភិបាលនៃធនាគារអេស៊ីលីដា នៅក្នុងប្រទេសឡាវ និងជាសមាជិកក្រុមប្រឹក្សាភិបាលនៃស្ថាប័នមីក្រូហិរញ្ញវត្ថុ អេស៊ីលីដា នៅក្នុងប្រទេសមីយ៉ាន់មាផងដែរ។
ចំពោះការសិក្សាវិញ លោក ឆាយ សឿន បានបញ្ចប់ថ្នាក់អនុបណ្ឌិតប្រតិបត្ដិគ្រប់គ្រងពាណិជ្ជកម្ម ជំនាញហិរញ្ញវត្ថុ និងគណនេយ្យ ពីសាកលវិទ្យាល័យ Preston នៅសហរដ្ឋអាមេរិក។ ហើយលោកក៏បានបញ្ចប់វគ្គសិក្សាស្ដីពីអភិបាលក្រុមហ៊ុន ពីវិទ្យាស្ថានអូស្រ្ដាលីសម្រាប់អភិបាលក្រុមហ៊ុន (GAICD)ថ។
សូមជម្រាបថា បច្ចុប្បន្នក្រុមប្រឹក្សាភិបាលធនាគារអេស៊ីលីដា មានសមាជិកសរុបចំនួន ៩ រូបដែលកាន់តួនាទីផ្សេងៗគ្នា ដោយក្នុងនោះរួមមានដូចជា៖
១. លោក ឆាយ សឿន ជាប្រធានក្រុមប្រឹក្សាភិបាលធនាគារ។
២. លោក អុិន ចាន់នី ជាអភិបាល និងកាន់តួនាទីជាប្រធាននាយកប្រតិបត្ដិធនាគារ។
៣. លោក Pieter Kooi អភិបាល និងជាប្រធានគណៈកម្មាធិការគ្រប់គ្រងហានិភ័យ និងព័ត៌មានវិទ្យា, ប្រធានគណៈកម្មាធិការតែងតាំង និងលាភការ និងជាគណៈកម្មាធិការសវនកម្ម របស់ធនាគារផងដែរ។
៤. លោកស្រី ភូរិ រតនា អភិបាល និងជាប្រធានគណៈកម្មាធិការសវនកម្ម។
៥. លោក Stéphane MANGIAVACCA អភិបាល និងជាគណៈកម្មាធិការតែងតាំង និងលាភការ។
៦. លោក Kyosuke Hattori អភិបាល និងជាគណៈកម្មាធិការគ្រប់គ្រងហានិភ័យ និងព័ត៌មានវិទ្យា។
៧. លោក Albertus Bruggink ជាអភិបាល និងគណៈកម្មាធិការតែងតាំង និងលាភការ ព្រមទាំងជាគណៈកម្មាធិការគ្រប់គ្រងហានិភ័យ និងព័ត៌មានវិទ្យា។
៨. លោកបណ្ឌិត ហេង ឌីណា អភិបាល និងជាគណៈកម្មាធិការគ្រប់គ្រងហានិភ័យ និងព័ត៌មានវិទ្យា។
៩. លោក កាយ ឡូត អភិបាល និងជាគណៈកម្មាធិការគ្រប់គ្រងហានិភ័យ និងព័ត៌មានវិទ្យា។
សម្រាប់សកម្មភាពអាជីវកម្ម បច្ចុប្បន្ន ធនាគារ អេស៊ីលីដា មានទ្រព្យសកម្មសរុប ១០,០៨ ពាន់លានដុល្លារអាមេរិក, ប្រាក់បញ្ញើ ៧,៦២ ពាន់លានដុល្លារអាមេរិក, និងសមតុល្យឥណទាន ៦,៥ ពាន់លានដុល្លារអាមេរិក នៅលើដៃអតិថិជនជាង ៦០ ម៉ឺននាក់ ដែលក្នុងនោះមាន ៥៤,៨៤% ជាស្ត្រី ។ ធនាគារមានបុគ្គលិកសរុបជាង ១២ ០០០ នាក់កំពុងបម្រើការងារនៅក្នុង ២៦៤សាខាគ្រប់ខេត្ត-រាជធានីនៃព្រះរាជាណាចក្រកម្ពុជា។ អ្វីដែលពិសេស ក្រៅពីប្រតិបត្ដិការនៅក្នុងប្រទេសកម្ពុជា អេស៊ីលីដា ក៏មានប្រតិបត្ដិការនៅក្នុងប្រទេសឡាវ និងប្រទេសមីយ៉ាន់ម៉ាថែមទៀតផង៕