ក្រុមហ៊ុនរថយន្ដឡានរបស់អាមេរិក General Motors និងក្រុមហ៊ុនរបស់ចិន GAC international Co., Ltd. បានជ្រើសរើសយកខេត្ដកំពង់ឆ្នាំង ធ្វើជាទីតាំងសាងសង់រោងចក្រដំឡើងរថយន្ដ Chevrolet និងរថយន្ដ GAC របស់ពួកគេនៅកម្ពុជា។ ខណៈបច្ចុប្បន្នគម្រោង រោងចក្រមួយនេះបាននិងកំពុងដំណើរការសាងសង់ និងត្រៀមបើកដំណើរការនៅពេលឆាប់ៗខាងមុខ។
១. ក្រុមហ៊ុន Chevrolet
កាលថ្ងៃទី០១ ខែសីហា ឆ្នាំ២០២៥ ក្រុមហ៊ុន TH Automotive Manufacturing Co., Ltd.,) និង ក្រុមហ៊ុន General Motors បានចុះហត្ថលេខាផ្ដល់សិទ្ធិផ្ដាច់មុខតម្លើងរថយន្ត Chevrolet ក្នុងព្រះរាជាណាចក្រកម្ពុជា។
តាមការបញ្ជាក់ពីក្រុមហ៊ុន ការវិនិយោគនេះមានទំហំទឹកប្រាក់សរុបចំនួន ១៩លានដុល្លារអាមេរិក ដែលអាចដំឡើងរថយន្ដចន្លោះពី ១០ ០០០ ដល់ ១២ ០០០ គ្រឿងក្នុងរយៈ ពេល១ឆ្នាំ។ តាមការគ្រោងទុក រោងចក្រខាងលើនេះ អាចនឹងត្រូវបញ្ចប់ និងដាក់ឲ្យដំណើរការការដំឡើងរថយន្ដ នៅក្នុងត្រីមាសទី១ ឆ្នាំ២០២៦ ខាងមុខ។ ហើយនៅពេលបបើកដំណើរការនឹងផ្ដល់ឱកាសការងារ ដល់ពលកម្មជាតិចំនួនចាប់ពី ៥០០នាក់ឡើងដល់១០០០នាក់ ដែលជាផ្នែកមួយនៃការចូលរួមអភិវឌ្ឍសេដ្ឋកិច្ចជាតិ និង ជួយកាត់បន្ថយអត្រានិកម្មភាពនៅកម្ពុជា។
២. ក្រុមហ៊ុន GAC
កាលពីថ្ងៃទី ១៩ ខែ កញ្ញា ឆ្នាំ ២០២៥ ក្រុមហ៊ុន TH Automotive Manufacturing Co., Ltd., ដែលជាបុត្រសម្ព័ន្ធរបស់ក្រុមហ៊ុន TH Group, ក៏បានចុះហត្ថលេខាលើអនុស្សារណៈយោគយល់ (MOU) ផ្តាច់មុខជាមួយក្រុមហ៊ុន GAC International Co., Ltd. ដើម្បីដំឡើងរថយន្ត GAC នៅក្នុងព្រះរាជាណាចក្រកម្ពុជា។
តាមការបញ្ជាក់ពីលោក Yu Jun អនុប្រធានក្រុមហ៊ុន GAC បានបញ្ជាក់ថា ការបណ្តាក់ទុនរួមគ្នារវាងក្រុមហ៊ុន TH Automotive Manufacturing Co., Ltd. និង GAC International Co., Ltd. មានទំហំប្រមាណ ១៩ លានដុល្លារអាមេរិក ដែលរោងចក្រនេះ មានទីតាំងលើផ្ទៃដី ១១ ហិកតាក្នុងខេត្តកំពង់ឆ្នាំង រោងចក្រនេះត្រូវបានរំពឹងថានឹងបង្កើតការងារចន្លោះពី ៤០០ ទៅ ៦០០ កន្លែង និងមានសមត្ថភាពផលិតប្រចាំឆ្នាំពី ១០,០០០ ទៅ ១៥,០០០ គ្រឿង៕
