អ្នកនាង រស់ រតនៈ ដែលមហាជនភាគច្រើនស្គាល់ថា Chef Nak (ចុងភៅ ណាក់) ជាម្ចាស់ស្នាដៃសៀវភៅធ្វើម្ហូបខ្មែរ ជាប់ជ័យលាភីជា "សៀវភៅធ្វើម្ហូបល្អបំផុតនៅលើពិភពលោក"  មានឈ្មោះថា “សោយ” បានពួតដៃគ្នាជាមួយអ្នកផលិតវីដេអូម្ហូបល្បីឈ្មោះលោក Sonny បុរសជនជាតិអាមេរិក ដែលមានឆាណែលយូធូបអ្នកចុច Subscribe ជាង១០លាននាក់ ​ក្នុងការផ្សព្វផ្សាយម្ហូបខ្មែរទៅកាន់ពិភពលោក។

នេះគឺជាក្តីរំពឹងរបស់ប្រិយមិត្តដែលនិយមតាមដានមាតិកាម្ហូបនៅកម្ពុជាថាអ្នកទាំងពីរអាចនឹងដឹកដៃគ្នា បង្កើតមាតិកាម្ហូបខ្មែរនាំឱ្យពិភពលោកស្គាល់ ក្រោយគេសង្កេតឃើញលោក Sonny អ្នកផលិតវីដេអូដ៏ល្បីដើរបង្ហាញនិងភ្លក់មុខម្ហូបជាច្រើននៅជុំវិញពិភពលោកជាពិសេសតំបន់អាស៊ីដែល មានឆាណែលឈ្មោះថា Best Ever Food Review មកលេងកម្ពុជាដោយមានអ្នកនាង រស់ រតនៈ ចុងភៅខ្មែរល្បីឈ្មោះជាមគ្គុទេសន៍។

បន្ថែមពីនោះអ្នកនាងរតនៈក៏បានជូនសៀវភៅចំនួន២ក្បាលដែលជាស្នាដៃនិពន្ធរបស់អ្នកនាងទៅកាន់លោក Sonny ដោយចុងភៅណាក់ បានបង្ហោះសារអមនឹងរូបភាពជាមួយលោក Sonny យ៉ាងដូច្នេះថា “អរគុណដែលបានអញ្ជើញមកប្រទេសខ្ញុំ ចង់ភ្លក្ស ចង់ស្គាល់ម្ហូបខ្ញុំ។ តាមបទពិសោធន៍ខ្ញុំជឿថាត្រឹមប៉ុណ្ណឹងថ្ងៃពិតមិនអាចយល់ដឹងស៊ីជម្រៅពីម្ហូបប្រទេសខ្ញុំបាននោះទេ។ ដូច្នេះហើយមានតែជូនសៀវភៅទាំងពីរនេះគ្រាន់ជាការស្វែងយល់បន្ថែម។ សូមបន្តដំណើរដោយជោគជ័យហើយសង្ឃឹមថានឹងឃើញការផ្សព្វផ្សាយអ្វីដែលល្អប្រសើរពីប្រទេសខ្ញុំដែលពិភពលោកគួរដឹង និងជាប្រយោជន៍។”

គួរជម្រាបផងដែរថា Best Ever Food Review Show គឺជាកម្មវិធីអាហារ និងការធ្វើដំណើរដែលបង្កើតឡើងដោយផលិតករភាពយន្តជនជាតិអាមេរិកលោក Will Sonbuchner ឈ្មោះហៅក្រៅ Sonny Side ដែលក្រុមការងារផលិតមានមូលដ្ឋាននៅប្រទេសវៀតណាម ខណៈឆាណែលយូធូបនិងហ្វេកប៊ុកផេករបស់លោកមានអ្នកតាមដានសរុបជាង១២លាននាក់ឯណោះ។

នៅក្នុងឆ្នាំ ២០២០ ឆាណែលនេះបានឈ្នះពានរង្វាន់ Webby សម្រាប់ "People's Voice: Viral Video of The Year" និងពានរង្វាន់កិត្តិយសផ្លូវការរបស់ Webby ចំពោះអាហារ និងភេសជ្ជៈសម្រាប់ខែវិច្ឆិកា ឆ្នាំ ២០២៣ បន្ទាប់ពីឆាណែលនេះមានអ្នកចុច Subscribe ១០.៣ លាននាក់៕

អត្ថបទដោយ៖ ពីង ជូអេង