ជាការពិតណាស់សាងសង់ថ្មីប្រាកដជាត្រូវចំណាយលុយច្រើនទៅលើសម្ភារផ្សេងៗ ដែលជាតម្រូវការចាំបាច់សម្រាប់ផ្ទះថ្មី។ ដូច្នេះសម្រាប់អ្នកដែលមានជីវភាពកម្រិតមធ្យម ឬក្រោមមធ្យម ការសង់ផ្ទះគឺជាការចំណាយដ៏ធំបំផុត ហើយតែងរកវិធីសាស្ត្រយ៉ាងណាកុំឲ្យចំណាយលើសពីគម្រោង។
យោងតាមការដកស្រងពីគេហទំព័ ROCKET Mortgage បានបង្ហាញពីវិធីសាស្រ្ត៧ យ៉ាងដែលធ្វើឱ្យលោកអ្នកចំណាយលុយតិចក្នុងការសាងសង់ផ្ទះ៖
១.ជួលជាងដែលមានបទពិសោធន៍
ប្រសិនបើអ្នកកំពុងសាងសង់ផ្ទះថ្មី លោកអ្នកគួរតែជួលជាងដែលមានបទពិសោធន៍ ព្រោះថាជាងដែលមានបទពិសោធន៍អាចនឹងដឹងពីការចំណាយបែបណាទើបអស់តិច។
មួយវិញទៀតជាងដែលមានបទពិសោធន៍អាចជួយអ្នកដឹងកន្លែងដែលត្រូវចំណាយ និងកន្លែងដែលត្រូវសន្សំ។ ហើពួកគាត់អាចជួយឱ្យលោកអ្នកចៀសផុតពីបញ្ហាផ្សេងៗដែលមិនបានដឹងមុនផងដែរ។
២.កុំខ្ជះខ្ជាយទៅលើសម្ភារ និងគ្រឿងសំណង់
មូលហេតុចម្បងមួយទៀតសម្រាប់អ្នកដែលធ្វើផ្ទះច្រើនតែអស់លុយពីខ្លួន ឬពេលធ្វើផ្ទះដើរខ្ចីលុយគេបន្ថែមនោះ គឺដោយសារចំណាយលើសម្ភារ និងគ្រឿងសំណង់ច្រើនពេក។ សម្ភារដែលមានដូចជា ឥដ្ឋការ៉ូ ដំបូលផ្ទះ ទ្វារ បង្អួច ជាដើម មិនគួរយករបស់ដែលថ្លៃខ្ពស់ពេកនោះទេ អាចជ្រើសរើសត្រឹមតម្លៃល្មមៗគុណភាពអាចទទួលយកបានគឺគ្រប់គ្រាន់ហើយ។ សម្ភារខ្លះថ្លៃមែនពិត តែគុណភាពប្រហាក់ប្រហែលនឹងតម្លៃមធ្យមដែរ។
៣.កុំលេងម៉ូដខ្លាំងពេក
នៅពេលដែលលេងម៉ូដផ្ទះខ្លាំងពេក មិនថាម៉ូដខាងក្នុង និងម៉ូតខាងក្រៅនោះទេគឺជាមូលហេតុធំធ្វើឱ្យអស់លុយច្រើនជាងគម្រោង។ ដូចនេះប្រសិនបើមិនចង់ចំណាយច្រើនគួរគូរប្លង់ផ្ទះឱ្យហើយ បន្ទាប់មកធ្វើតែទៅតាមប្លង់នោះបានហើយ កុំម្ដងបន្ថែមម៉ូដត្រង់នេះ ម្ដងថែមម៉ូដត្រង់នោះអី។
៤. កែច្នៃឱ្យអស់ពីលទ្ធភាព
ចំណុចនេះជួយឱ្យការចំណាយច្រើនពេលសង់ផ្ទះអាចកាត់បន្ថយ។ កែច្នៃអោយអស់លទ្ធភាពនេះ សំដៅទៅលើគ្រឿងសំណង់មួយចំនួនដែលនៅសល់កុំទុកចោល ដូចជាដែកដែលប្រើរួចអាចទុកចាក់គ្រឹះធ្វើអ្វីផ្សេងទៀត ថ្នាំពណ៌លាបផ្ទះដែលនៅសល់តិចៗជាប់ធុងកុំទុកចោល អាចយកមកលាយគ្នាលាបបង្កាន់ដៃជណ្ដើរបាន។ រឿងកំប៉ិកកំប៉ុកមែនប៉ុន្តែអាចជួយអោយចំណេញលុយមួយផ្នែកដែរ។
៥.ត្រួតពិនិត្យឱ្យជាប់លាប់ពេលសាងសង់
ពេលធ្វើផ្ទះគួរតែឧស្សាហ ទៅមើលការខុសត្រូវនានាចំពោះផ្ទះដែលកំពុងសាងសង់។ បើទោះបីជាលោកអ្នកមិនមែនចេះក៏ដោយ ប៉ុន្តែជាងខ្លះអាចមានគំនិតមិនល្អ យកសម្ភារ និងគ្រឿងសំណង់មួយចំនួនលាក់ទុក ហើយប្រាប់ម្ចាស់ផ្ទះថាខ្វះ ជាហេតុនាំឱ្យអស់លុយត្រូវទិញថែម។ ម្យ៉ាងទៀតការត្រួតពិនិត្យអោយបានត្រឹមត្រូវនេះ ជួយអោយដឹងថា មានអីខ្វះអី ហើយកុំអោយជាងប្រើប្រាស់គ្រឿងសំណង់ខ្ជះខ្ជាយ។
៦.រៀបចំថវិកា ផែនការ និងតម្លៃគ្រប់មុខទំនិញ
កុំចាំពេលសង់ផ្ទះហើយទើបភ្ញាក់ផ្អើលនឹងការចំណាយ។ បើមិនចង់ឱ្យមានរឿងនោះកើតឡើងទេលោកអ្នកត្រូវបែងចែកថវិកា និងកំណត់តម្លៃគ្រប់យ៉ាងដែលអ្នករំពឹងថានឹងចំណាយលើផ្ទះថ្មីរបស់លោកអ្នក។ បើទោះបីជាការកំណត់តម្លៃមិនដូចអ្វីដែលបានគិតក៏ដោយ យ៉ាងណាលោកអ្នកត្រូវតែមានតម្លៃជាក់លាក់មួយដើម្បីសម្រួលលើការចំណាយទៅលើរបស់ផ្សេងៗផងដែរ។
៧. ស្រាវជ្រាវតម្លៃ និងជាងដែលមានជំនាញច្បាស់លាស់
អតីតជាងសង់ផ្ទះខាងលើនេះ បន្តទៀតថា អ្នកខ្លះពេលសង់ផ្ទះធ្វើបែបប្រញាប់ប្រញាល់ មិនចំណាយពេលសាកសួររកជាងឱ្យបានត្រឹមត្រូវនោះទេ ជាហេតុនាំអោយក្រោយធ្វើផ្ទះរួចច្រើនមានចិត្តមិនជ្រះស្រឡះ។ រើសជាងខុសនាំឱ្យម្ចាស់ផ្ទះហត់ចិត្ត ហើយថែមទាំងអស់លុយច្រើនទៀត ព្រោះជាងធ្វើផ្ទះចេះមិនច្បាស់ ច្រើនធ្វើផ្ទះលក្ខណៈស្មានតាមការយល់ឃើញ។ ដូចនេះមុនសង់ផ្ទះគួរ ស្រាវជ្រាវរកជាងឱ្យបានត្រូវត្រូវ ទាំងតម្លៃ និងគុណភាព ជៀសវាងការខាតបង់៕
អត្ថបទដោយ៖ ឌឿក ស្រី នុត
