ក្រុមហ៊ុន ឆាល រីវើរ លេប័ររេថឺរី (ខេមបូឌា) ឯ.ក (Charles River Laboratories Cambodia Co., Ltd) ដែលជាក្រុមហ៊ុនស្រាវជ្រាវឱសថដ៏ធំរបស់សហរដ្ឋអាមេរិកបានសម្រេចបោះទុនវិនិយោគប្រមាណជាង ៥០០ លានដុ្លលារ ដើម្បីសាងសង់កសិដ្ឋានចិញ្ចឹមសត្វស្វា មានទីតាំងស្ថិតនៅក្នុងឃុំត្រពាំងឫស្សី ស្រុកកំពង់ស្វាយ ខេត្ដកំពង់ធំ។

យោងតាមការចេញផ្សាយដោយរដ្ឋបាលខេត្ដកំពង់ធំ គម្រោងកសិដ្ឋានដ៏ធំនេះ បានបើកសម្ពោធនៅថ្ងៃទី១៥ ខែមករា ឆ្នាំ២០២៦ ក្រោមអធិបតីភាព ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណរដ្ឋមន្ត្រី ឯកឧត្ដម នួន ផារ័ត្ន អភិបាលនៃគណៈអភិបាលខេត្ដកំពង់ធំ ព្រមទាំងថ្នាក់នាំខេត្ដ និងក្រុមហ៊ុនជាច្រើនរូបទៀតផងដែរ។

បើតាមការចេញផ្សាយដោយសារព័ត៌មាន Reuter កាលពីថ្ងៃទី១២ ខែមករា បានឲ្យដឹងថា ក្រុមហ៊ុន Charles River Laboratories International បានសម្រេចទិញយកក្រុមហ៊ុន ខេ.អេហ្វ. (ខេមបូឌា) អិលធីឌី (K.F. (Cambodia) Ltd ដែលជាក្រុមហ៊ុនផ្គត់ផ្គង់សត្វស្វាសម្រាប់ប្រើប្រាស់ក្នុងមន្ទីរពិសោធន៍ក្នុងទំហំទឹកប្រាក់ ៥១០ លានដុល្លារ ដើម្បីបើកកសិដ្ឋានចិញ្ចឹមសត្វស្វាខាងលើ។ 

ការសម្រេចចិត្តទិញយកក្រុមហ៊ុន ខេ.អេហ្វ. (ខេមបូឌា) អិលធីឌី (K.F. (Cambodia) Ltd នេះធ្វើឡើងក្នុងគោលបំណងពង្រឹង និងធានាឱ្យបាននូវខ្សែសង្វាក់ផ្គត់ផ្គង់សត្វស្វា សម្រាប់ការស្រាវជ្រាវ និងអភិវឌ្ឍន៍ឱសថរបស់ក្រុមហ៊ុនខ្លួន៕