រាជធានីភ្នំពេញ ព្រះរាជាណាចក្រកម្ពុជា (ថ្ងៃទី១៣ ខែកញ្ញា ឆ្នាំ២០២៤)- នាយកដ្ឋានបរិវត្តកម្មឌីជីថល នៃក្រសួងអប់រំ​ យុវជន​ និងកីឡា​ សហប្រតិបត្តិការជាមួយក្រុមហ៊ុន ខេម ជ្ជីអេសអេម ម.ក (សែលកាត) បានចាប់ផ្តើមដំណើរការ លើគម្រោង កម្មវិធីពង្រឹង ការអប់រំឌីជីថល សម្រាប់គ្រូបង្រៀននៅកម្ពុជាហើយ។ គម្រោងនេះ បានផ្តួចផ្តើម និងគាំទ្រហិរញ្ញប្បទានឧបត្ថម្ភពីមូលនិធិ ស.អ (CBRD FUND) របស់ក្រសួងប្រៃសណីយ៍ និងទូរគមនាគមន៍ ក្នុងគោលបំណង ធ្វើបរិវត្តកម្មវិស័យអប់រំ ក្នុងប្រទេស ដោយបំប៉នជំនាញឌីជីថលសំខាន់ៗ​ដល់គ្រូបង្រៀន។

កម្មវិធីនេះ នឹងអនុវត្តចាប់ពី ខែកញ្ញា ឆ្នាំ២០២៤ រហូតដល់ ខែមេសា ឆ្នាំ២០២៦ ដោយផ្តោតលើ ការពង្រឹងគុណភាពគ្រូឧទ្ទេសចំនួន​៤០រូប គរុសិស្សចំនួន៦០០នាក់ នៅតាមគ្រឹះស្ថានបណ្តុះបណ្តាលគ្រូ គ្រូបង្រៀនចំនួន១៥០០នាក់ ទាំងកម្រិតបឋមសិក្សា និងមធ្យមសិក្សា នៅតាមខេត្តគោលដៅ និងសិស្សានុសិស្សជាង ៥០.០០០ នាក់ទូទាំងប្រទេសដែលនឹងទទួលបានអត្ថប្រយោជន៍បន្តរពីបណ្តុះបណ្តាលលោកគ្រូ អ្នកគ្រូទាំងអស់នេះ។

ដើម្បីជួយសម្រួលដល់ការពង្រឹងការអប់រំឌីជីថល និងការស្រាវជ្រាវ ដល់គ្រូបង្រៀន គម្រោងនេះ នឹងផ្តល់ធនធាន បច្ចេកវិទ្យា គាំទ្រដល់គ្រូបណ្តុះបណ្តាល គ្រូឧទ្ទេស គរុសិស្ស គ្រូបង្រៀន និងអ្នកស្រាវជ្រាវក្នុងការបង្កើតមាតិកាឌីជីថល។​​ ធនធានទាំងនេះនឹងអាច ផ្តល់លទ្ធភាព ដល់លោកគ្រូ និងអ្នកគ្រូបានប្រើប្រាស់បច្ចេកទេសផ្នែកឌីជីថល និង ទំនាក់ទំនងគ្នាតាមកម្មវិធីនេះដោយប្រើប្រាស់បច្ចេកវិទ្យាឌីជីថលប្រកបដោយប្រសិទ្ធភាព។

លោក សុក ថា ប្រធាននាយកដ្ឋាន នៃនាយកដ្ឋានបរិវត្តកម្មឌីជីថល បានមានប្រសាសន៍ថា “កម្មវិធីនេះ ស្របតាមផែនការយុទ្ធសាស្ត្រអប់រំ ឆ្នាំ២០២៤-២០២៨ និងជាជំហានដ៏សំខាន់ឆ្ពោះទៅរកការសម្រេចបាននូវបរិវត្តកម្មឌីជីថលក្នុងវិស័យអប់រំ ក្រោមការដឹកនាំដ៏ខ្ពង់ខ្ពស់របស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី និងរដ្ឋមន្ត្រីក្រសួងអប់រំ យុវជន និងកីឡា” ។ ការសហប្រតិបត្តិការនេះ បង្ហាញពីសក្ដានុពលដ៏សំខាន់នៃការរួមចំណែករបស់វិស័យឯកជន ក្នុងការលើកកម្ពស់សមត្ថភាពឌីជីថលរបស់គ្រូបង្រៀន និយាយដោយឡែក និងនិយាយជារួម គឺជាការជំរុញការអប់រំឌីជីថលនៅកម្ពុជា។

លោក Johnny Wong នាយកប្រតិបត្តិ នាយកដ្ឋានពាណិជ្ជកម្ម នៃក្រុមហ៊ុន ខេម ជ្ជីអេសអេម ម.ក លោកបានបង្ហាញពីក្តីរីករាយ នៃការសហប្រតិបត្តិការនេះថា “យើងខ្ញុំ នឹងផ្តល់ ឧបករណ៍ឌីជីថលជូនគ្រូបង្រៀន  តាមត្រូវការចាំបាច់ ដើម្បីឱ្យការសិក្សារបស់ពួកគាត់សម្រេចបានជោគជ័យក្នុងយុគសម័យឌីជីថលនេះ” ។

កម្មវិធីពង្រឹងការអប់រំឌីជីថលសម្រាប់គ្រូបង្រៀននៅកម្ពុជា គឺជាព្រឹត្តិការណ៍ដ៏សំខាន់មួយ នៅក្នុងកិច្ចខិតខំប្រឹងប្រែងរបស់ប្រទេសកម្ពុជាក្នុងការធ្វើទំនើបកម្ម ប្រព័ន្ធអប់រំរបស់ខ្លួនសម្រាប់សិស្សានុសិស្ស សម្រាប់អនាគត។

ថ្មីៗនេះ ក្រុមហ៊ុន សែលកាត បានសហការជាមួយក្រសួងអប់រំ យុវជន និងកីឡា ដើម្បីរៀបចំវេទិកាអប់រំឌីជីថល។ វេទិកានេះបានប្រមូលផ្តុំភាគីពាក់ព័ន្ធសំខាន់ៗដើម្បីពិភាក្សាអំពីបញ្ហាប្រឈម ចែករំលែកការអនុវត្តបទពិសោធន៏ល្អៗ និងស្វែងរកដំណោះស្រាយប្រកបដោយភាពច្នៃប្រឌិត សម្រាប់ការអនុវត្តយុទ្ធសាស្ត្រអប់រំផ្នែកឌីជីថល។

វេទិកានេះ បានផ្តោតលើសក្តានុពលនៃប្រព័ន្ធឌីជីថលគ្រប់គ្រងព័ត៌មានសាលារៀនឌីជីថល (SMIS) ដើម្បីកែលម្អការគ្រប់គ្រង រដ្ឋបាលសាលារៀន ជម្រុញការកែលម្អប្រព័ន្ធការរៀនសូត្ររបស់សិស្សានុសិស្ស និងសម្រួលដល់ប្រតិបត្តិការហិរញ្ញវត្ថុ។ តាមរយៈការជំរុញកិច្ចសហប្រតិបត្តិការ និងការផ្លាស់ប្តូរចំណេះដឹង គំនិតផ្តួចផ្តើមនេះត្រួសត្រាយផ្លូវ សម្រាប់វិស័យអប់រំឱ្យដំណើរការបានល្អ តាមប្រព័ន្ធឌីជីថលរបស់កម្ពុជា។

អំពីក្រុមហ៊ុន​ សែលកាត  

ចាប់ដំណើរការក្នុងឆ្នាំ ១៩៩៧ ក្រុមហ៊ុន សែលកាត គឺជាប្រតិបត្តិករក្នុងស្រុកតែមួយគត់ ដែលបម្រើសេវាកម្មទូរស័ព្ទជូនអតិថិជនយូរជាងគេនៅប្រទេសកម្ពុជា មានប្រវត្តិដ៏យូរលង់ និងល្បីល្បាញ មានការច្នៃប្រឌិតខ្ពស់មុនគេក្នុងទីផ្សារកម្ពុជា និងមានបណ្តាញទូរស័ព្ទចល័តលឿនបំផុតគួរជាទីទុកចិត្ត។ ក្រុមហ៊ុននេះ ជាក្រុមហ៊ុនទូរស័ព្ទចល័តដ៏ធំមួយ ក្នុងប្រទេសកម្ពុជា ដែលមានអតិថិជនជាង ៤លាននាក់​ ដែលមានសេវាគ្របដណ្តប់ទូទាំងប្រទេស និងមានបណ្តាញចែកចាយដ៏ធំទូលាយ។    

 ក្រុមហ៊ុននៅតែរក្សាជំហរនៅក្នុងទីផ្សារក្នុងការផ្តល់នូវសេវាទូរគមនាគមន៍ប្រកបដោយភាពច្នៃប្រឌិតខ្ពស់ និងនៅតែបន្តពង្រីកបណ្តាញសេវាគ្របដណ្តប់ដោយប្រសិទ្ធភាពបំផុត។