អង្ករខ្មែរអស្ចារ្យណាស់ ខណៈកាលពីពេលថ្មីៗនេះ អង្ករពូជស្រូវសែនក្រអូបកម្ពុជាបានឈ្នះពានរង្វាន់មាស ក្នុងកម្មវិធីវាយតម្លៃគុណភាពរសជាតិប្រភេទអង្ករសគ្រាប់វែងចិន-អាស៊ាន លើកទី១ ដែលជាកម្មវិធីដែលរៀបចំដោយ វិទ្យាសាស្រ្តស្រូវនៃបណ្ឌិតសភាវិទ្យាសាស្រ្តកសិកម្មខេត្ត Guangxi និងមជ្ឈមណ្ឌលការគ្រប់គ្រងគ្រាប់ពូជនៃតំបន់ស្វយ័ត Guangxi Zhuang របស់ប្រទេសចិន។

ជាលទ្ធផលពីការប្រកួតនៅក្នុងចំណោមសំណាកអង្ករនៃពូជស្រូវសរុបចំនួន ៦១ ដែលក្នុងនោះមានចំនួន ១២ ប្រភេទ មកពីប្រទេសអាស៊ានចំនួន ៥ ប្រទេស និងចំនួន ៤៩ ប្រភេទ មកពីតំបន់ស្វយត និងខេត្តដែលដាំដុះស្រូវនៅប្រទេសចិន។ ក្នុងនោះ អង្ករម៉ាក សមូហភាព SKO ដែលមានពូជស្រូវសែនក្រអូប ត្រូវបានទទួលស្គាល់ស្គាល់ដោយ គណៈកម្មាធិការប្រកួត ជាពូជស្រូវល្អ និងមានរសជាតិឆ្ងាញ់ ព្រមទាំងឈ្នះពានរង្វាន់មាស ក្នុងចំណោមពានរង្វាន់របស់ពូជស្រូវរបស់ប្រទេសផ្សេងទៀត។

ថ្លែងក្នុងឱកាសនៃការទទួលបានពានរង្វាន់មាសនេះ សហព័ន្ធស្រូវអង្ករកម្ពុជា ក៏បានធ្វើការអំពាវនាវដល់ប្រជាកសិករទាំងអស់ បន្តខិតខំការងារដាំដុះដែលប្រកបដោយគុណភាពនិងមោទនភាពនេះជាបន្តទៀត។ ព្រោះការទទួលបានពានរង្វាន់មាសនេះ នឹងជួយឱ្យតម្លៃអង្ករសែនក្រអូបមានការទទួលស្គាល់កាន់តែច្រើនឡើងនិងមានទីផ្សារកាន់តែទូលំទូលាយថែមទៀត៕