នៅក្នុងឆ្នាំ២០២៥កន្លងទៅក្រុមហ៊ុនសំខាន់ចំនួនបួននៅកម្ពុជាបាននាំចេញសំបកកង់រថយន្តបាន ៣០.១៦៥.០០០សំបក និងប្រាក់ចំណូលចំនួន១.៣៨៣លានដុល្លារអាម៉េរិក។ ក្នុងនោះទីផ្សារធំនៃការនាំសំបកកង់ទាំងនេះមាននៅប្រទេសចំនួន ១០ ក្នុងនោះ សហរដ្ឋអាម៉េរិក ប្រេស៊ីល ចក្រភពអង់គ្លេស កូរ៉េ ហ្វាំងឡង់ កាណាដា អាហ្រ្វិកខាងត្បូង នូវែលសេឡង់ ឈីលី និងប្រទេសចិន។ នេះបើតាមការបញ្ជាក់ពីក្រសួងពាណិជ្ជកម្ម និងត្រូវបានចុះផ្សាយដោយក្រសួងព័ត៌មាននៅថ្ងៃទី២៩ ខែមករា ឆ្នាំ២០២៦។
ប្រភពដដែលបញ្ជាក់ថា ក្រុមហ៊ុនសំខាន់ៗទាំងបួនដែលនាំចេញសំបកកង់ឡានគឺក្រុមហ៊ុន Newbustar (Cambodia)Tire Co.,Ltd. ,ក្រុមហ៊ុន General Tires Technology (Cambodia) Co., Ltd. ,ក្រុមហ៊ុន CART TIRE CO , LTD និងក្រុមហ៊ុន Wanli Tire (Cambodia) Co,Ltd.។
ក្រុមហ៊ុន Newbustar (Cambodia)Tire Co.,Ltd.នៅតំបន់សេដ្ឋកិច្ចពិសេស យូ ប៊ី អ៊ី ស្រុកស្នួល ខេត្តក្រចេះ បាននាំចេញសំបកកង់រថយន្តចំនួន ១.៣៨៧.៥២៨សំបកកង់។ ក្រុមហ៊ុន General Tires Technology (Cambodia) Co. Ltd. នៅតំបន់សេដ្ឋកិច្ចពិសេសក្រុងព្រះសីហនុបាននាំចេញសំបកកង់រថយន្ត ៨.៦៧៤.០០០សំបក។ ក្រុមហ៊ុន CART TIRE CO., LTD. នៅតំបន់សេដ្ឋកិច្ចពិសេស ឈីលូ ជាន ពុ ចាយ ខេត្តស្វាយរៀងបាននាំចេញសំបកកង់រថយន្តសរុប ២០.១០១.៤០០ សំបក និងក្រុមហ៊ុន Wanli Tire (Cambodia) Co,Ltd. នៅតំបន់សេដ្ឋកិច្ចពិសេសស៊ីនបាវិត ខេត្តស្វាយរៀង បាននាំចេញសំបកកង់រថយន្តចំនួន ២.៦៦៥សំបកកង់។
ដោយឡែកនៅក្នុងឆ្នាំ ២០២៦នេះ នឹងមានក្រុមហ៊ុនចំនួន២ទៀត គ្រោងនឹងនាំសំបកកង់រថយន្តផលិតនៅកម្ពុជាចេញទៅក្រៅប្រទេសដែរ គឺក្រុមហ៊ុន ZODO Tire (Cambodia) Co., Ltd និងក្រុមហ៊ុន FIREMAX (CAMBODIA) TIRES CO., LTD៕
