ឈរលើស្មារតីខ្មែរជួយខ្មែរ ខ្មែរគាំទ្រផលិតផលខ្មែរ ក្រុមហ៊ុនធំៗចំនួន ៤ រួមមាន​៖ ក្រុមហ៊ុន ខ្មែរ ប៊ែវើរីជីស ក្រុមហ៊ុនវិរៈ ប៊ុនថាំ ក្រុមហ៊ុន វឌ្ឍនៈ និងក្រុមហ៊ុន Ganzberg បានប្រកាសទិញស្រូវពីប្រជាកសិករខ្មែរសរុបរាប់ម៉ឺនតោន ដើម្បីជួយសម្រាលបន្ទុកទីផ្សារបច្ចុប្បន្ន។

១. ក្រុមហ៊ុន​ ខ្មែរ ប៊ែវើរីជីស

នៅថ្ងៃទី៤ ខែវិច្ឆិកា ឆ្នាំ២០២៥ ក្រុមហ៊ុន ខ្មែរ ប៊ែវើរីជីស ដែលមានក្រុមហ៊ុនមេ ជីប ម៉ុង បានប្រកាសទិញស្រូវពីបងប្អូនប្រជាកសិករចំនួន ៥ ០០០ តោនជារៀងរាល់ឆ្នាំ នៅក្នុងតម្លៃ ១ ០០០ រៀលក្នុង ១ គីឡូក្រាម។

២. ក្រុមហ៊ុនវិរៈ ប៊ុនថាំ

កាលពីថ្ងៃទី៣ ខែវិច្ឆិកា ឆ្នាំ២០២៥ អ្នកឧកញ៉ា សួរ វីរៈ អគ្គនាយក ក្រុមហ៊ុនវិរៈ ប៊ុនថាំ ទិញស្រូវពីប្រជាកសិករខ្មែរក្នុងតម្លៃ ៩៥០រៀល ក្នុងមួយគីឡូ ចំនួន ៣០,០០០ តោនដើម្បីជួយសម្រួលដល់កសិករខ្មែរ។ ដោយក្នុងនោះដែរ សម្រាប់អតិថិជនមានបំណងជួយគាំទ្រអង្ករខ្មែរអាចស្វែងរកទិញនៅគ្រប់ទីតាំងសាខាវិរៈ ប៊ុនថាំ ទាំងអស់ទូទាំងប្រទេសបាន។ 

៣. ក្រុមហ៊ុន វឌ្ឍនៈ

ក្នុងស្មារតីខ្មែរជួយខ្មែរ ខ្មែរគាំទ្រផលិតផលខ្មែរ កាលពីថ្ងៃទី២ ខែវិច្ឆិកា ឆ្នាំ២០២៥ កន្លងទៅ ក្រុមហ៊ុន វឌ្ឍនៈ ក៏បានប្រកាសជួយទិញស្រូវពីប្រជាកសិករខ្មែរចំនួន ១០០ តោន ក្នុងតម្លៃ ១០០០ រៀលក្នុង ១ គីឡូក្រាមផងដែរ។

៤. ក្រុមហ៊ុន Ganzberg

កាលពីថ្ងៃទី ២ ខែវិច្ឆិកា ឆ្នាំ២០២៥ ក្រុមហ៊ុន GANZBERG ក៏បានប្រកាសទិញស្រូវពីប្រជាកសិករក្នុងតម្លៃ ១,០០០ រៀល ក្នុង ១ គីឡូក្រាម ចំនួន ១០០ តោន តាមការស្នើសុំរបស់អ្នកគាំទ្រផងដែរ៕