ផ្ទះមានសារៈសំខាន់ខ្លាំងណាស់សម្រាប់មនុស្សយើង វាមិនដូចជាម៉ូតូឡានដែលប្រើប្រាស់ហើយ អាចលក់ចេញ ឬដូរចោលភ្លាមៗនោះទេ ពោលគឺយើងអាចបន្សល់ផ្ទះទុកជាមរតក សម្រាប់កូនចៅជំនាន់ក្រោយ រស់នៅបន្ត ឬប្រកបរបរស៊ីរាប់រយឆ្នាំបន្ថែមទៀតបាន ប្រសិនបើយើងរើសទីតាំងដែលបានល្អ។ ដូច្នេះហើយ ថ្ងៃនេះ Business Cambodia សូមលើកយកក្បួនទិញផ្ទះតាមហុងស៊ុយចិនចំនួន៣ យកមកចែកជូនប្រិយមិត្តទាំងអស់គ្នា ដើម្បីជាគំនិតខ្លះៗ ក្នុងការជ្រើសរើសទិញផ្ទះឱ្យបានត្រឹមត្រូវ។
១. ទិញផ្ទះដែលមានខ្យល់បរិយាកាសល្អ៖ បើតាមអ្នកជំនាញក្នុងវិស័យអចលនទ្រព្យ បានលើកឡើងថា កត្តាបរិយាកាសជះឥទ្ធិពលមកលើការរស់នៅរបស់មនុស្សយើង ៧០% ដែលកត្តាទាំងនេះវាជះឥទ្ធិពលទៅលើអារម្មណ៍ ការគិតការ សម្រេចចិត្ត ទំនាក់ទំនង សុខភាព និង ទ្រព្យសម្បត្តិ។ ហេតុនេះ យើងត្រូវមើលទីតាំងផ្ទះដែលត្រូវទិញនោះ ថាតើមានខ្យល់ចេញចូលល្អ ឬទេ ហើយមានរុក្ខជាតិ ប្រព័ន្ធទឹកភ្លើង ផ្លូវថ្នល់ និងប្រព័ន្ធលូល្អត្រឹមត្រូវដែរឬអត់?
ដោយចំណុចខាងលើនេះ គឺយើងអាចមើលឃើញនឹងភ្នែកបាន ប៉ុន្តែចំពោះអ្វីដែលយើងមិនអាចមើលឃើញនឹងភ្នែក តែត្រូវយកចិត្តទុកដាក់ដែរនោះគឺ សម្លេង និងក្លិន ពីបរិយាកាស។ ដូច្នេះ យើងគួរជ្រើសរើសគម្រោងបុរី ឬផ្ទះណា ដែលមានច្បាប់ទម្លាប់ត្រឹមត្រូវ ពេលមានកម្មវិធីជម្រាបឱ្យអ្នកជិតខាងដឹង ឬមានកន្លែងធ្វើកម្មវិធីដាច់ដោយឡែក ដែលវាមិនប៉ះពាល់ដល់ការរស់នៅរបស់យើងជាដើម។
២. ទិញផ្ទះដែលមានការរចនាបែបសន្សំសំចៃ ៖ ការជ្រើសរើសទីតាំងផ្ទះ គឺជារឿងមួយដែលសំខាន់ ប៉ុន្តែអ្វីដែលសំខាន់ និងជួយលើកហុងស៊ុយដល់ម្ចាស់ផ្ទះថែមទៀតនោះគឺ ការរចនាផ្ទះនេះឯង។ ហេតុនេះហើយ មុននឹងសម្រេចចិត្តទិញផ្ទះ យើងគួរមើលផ្ទះណា ដែលមានខ្យល់ចេញចូលល្អ មានការៀបចំ ឬដាក់ទ្វារ ដាក់បង្អួចទៅតាមទិសដែលមានខ្យល់ចេញចូល រួមជាមួយនឹងការស្រូបយកពន្លឺពីខាងក្រៅ ចូលមកក្នុងផ្ទះ ដែលនេះមិនត្រឹមជួយឱ្យការរស់នៅមានផាសុខភាពល្អប៉ុណ្ណោះទេ ប៉ុន្តែវាក៏ជួយសន្សំសំចៃការប្រើប្រាស់អគ្គិសនីនៅក្នុងផ្ទះផងដែរ។ ជាក់ស្តែងដូចគម្រោងបុរី The Flora បានចំណាយថវិកា និងពេលវេលាយើងច្រើន គិតគូរទៅលើការរៀបចំផ្ទះនីមួយៗ ស្របតាមតម្រូវការរបស់អតិថិជន ដែលជួយកាត់បន្ថយការចំណាយ និងពោរពេញដោយរុក្ខជាតិព័ទ្ធជុំវិញ មានខ្យល់ចេញចូលល្អ មានការបែងចែកបន្ទប់ទទួលភ្ញៀវ កន្លែងចំអិនម្ហូបដាច់ដោយឡែក និងបន្ទប់ពិភាក្សាការងារសំខាន់ជាដើម។
៣. ទិញផ្ទះដែលខាងមុខទាប ខាងក្រោយខ្ពស់៖ បើតាមលោកគ្រូហុងស៊ុយចិន ដែលមានភាពល្បីល្បាញ នៅក្នុងប្រទេសកម្ពុជាច្រើនឆ្នាំ បានលើកឡើងថា ការទិញផ្ទះរស់នៅ គួរតែទិញផ្ទះណាដែលខាងក្រោយខ្ពស់ជាងខាងមុខ ពីព្រោះមនុស្សយើងតែងចង់មានយីអ៊ុនខ្ពស់ ដូច្នេះមិនអាចរស់នៅកន្លែងទាបជាងផ្លូវបានទេ។ មួយវិញទៀត សុខចិត្តឱ្យខាងមុខចង្អៀតបន្តិច តែឱ្យខាងក្រោយធំទូលាយ កុំឱ្យផ្ទះមានរូបរាងដូចគូទមាន់ ចឹងកូនចៅ ហើយនឹងអ្នករកស៊ីអ្នករស់នៅហ្នឹង គឺផ្លូវកាន់តែដើរកាន់តែទូលាយ ៕
