ឥឡូវនេះ អ្នកដំណើរកម្ពុជាដែលធ្វើដំណើរទៅកាន់ប្រទេសសិង្ហបុរី អាចពឹងផ្អែកលើរូបិយប័ណ្ណជាតិខ្មែរ ដើម្បីទូទាត់ប្រាក់រៀលតាមរយៈ QR បន្ទាប់ពីការដាក់ឲ្យដំណើរការជាផ្លូវការនៅអាកាសយានដ្ឋានអន្តរជាតិ Changi ។ ការផ្តូចផ្តើមនេះគឺជាផ្នែកមួយនៃកិច្ចខិតខំប្រឹងប្រែងដ៏ទូលំទូលាយរបស់កម្ពុជា ដែលដឹកនាំដោយធនាគារជាតិនៃកម្ពុជា (NBC) ដើម្បីជម្រុញការទូទាត់ដោយប្រើប្រាស់ប្រាក់រៀលទាំងក្នុងស្រុក និងក្រៅប្រទេស។ 

ប្រទេសសិង្ហបុរី គឺជាគោលដៅបន្ថែមថ្មីបំផុតទៅក្នុងបណ្តាញគោលដៅទូទាត់ប្រាក់អន្តរប្រតិបត្តិការរបស់កម្ពុជា ដោយចូលរួមជាមួយទីផ្សារក្នុងតំបន់ផ្សេងទៀតតាមរយៈប្រព័ន្ធបាគង។ ការអភិវឌ្ឍន៍នេះ បានបង្កើតឡើងដោយយោងទៅតាម ទំនាក់ទំនងដ៏យូរអង្វែងរវាងប្រទេសទាំងពីរ និងការចូលរួមរបស់ Phillip Bank ដែលជាធនាគារពាណិជ្ជដែលមានទីតាំងប្រតិបត្តិការនៅក្នុងប្រទេសកម្ពុជា និងមានការិយាល័យកណ្តាលនៅប្រទេសសិង្ហបុរី។ 

ការបង្កើតថ្មីនេះ បានអនុញ្ញាតឱ្យអតិថិជនធ្វើការស្កេន RoamQR នៅទូទាំងប្រទេសសិង្ហបុរី ដោយចាប់ផ្តើមដំបូងជាមួយបណ្តា អាជីវករមួយចំនួនធំនៅអាកាសយានដ្ឋានអន្តរជាតិ Changi និងធ្វើការទូទាត់ដោយផ្ទាល់ពីគណនីប្រាក់រៀល។ អ្នកធ្វើដំណើរទាំងអស់ នឹងទទួលបាននូវភាពងាយស្រួលមួយកម្រិតទៀតដោយមិនមានការចាំបាច់ក្នុងការប្តូររូបិយបណ្ណ បន្សល់ទុកទឹកប្រាក់ដែលនៅសល់ និងរីករាយនឹងការទូទាត់ភ្លាមៗ និងតម្លាភាពក្នុងអំឡុងពេលធ្វើដំណើរ ឬការដើរទិញឥវ៉ាន់នៅអាកាសយានដ្ឋានទាំងស្រុង។ 

ការចូលរួមនេះក៏បានធ្វើឱ្យ Phillip Bank  ក្លាយជាធនាគារមួយក្នុងចំណោមធនាគារដំបូងគេដែលនាំមកនូវភាពងាយស្រួល សម្រាប់់អ្នកដំណើរទៅកាន់ប្រទេសសិង្ហបុរី។

 លោក Ong Teong Hoon តំណាងភាគទុនិករបស់ Phillip Bank  បានមានប្រសាសន៍ថា “ក្នុងនាមជាជនជាតិសិង្ហបុរីម្នាក់ដែលបានរស់នៅក្នុងប្រទេសកម្ពុជាអស់រយៈពេលជិតពីរទសវត្សរ៍មកហើយ វាជារឿងមួយដែលរំភើបបំផុត ពេលដែលរូបិយបណ្ណប្រាក់រៀល ត្រូវបានប្រើប្រាស់យ៉ាងរលូននៅក្នុងប្រទេសសិង្ហបុរី។ វាក៏ជួយខ្ញុំផ្ទាល់ផងដែរ ដែលខ្ញុំអាចរៀបចំថវិកាចំណាយទាំងអស់របស់ខ្ញុំពីប្រាក់ចំណូលរបស់ខ្ញុំនៅក្នុងប្រទេសកម្ពុជា ដោយមិនចាំបាច់លាយឡំគណនីសិង្ហបុរី និងកម្ពុជារបស់ខ្ញុំនោះឡើយ។ នេះជាអ្វីដែលជនជាតិសិង្ហបុរីជាច្រើនដែលរស់នៅទីនេះនឹងទទួលបានការពេញចិត្តជាខ្លាំង។ ភាពងាយស្រួលនេះ ឆ្លុះបញ្ចាំងពីទំនាក់ទំនងយ៉ាងជិតស្និទ្ធរវាងប្រទេសទាំងពីរ។ យើងមានមោទនភាពក្នុងការគាំទ្រកិច្ចខិតខំប្រឹងប្រែងរបស់ ធនាគារជាតិនៃកម្ពុជាដែលបានដើរតួនាទីក្នុងការពង្រឹងការប្រើប្រាស់ប្រាក់រៀល និងចំណងមិត្តភាពនៃប្រទេសទាំងពីរ”។ 

ក្រៅពីភាពងាយស្រួល គំនិតផ្តួចផ្តើមនេះក៏បានពង្រឹងគោលបំណងរបស់ប្រទេសទាំងពីរដូចជា៖ ពង្រីកភាពពាក់ព័ន្ធ និងប្រយោជន៍ប្រចាំថ្ងៃរបស់ប្រាក់រៀលខ្មែរ។ ការប្រើប្រាស់ប្រាក់រៀលនៅបរទេស ជាពិសេសនៅក្នុងប្រទេសដៃគូដូចជាសិង្ហបុរី បង្ហាញពីទំនុកចិត្តកាន់តែខ្លាំងឡើង ទំនើបកម្ម និងការរួមបញ្ចូលក្នុងតំបន់នៅក្នុងប្រព័ន្ធអេកូឡូស៊ីហិរញ្ញវត្ថុរបស់ប្រទេសកម្ពុជា។ ដើម្បីគាំទ្រដល់ការជម្រុញរបស់ធនាគារជាតិនៃកម្ពុជា ក្នុងការពង្រីកការប្រើប្រាស់ប្រាក់រៀលខ្មែរ Phillip Bank  ក៏បានចាត់វិធានការជាក់ស្តែងដើម្បីធ្វើឱ្យរូបិយប័ណ្ណនេះកាន់តែងាយស្រួលក្នុងស្រុក ដូចជាការផ្តល់ជូនការបើកគណនីប្រាក់រៀលដោយឥតគិតថ្លៃ និងស្វ័យប្រវត្តិសម្រាប់អតិថិជនទូទៅ។ កិច្ចខិតខំប្រឹងប្រែងទាំងនេះ ទាំងនៅក្នុងស្រុក និងនៅក្រៅប្រទេសនឹងជួយបង្កើតបរិយាកាសកាន់តែរលូនសម្រាប់ប្រជាជនកម្ពុជាក្នុងការប្រើប្រាស់រូបិយប័ណ្ណជាតិរបស់ពួកគេដោយមានទំនុកចិត្តគ្រប់ទីកន្លែង មិនថានៅក្នុងស្រុក ឬក្រៅស្រុកនោះទេ។